19. भविष्यवाणी केरनु आल़ा

परमेश्वर हमेशा इस्राएली हागै भविष्यवाणी केरनु आल़ै बै भेजदा लागा ती। भविष्यवाणी केरनु आल़ै परमेश्वरा न संदेशा बै शुणा ती होर फिरी तेथा बै लोका बै दसा ती।

ज़ैबै अहाब इस्राएल राज्य पैंधै राजा ती ता तेई बौगत एलिय्याह भविष्यवाणी केरनु आल़ा ती। तेइयै झूठै देऊआ री पूजा कराणै री तैंईंयैं लोका मजबूर केरै ती। तैबै एलिय्याहे आहाबा सैंघै बोलू कि परमेश्वर तिन्हां लोका बै सज़ा देणु आल़ा ती। तेइयै बोलू, “ज़ैबै तकर हांऊँ दबारा गाश होंणै री तैंईंयैं नैंई बोलनु तैबै तकर इस्राएला न गाश नैंई होंणा होर न ऐ औश पौड़नी” ऐसा गैला न अहाब ऐतरा झिकुआ कि तेइयै एलिय्याह बै मकाणै रा फैसला केरू।

तैबै परमेश्वरै एलिय्याह बै बोलू कि जंगला न जाईया अहाबा न गोज़िया। एलिय्याह जंगला न तेई सोते हागै नौठा ज़ौखै परमेश्वरै तेईबै दसु ती। हर दोती होर हर सौंझ़ा, चिड़ू एलिय्याह री तैंईंयैं रोटी होर मांस लेइया एज़ा ती ऐई पूरै बौगता न, अहाब होर तेइरी सैना एलिय्याह बै तोपदै रौहै, पर ते तेइबै तोपी नैंई सकै|,

गाश नैंई होंणै न बाद सौ सोता शुकू। तैबै एलिय्याह सैंघै एकी देशा बै नौठा। तेई देशा न एक गरीब विधवा ती। ज़ुणिरा एक बेटा ती। तिन्हां हागै खाँणा लगभग खत्म हुआ ती किबैकि तौखै कोई नाज़ नैंई हुआ ती। पर फिरी भी, तेसै बेटड़ियै एलिय्याह री हेर-शुण केरी, तै परमेश्वरै तेइरी होर तेइरै बेटै री जरूरत पूरी केरी, ऐसा बजहा न तेसा रै पीठै रा भाण्डा होर तेसा रै तेला री कुप्पी कैधी खाली नैंई हुई। तेई पूरै अकाला न तिन्हां हागै नाज़ ती। एलिय्याह किछ़ बौर्षा तकर तौखै रौहू।

साढ़े त्राई बौर्षा न बाद, परमेश्वरै एलिय्याह सैंघै बोलू कि तेई दबारा गाश देणा तेइयै एलिय्याह न वापस इस्राएला रै राज्य न जाईया अहाबा सैंघै गैला केरनै री तैंईंयैं। तैबै एलिय्याह आहाबा हागै नौठा। ज़ैबै अहाबे सौ हेरु होर बोलू, शोभला तू सा, मुसीबत पैदा केरनु आल़ा!” एलिय्याहै ज़वाब धिना, “मुसीबत पैदा केरनुआलै ता तूहै सा! सौऐ सच्चा परमेशर सा, पर तू बाल देऊआ री पूजा केरदा लागा सा। ऐबै तौभै इस्राएल राज्य रै सैभी लोका बै कर्मेल ढैगा पैंध लेइया आंणा सा।”

तैबै सैभ लोका क्र्मेल ढौगा बै नौठै। ते मर्द भी आऐ ज़ो बोला ती कि ते बाल देऊऐ रै संदेशा बै बोला सी। ऐ सैभ बाल देऊआ रै भविष्यवाणी केरनु आल़ै ती| ते सैभ 450 ती। एलिय्याहै लोका बै बोलू, “कैबै तकर तुसा आपणा मन फेरना? अगर प्रभु परमेश्वर सा ता तेइरी आराधना केरा! अगर बाल देऊ सा ता तेइरी पूजा केरा!”

तैबै एलिय्याहै बाल देऊआ री भविष्यवाणी केरनु आल़ै सैंघै बोलू, “एक बौल्दा बै बौलि केरिया तेइरा मांस वेदी पैंधै रखा, पर औग हेरित् लांदै।तेथा न बाद मुँ भी तैण्ढाऐ केरना, होर एक आँगी वेदी न मुँ मांस रखणा। तैबै अगर परमेश्वर वेदी पैंधै औग भकेआ सा ता तुसा जाणना कि सौ सच़ा परमेश्वर सा।” तैबै बाल देऊरा रै भविष्यवाणी केरनु आल़ै एक बौलि तैयार केरी पर औग नैंई लाई।

तैबै बाल देऊआ रै भविष्यवाणी केरनु आल़ै तेई सैंघै प्रार्थना केरी, “ओ बाल देऊ आसरी शुण!” पूरी धयाड़ तिन्हैं प्रार्थना केरी होर चिखै, औखै तकर कि आपु बै छुरी सैंघै काटु, पर बाल देऊऐ कोई ज़वाब नैंई धिना, होर तेईयै कोई औग नैंई शेटी।

