17. दाऊदा सैंघै परमेश्वरा रा वायदा

शाऊल इस्राएली रा पैहला राजा ती। सौ लौम्मा होर बांका ती, ज़ैण्ढै ते लोका चाहा ती। इस्राएली पैंधै आपणै शासकै रै पैहलै किछ़ बौर्षा तक शाऊल एक शोभला राजा ती। पर बादा न सौ एक दुष्ट मांहणु बणु ज़ुणियै परमेश्वरै री गैल नैंई मनी, तैबै परमेश्वरै एक होर मांहणु चुनू।

परमेश्वरै दाऊद नाँ रै एक ज़ुआन इस्राएली मर्दा बै चुनिया एक रोज़ शाऊला री ज़ैगा पैंधै राजा होंणै री तैंईंयैं त्यार केरना शुरू केरू। दाऊद बैतलहम नगरा रा एक फुआल ती। कई बार, दाऊदै शेर होर भालू दुऐ मकाऐ ती किबैकि ज़ैबै दाऊद भेड़ा-बौकरी री हेर-शुण केरा ती तैबै तिन्हैं हमला केरू ती। दाऊद एक दीन होर धर्मी मांहणु ती। तेइयै परमेश्वरा पैंधै बशाह केरू होर तेइरी गैला मनी।

ज़ैबै दाऊद ऐबै ज़ुआनै ती, तेइयै लौम्मै-चौड़ै गोलीयता रै खिलाफ लड़ाई केरी। गोलियत एक बोहू शोभला सैनिक ती। सौ बोहू ताकतवर होर त्राई मीटर लौम्मा ती! पर परमेश्वरै गोलियता बै मारनै होर इसराएली बै बचाणै न दाऊदा री मज़त केरी। एथा न बाद, दाऊदै इस्राएला रै देशा पैंधै कई बार जीत हासिल केरी। दाऊद एक बड़ा सैनिक बणु, होर तेइयै बोहू सारै युद्धा न इस्राएली सैना री अगुवाई केरी। लोकै तेइरी सराऊथि केरी।

लोकै दाऊदा सैंघै एतरी झ़ुरी केरी कि शाऊल तेई सैंघै मिश केरदा लागा। आखिरकार शाऊल तेई बै मारना चाहा ती, तैबै दाऊद तेईन होर तेई सैंघै सैनिका न गोज़िणै री तैंईंयैं सुनसान ज़ैगा न भगू। एक रोज़, ज़ैबै शाऊल होर तेइरै सैनिक दाऊदा बै तोपदै लागै ती ता शाऊल एक गुफा न नौठा। ऐ सौऐ गुफा ती, ज़ुणिन दाऊद गोजुआ ती, पर शाऊलै सौ नैंई हेरू। दाऊद तेई पिछै बोहू नेड़ नौठा होर तेइरै झिकड़ै न एक टुकड़ा काटू। बादा न, ज़ैबै शाऊल तेसा गुफा न निकता ता दाऊदै हाक पाइया तेई रै ढौकेदै झिकड़ै रा टुकड़ा रिहाऊ ऐण्ढी तैरहा, शाऊला बै पता लागा कि दाऊदै राजा बनणै री तैंईंयैं तेईबै मारनै री तैंईंयैं नाँह केरू।

किछ़ बौगता बाद, शाऊल युद्धा न मूँआ, होर दाऊद इस्राएली रा राजा बणु। सौ एक शोभला राजा ती, होर लोकै तेई सैंघै झ़ुरी रखी। परमेश्वरै दाऊदा बै आशीष धिनी होर सौ सफल बणाऊ। दाऊदै कई युद्ध लड़े, होर परमेश्वरै इस्राएली रै बैरी बै हराणै री तैंईंयैं तेइरी मज़त केरी। दाऊदै यरूशलेम नगर जितिया सौ आपणी राजधानी बणाई, ज़ौखै सौ रौहू होर तौखै राज़ केरू। दाऊद चाल़ी बौर्षा तकर राजा रौहू। ऐई बौगत, इस्राएल सामर्थी होर धनवान बणु ती।

दाऊद एक मन्दिर बनाणा चाहा ती ज़ौखै सारै इस्राएली परमेश्वरा री आराधना केरी सकलै होर तेइरी तैंईंयैं बौलि चकढ़ाई सकलै। लगभग 400 बौर्षा न, ते लोका मूसा रै बणाऐदै मिलापा आल़ै तौम्बू न परमेश्वरा री आराधना केरदै लागै ती होर तेइरी तैंईंयै बौलि च़ढ़ाँदै लागै ती।

