18. राज्य रा बौंडिणा

दाऊद राजै चाल़ी बौर्षा तकर राज़ केरू, होर तेइरै बेटै सुलैमानै इस्राएली पैंधै राज़ केरना शुरू केरू। परमेश्वरै सुलैमानै री गैला केरी होर तेइन पुछू कि सौ सैभी न ज़ादा कि चाहा सा कि परमेश्वर तेइरी तैंईंयैं केरला। सुलैमानै परमेश्वरा ना मुँगु कि सौ तेइबै बोहू बुद्धिमान बणाऐ। ऐसा गैला सैंघै परमेश्वर बोहू खुश हुआ, तैबै परमेश्वरै सुलैमान दुनिया रा सैभी न बुद्धिमान मर्द बणाऊ सुलैमानै बोहू गैला सिखी होर सौ एक बुद्धिमान राजा ती। परमेश्वरै सौ बोहू धनी भी बणाऊ ती।

यरूशलेमा न सुलैमानै सौ मन्दिर बणाऊ ज़ुणिरी तैंईंयैं तेइरै बापूऐ तरकीब बणाई ती होर चिजा कठा केरी ती। ऐबै लोका मिलापा आल़ै तौम्बू रै बजाय मन्दिरा न परमेश्वरा री आराधना केरा ती होर तेइरी तैंईंयैं बौलि च़ढ़ा ती। परमेश्वर एज़िया मन्दिरा न मौजूद रौहा ती, होर तौखै सौ आपणै लोका सैंघै रौहा ती।

पर सुलैमानै दुजै देशा री बेटड़ी सैंघै झ़ुरी रखी। लगभग 1,000 बेटड़ी सैंघै ब्याह केरिया परमेश्वरा रा अनादर केरू! इन्हां मौंझ़ै न बोहू बेटड़ी पराऐ देशा न आई होर आपु सैंघै आपणै देऊ भी आंणै होर तिन्हरी पूजा केरनी शुरू केरी। ज़ैबै सुलैमान खापरा हुआ ता तेइयै भी तिन्हरै देऊऐ री पूजा केरनी शुरू केरी।

ऐसा बजहा न परमेश्वर सुलैमाना सैंघै बोहू झिकुआ ती। तेइयै बोलू कि सौ इस्राएल देशा बै दुई राज्य न बौंडिया तेइबै सज़ा देला। तेई सुलैमाना रै मौरनै न बाद ऐण्ढा केरना।

सुलैमाँना रै मौरनै न बाद, रहबाम राजा बणु। इस्राएल देशा रै सैभ लोका तेइबै आपणै राजा रै रूपा न अपनाणै री तैंईंयैं कठै हुऐ। तिन्हैं रहबामा सैंघै शिकायत केरी कि सुलैमानै तिन्हां सैंघै बोहू मेहनत कराई ती होर बोहू कर वसूल केरै ती। तिन्हैं रहबामा सैंघै अर्ज़ केरी कि तिन्हां न कम कोम करालै।

पर रहबा बै तिन्हां बै बड़ी मूर्खता सैंघै ज़वाब धिना, “तुसै बोला सी की मेरे बापू सुलैमानै तुसा न बोहू मेहनत कराई। पर मूँ तुसा न होर भी ज़ादा कड़ी मेहनत कराणी, होर मुँ तुसै तेथा न भी ज़ादा दुखी केरनै।

ज़ैबै लोकै सौ ऐण्ढा बोलदा शुणु ता तिन्हां मौंझ़ै न कई लोकै तेइरै खिलाफ़ विद्रोह केरू। दस गोत्रे सौ छौड़ू; तेई सैंघै ऐबै सिर्फ दुई गोत्र बच़ै। इन्हां दुई गोत्रै आपू बै यहूदा रा राज्य बोलू।

बाकी रै दस गोत्रै यारोबाम नाँ रै एक मर्द आपणा राजा बणाऊ। ऐ गोत्र देशा रै उतरी-पूर्वी भागा न ती। तिन्हैं आपु बै इस्राएलै रा राज्य बोलू।

पर यारोबामै परमेश्वरा रै खिलाफ विद्रोह केरू होर लोका न पाप कराऊ। तेइयै आपणै लोका रै ज़रियै पूजा केरनै री तैंईंयैं दुई मूर्ति बणाई। ते ऐबै यहूदा रै राज्य न यरूशलेमा न परमेश्वरा रै मन्दिरा न तेइरी आराधना केरनै री तैंईंयैं नैंई नौठै।

यहूदा होर इस्राएला रै राज्य बैरी बणै, होर ते एकी दुजै रै बिरोधा न लड़दै लागै।

इस्राएला रै नोंऊँऐ राज्य न, सारै राजै दुष्ट ती। इन्हां मौंझ़ै न कई राजा तिन्हरी ज़ैगा पैंधै राजा बणनै री चाहा रखणु आल़ै होरी इस्राएली रै ज़रियै मारूऐ ती।

इस्राएल राज्य रै सारै राजै होर बोहू लोकै मूर्ति री पूजा केरी। ज़ैबै तिन्हैं ऐण्ढा केरू, ता ते वेश्या सैंघै सुते होर औखै तकर कि कई बार मूर्ति रै आगै शोहरू री बौलि भी च़ढ़ाई।

यहूदा राज्य रै राजा, दाऊदा रै खानदान ती। इन्हां राजै मौंझ़ै कई भलै मांहणु ती ज़ुणियै न्याय सैंघै राज़ केरू होर परमेश्वरा री आराधना केरी। पर यहूदा रै बोहू राजा दुष्ट ती। तिन्हैं दुष्टता सैंघै राज़ केरू, होर मूर्ति री पूजा केरी। औखै तकर कि इन्हां मौंझ़ै न किछ़ राजै झुठै देऊआ आगै आपणै शोहरू री भी बौलि केरी। यहूदा रै बोहू लोकै भी परमेश्वरा रै बिरोधा न विद्रोह केरू होर होरी देऊआ री पूजा केरी।