बाल देऊआ रै भविष्यवाणी केरनु आल़ै बाल देऊआ सैंघै प्रार्थना केरनै न लगभग पूरी ध्याड़ लाई। तैबै तिन्हैं प्रार्थना केरनी बन्द केरी। तैबै एलिय्याहे दुजै बौल्दा रा मांस परमेश्वरा री वेदी पैंधै रखु। तेथा न बाद, तेइयै लोका बै पाणी रै बड़े भाण्डै बै तैबै तकर पेरनै बै बोलू ज़ैबै तकर कि मांस, छीड़ी, औखै तकर कि वेदी रै चौऊ पासै री ज़मीन सिन्ही नैंई होली।

तैबै एलिय्याहे प्रार्थना केरी, “ओ प्रभु, अब्राहम, इसहाक, होर याकूबै रै परमेश्वर, आसा बै रिहा कि तुसै इस्राएला रै परमेश्वर सी होर ऐ कि हांऊँ तुसा रा दास सा। ज़वाब देआ। ज़ुणी सैंघै इन्हां लोका जाणना कि तुसै सच़ै परमेश्वर सी।”

छ़ेकै, सर्गा न औग आई होर तेइयै, मांस, छीड़ी, पात्थर, माटा, औखै तकर कि वेदी रै औरै-पौरै रा पाणी भी शुकू। ज़ैबै लोकै ऐ हेरू कि, ते ज़मीना पैंधै पौऐ होर बोलू, “प्रभुऐ परमेश्वर सा! प्रभुऐ परमेश्वर सा!”

तैबै एलिय्याहै बोलू, “बाल देउआ रा एक भी भविष्यवाणी केरनु आल़ा बच़िया नैंई निकता लोड़ी!” तैबै लोकै बाल देऊआ रै भविष्यवाणी केरनु आल़ै ढौकै होर ते तौखै न आँगी केरै होर ते मकाऐ।

तैबै एलिय्याहै अहाब राज़ै सैंघै बोलू, “छ़ेकै आपणै घौरा बै जा, किबैकि गाश होनु आल़ा सा।” छ़ेकै बादल घौणै हुऐ, होर गाश शुरू हुआ। प्रभु तेई शुकै बै खत्म केरदा लागा ती। एथा न ऐ प्रगट होआ सा कि प्रभुऐ सच़ा परमेश्वर सा

ज़ैबै एलिय्याहै आपणा कोम खत्म केरू, ता परमेश्वरै एलीशा नाँ रा एक मर्द भविष्यवाणी केरनु आल़ा चुनू। परमेश्वरै एलीशा रै ज़रियै बोहू सारै च़मत्कार केरै। एक च़मत्कार नामान नाँ रै मर्दा सैंघै हुआ सौ एक बेरी रै सैना रा नेता ती, पर तेइबै चम्बड़ी री एक बुरी बीमारी ती। नामानै एलीशा रै बारै न शुणु ती, तैबै सौ एलीशा हागै आऊ तेईन तेइबै ठीक होंणै री अर्ज़ केरी। एलीशै नामाना सैंघै बोलू जाइया यरदन नौई रै पाणी न सौत बारी डुबकी लाई।

नामान झिकुआ। तेइयै ऐण्ढा केरनै न नाँह केरू, ऐ तेइबै मुर्खता रा कोम लागा ती। पर बादा न तेइयै आपणा मन बदलू होर जाईया यरदन नौई रै पाणी न सौत बारी डुबकी लाई। ज़ैबै आखरी बार सौ पाणी न बाहरै निकता ता परमेश्वरै सौ ठीक केरू।

परमेश्वरै इस्राएली लोका हागै होर बोहू सारै भविष्यवाणी केरनु आल़ै भेजै। तिन्हैं सैभिऐ लोका बै मूर्ति री पूजा केरनी बन्द केरनै बै बोलू। एथा रै बजाय कि तिन्हैं एकी होरी सैंघै सही तरीकै बर्ताव केरू लोड़ी होर एकी होरी पैंधै दया केरी लोड़ी। तिन्हैं भविष्यवाणी केरनु आल़ै लोका बै ऐ चिताऊणी धिनी कि तिन्हां बै बुरै कोम केरना बन्द केरनै चेहिऐ होर परमेश्वरा री गैला रा पालन केरना चेहिऐ। अगर तिन्हैं लोकै ऐण्ढा नैंई केरू ता परमेश्वरा ते दोषी मनिया तिन्हरा न्याय केरना, होर तिन्हां बै सज़ा देणी।

ज़ादा बौगत, तिन्हैं परमेश्वरा रै हुक्मा रा पालन नैंई केरू। पर तिन्हैं भविष्यवाणी केरनु आल़ै सैंघै बुरा बर्ताव केरू औखै तकर कि कैधी-कैधी ते मकाऐ। एक बारी तिन्हैं यिर्मयाह भविष्यवाणी केरनु आल़ा शुकै कुँऐ न पाऊ होर तौखै मौरनै री तैंईंयैं छौड़ू। सौ कुँऐ रै च़िकरा न डूबू पर राजै बै तेई पैंधै दया आई होर तेइयै आपणै सैनिका बै हुक्म धिना कि यिर्मयाह रै मौरनै न पैहलै तेइबै कुँऐ न बाहरै खिंचिया आंणै।

भविष्यवाणी केरनु आल़ै परमेश्वरा धिरिऐ न बोलणा जारी रखु, चाहैँ लोकै तिन्हां सैंघै नफरत केरी। तिन्हैं लोका बै हुक्म धिना कि अगर तिन्हैं पछ़तावा नैंई केरू ता परमेश्वरा ते नाश केरनै। तिन्हैं लोका बै ऐ भी याद कराऊ कि परमेश्वरै तिन्हां हागै मसीह बै भेजणै रा वायदा केरू सा।