16. छुड़ाणु आल़ा

यहोशू रै मौरनै न बाद इस्राएली लोकै परमेश्वरा रा हुक्म नैंई मनु। तिन्हैं परमेश्वरा रै नियमा रा पालन नैंई केरू, होर तिन्हैं तेई वायदै रै देशा न बचेदै कनानी लोका बाहरै खोलै। इस्राएली लोकै आपणै सच़ै परमेश्वर, प्रभु बै छौड़िया कनान देशा रै देऊआ री पूजा केरनी शुरू केरी। इस्राएली हागै कोई राजा नैंई ती, तैबै ज़ुणिबै ज़ो सही लागा सौऐ केरू।

परमेश्वरा रा हुक्म नैंई मनणै रै ज़रियै इस्राएली लोकै एक विधि मनणी शुरू केरी ज़ो कई बार दोहराई ती। ऐ विधि ऐण्ढी रीतियै च़ली, किछ़ बौर्षा तकर इस्राएली लोका परमेश्वरा रा हुक्म नैंई मनणा, तैबै सौ तिन्हां बै तिन्हरै बैरी न हराणै रै ज़रियै सज़ा देला। इन्हां बैरी इस्राएली न तिन्हरी चिजा लूटणी, तिन्हरी धन दौलत नाश केरनी, होर तिन्हां न बोहू सारै मकाणै। फिरी ज़ैबै इस्राएली रै बैरीऐ तिन्हां पैंधै कई बौर्षा तकर अत्याचार केरना, तेथा न बाद इस्राएली लोका आपणै पापा न पछ़तावा केरना होर परमेश्वरा न तिन्हां बै बचाणै री तैंईंयैं प्रार्थना केरलै।

हर बार ज़ैबै इस्राएली पापा न पछ़तावा केरलै ता परमेश्वरा ते बचाणै। तेई एक छुड़ाणु आल़ै बै ऐण्ढा केरना। परमेश्वरै तिन्हां लोका बै बचाणै री तैंईंयैं बोहू सारै छुडानु आल़ै भेजै। परमेश्वरा सैंघलै एक बैरी मिद्यानीजै लोका रै ज़रियै इस्राएली लोका हराणै रै ज़रियै दबारा ऐण्ढा केरू।

मिद्यानी लोकै सौत बौर्षा तकर इस्राएली लोका रा नाज़ लुटू| इस्राएली लोका बोहू डौरै ती, होर ते गुफा न गोजुऐ ताकि मिद्यानी लोका तिन्हां बै तोपी नैंई सकलै। आखिरकार, तिन्हां बै बचाणै री तैंईंयैं तिन्हैं परमेश्वर पुकारू।

गिदोन नाँ रा एक इस्राएली मर्द ती। एक रोज़, सौ एक गुप्त ज़ैगा न गेंहू फड़ाकदा नौठा ती ताकि मिद्यानी लोका तूंईबै चोरी नैंई सकलै। प्रभु रै स्वर्गदूते गिदोना हागै एज़िया तेइबै बोलू, “ओ शूरवीर परमेश्वर तौ सैंघै सा। जा होर इस्राएली लोका बै मिद्यानी लोका बै बचा।”

गिदोना रै बापू हागै मूर्ति बै च़ढ़ाणै री तकर एक वेदी ती। सैभी न पैहली गैल ज़ो परमेश्वरै गिदोना बै केरनै री तैंईंयैं बोली सौ तेसा वेदी बै चोड़ना ती। पर गिदोन लोका न डौरा ती, तैबै तेइयै रात होंणै रा इन्तजार केरू। तैबै तेइयै तेसा वेदी रै चोड़िया टुकड़े टुकड़े केरै। तेइयै परमेश्वरा री तैंईंयैं बौलि च़ढ़ाई।

आगलै रोज़ दोती लोकै हेरू कि कौसियै वेदी चोड़िया टुकड़े-टुकड़े केरै, तैबै ते झिकुऐ। ते गिदोना बै मारनै री तैंईंयैं तेइरै घौरा बै नौठै, पर गिदोना रै बापू सैंघै बोलू, “तुसै किबै आपणै देऊऐ री मज़त केरनै री कोशिश केरदै लागै सी? अगर सौ देऊ सा ता तेइबै आपणी सुरक्षा आपु केरनै दै!” किबैकि तेइयै ऐण्ढा बोलू तैबै लोकै गिदोन नैंई मकाऊ।

तैबै इस्राएली लोका बै लूटणै री तैंईंयैं मिद्यानी लोका फिरी भी आऐ। ते ऐतरै सारै ती कि तिन्हरी गिणती भी नैंई केरी सका ती। गिदोने तिन्हरै खिलाफ लड़ने री तैंईंयैं इस्राएली लोका आपू सैंघै शाधै। गिदोनै परमेश्वरा न दुई चिन्ह मुँगै ताकि तेइबै बशाह होला कि परमेश्वर सच़ियै तेइबै इस्राएला बै बचाणै री तैंईंयैं बोलदा लागा ती।

पैहलै चिन्हा री तैंईंयैं, गिदोनै भेड़ा री ऊन धौरती पैंधै रखिया परमेश्वरै बोलू कि दोतकी ओश सिर्फ भेड़ा री तिना ऊना पैंधै पौई लोड़ी पर धौरती पैंधै नैंई पौई लोड़ी। परमेश्वरै ऐण्ढा केरू। आगली राती, तेइयै परमेश्वरा बै बोलू कि धौरती सिन्हीं हुई लोड़ी पर भेड़े री ऊन शुकी शुकी लोड़ी रौही। परमेश्वरे ऐण्ढा भी केरू। इन्हां दुई चिन्हा री बजहा न, गिदोनै बशाह केरू कि परमेश्वर सच़ीए चाहा सा कि सौ इस्राएली लोका बै मिद्यानी लोका न बचा।