पर तौखै नातान नाँ रा एक भविष्यवाणी केरनु आल़ा ती। परमेश्वरै सौ दाऊद ऐ बोलणै री तैंईंयैं भेजू, “तैं बोहू युद्ध लड़ै सी, तैबै तू मेरी तैंईंयैं मन्दिर नैंई बणाई सकदा तेरै बेटै ऐ बनाणा। तैबै, मुँ तौभै बोहू आशीष देणी। तेरै एक खानदाना हमेशा री तैंईंयैं मेरे लोका पैंधै राज़ केरना।” हमेशा री तैंईंयैं राज़ केरनु आल़ा सौ दाऊदा रा एकै खानदान मसीह ती। मसीह परमेश्वरा रा चुनूदा मांहणु ती जो दुनिया रै लोका बै तिन्हरै पापा न बचांदा आऊ ती।

ज़ैबै दाऊदै नाताना रा संदेश शुणु ता तेइये परमेश्वरा रा धन्यवाद केरू होर सराऊथि केरी। परमेश्वर तेइरी इज़ता बै बढ़ाँदा लागा ती होर तेइबै बोहू आशीष देंदा लागा ती, बेशक, नैंई जाणदा ती इन्हां गैला बै कैबै केरला। ऐई बौगत आसै जाणा सी कि इस्राएला बै एक लौम्मै बौगता तकर लगभग 1,000 बौर्षा तकर मसीह रै ऐणै रा इन्तजार केरना पौड़ना।

दाऊदै कई बौर्षा तकर न्याय सैंघै आपणै लोका पैंधै राज़ केरू। तेइयै बड़ै आदरा सैंघै परमेश्वरा रा वचन मनु होर परमेश्वरै तेइबै आशीष धिनी। हालांकि, आपणै जिन्दगी रै आखरी न तेइयै परमेश्वरा रै खिलाफ खतरनाक पाप केरू ती।

एक रोज़ दाऊदै महला न बारै झाँकू होर बांकी बेटड़ी नहांदैआ हेरी। सौ नैंई जाणदा ती, पर तेइयै पता लाऊ कि तैसा नाँ बेतशेदा ती।

आपणी नज़री बै फेरनै न बाद, दाऊदै तैसा बै आपु हागै आंणनै री तैंईंयैं कोई भेजू। सौ तेई सैंघै सूती होर सौ घौरा भेजी। थोड़ै रोज़ा बाद बतशेबै ऐ बोलिया दाऊदा हागै संदेशा भेजू कि सौ सूज़दी सा|

बतशेबा रा लाड़ा उरिय्याह नाँ रा एक मांहणु ती। सौ दाऊदा रै एक शोभलै सैनिका मौंझ़ै न ती। ऐई बौगत सौ युद्ध केरनै री तैंईंयैं बाहरै नौठा ती। दाऊदै उरिय्याह युद्धा न वापस शाधिया तेइबै आपणी लाड़ी सैंघै रौहणै री तैंईंयैं बोलू। पर होर सैनिक युद्धा न ती तैबै उरीय्याहै घौरा जाणै न नाँ केरू। तैबै दाऊदै उरिय्याह वापस भेजू होर सेनापति सैंघै ऐण्ढा बोलू कि तेइबै तेसा ज़ैगा न रख ज़ौखै सैभी न शक्तिशाली बैरी होलै ताकि सौ मकाऊ लोड़ी। ता ऐण्ढा हुआ कि उरिय्याह युद्धा न मूँआ|

उरिय्याह रै युद्धा न मौरनै न बाद दाऊदै बेतशेदा सैंघै ब्याह केरू। बादा न तेसै दाऊदा रै बेट बै जन्म धिना। दाऊदै ज़ो केरू तेथा न परमेश्वर बोहू झिकुआ ती, तैबै तेइयै नातान भविष्यवाणी केरनु आल़ै बै दाऊदा बै ऐ दसणै री तैंइंयैं भेजू कि तेइरा पाप केतरा बुरा ती। दाऊदै आपणै पापै रा पश्चाताप केरू होर परमेश्वरै तेइबै माफ़ केरू। आपणी बाकि ज़िन्दगी न, आपणै मुश्कलाता न भी दाऊद परमेश्वरा पिछ़ै-पिछ़ै च़लू होर तेइरी गैला मनी।

पर दाऊदा रा बेटा मूँआ। ऐण्ढी तैरहा परमेश्वरै दाऊदा बै सज़ा धिनी। ऊँईरै अलावा, दाऊदा रै मौरनै तकर तेइरै आपणै टबरा रै किछ़ लोकै तेइरै खिलाफ़ लड़ाई केरी, होर दाऊदै री आपणी शक्ति कम हुई ती। पर परमेश्वर विश्वासयोग्य ती होर ऐबै भी तेइयै सौ केरू जो तेइयै दाऊदा सैंघै केरनै रा वायदा केरू ती कि तेई केरना, भलै ही दाऊदै तेइरी गैल नैं मनी ती। बादा न, दाऊद होर बेतशेदा री दुजी औलाद पैदा हुई, होर तिन्हैं तेइरा नाँ सुलैमान रखु।