तैबै गिदोनै सैनिक आपु हागै शाधु होर 32,000 मर्द आऐ। पर परमेश्वरै तेईन बोलू कि ऐ बोहू ज़ादा सी। तैबै गिदोनै तिन्हां सैभ 22,000 सैनिक घौरा वापस भेज़ै ज़ो लड़ने न डौरा ती। परमेश्वरै गिदोना बै बोलू ऐ मर्द भी बोहू ती। तैबै गिदोनै 300 सैनिका न छौड़िया ते सैभ घौरा भेजै।

तेसा राती परमेश्वरै गिदोना बै बोलू, “मिद्यानी लोके रै डेरै न जा होर तिन्हां बै गैला केरदै शुण। ज़ैबै तू शुणला कि ते कि गैला केरा सी ता तौ तिन्हां पैंधै हमला केरनै न नैंई डौरना।” तैबै तेसा राती, गिदोन बुनै तिन्हरै डेरै न नौठा होर तेइयै मिद्यानी सैनिका बै आपणै सैंघी बै गैला दसदैआ शुणी ज़ो तेइयै सुपनै न हेरी ती। तेई मर्दा रै सैंघियै बोलू, “ऐई सुपनै रा मतलब सा किगिदोनै री सैने आसै मिद्यानी सैना हराणी!” ज़ैबै गिदोनै ऐ शुणु ता तेइयै परमेश्वरा री सराऊथि केरी।

तैबै गिदोन आपणै सैनिका हागै वापस आऊ होर तिन्हां मौंझ़ै न हर एकी बै नरशिंगा, एक माटै रा भाण्डा होर एक मशाल धिनी। तिन्हैं सौ डेरा घेरू ज़ौखै मिद्यानी सैनिक सौंदै लागै ती। गिदोना रै 300 सैनिकै पणी मशाला भाण्डै न खौटी ती तैबै मिद्यानी लोका तिन्हां मशाला रै प्याशै बै हेरी नैंई ती सकदै।

तैबै गिदोना रै सैभ सैनिकै आपणै भाण्डै एकी बारी न चोड़िया अचानक मशाला न औग प्रकट केरी। तिन्हें आपणै नरशिंगे फुकरै होर जोरै- जोरै सैंघै चिखै, "यहोवा री धिरिए न गिदोनै री तलवार!"

परमेश्वरै मिद्यानी लोका डराऐ, तैबै ते एकी दुजै बै मारदै काटदै लागै। छ़ेकै, गिदोनै ते समाद देणु आल़ै बैहू सारै इस्राएली लोका मिद्यानी लोका रा पिछा केरनै न तिन्हरी मज़त केरनै री तैंइयैं भेजै। तिन्हैं तिन्हां मौंझ़ै न बोहू सारै सारै लोका मकाऐ होर बाकी रा पिछा केरिया ते इस्राएल देशा न बाहरै खोलै। तेई रोज़ 1,20, 000 मिद्यानी लोका मकाऐ। ऐण्ढी तैरहा परमेश्वरै इस्राएली लोका बच़ाऐ।

ते लोका गिदोना बै आपणा राजा बनाणा चाहा ती, पर गिदोनै तिन्हां बै ऐण्ढा केरनै नैंई धिना, पर तेइयै तिन्हां न ते सूनै रै गैहणै मुँगै ज़ो तिन्हां मौंझ़ै न सैभिऐ मिद्यानी लोका न लूटै ती। तिन्हैं लोकै बोहू ज़ादा सूना गिदोना बै धिना।

तैबै गिदोनै तेई सूनै सैंघै एक खास किस्मै झिकड़ै बणाऐ ज़ैण्ढै कि एक महापुरोहित ला ती। पर लोकै तेइरी पूजा केरनी शुरू केरी ज़ैण्ढै कि सौ एक मूर्ति होली। तैबै परमेश्वरै फिरी इस्राएली लोका बै सज़ा धिनी किबैकि तिन्हैं मूर्ति री पूजा केरी ती। परमेश्वरै तिन्हरै बैरी बै हराणै री तैईंयै मज़बूर केरै। आखिरकार तिन्हैं फिरी परमेश्वरा न मज़त मौंगणै री तैईयैं प्रार्थना केरी, होर परमेश्वरै तिन्हां हागै तिन्हांबै बच़ाणै री तैईयैं एक होर छुड़ाणु आल़ा भेज़ु।

ऐ गैल कई बार हुई: इस्राएली लोका पाप केरना, परमेश्वरा तिन्हां बै सज़ा देणी, तिन्हां पछ़तावा केरना, होर परमेश्वरा तिन्हां बै छुड़ाणै री तैंईंयैं कोई भेजणा। कई बौर्षा तकर, परमेश्वरै बोहू सारै छुडाणु आल़ै भेजै ऐ ज़ंणियै इस्राएली लोका तिन्हरै बैरी न बच़ाऐ ती।

आखिरकार, तिन्हैं लोकै होरी देशा सांही परमेश्वरा न आपणी तैंईंयैं एक राजा मुँगु। ते एक ऐण्ढा राजा चाहा ती ज़ो लौम्मा होर शक्तिशाली हो, होर ज़ो युद्धा न तिन्हरी अगुवाई केरी सकला। परमेश्वरा बै ऐ अर्ज़ पसन्द नैंई आई, पर तेइयै तिन्हां बै एक ऐण्ढा राजा धिना ज़ैण्ढा तिन्हैं माँग केरी ती।