15. वायदै रा देश

आखरी न, ऐबै सौ बौगत आऊ ती कि इस्राएली लोका वायदै रै देशा न, कनाना न प्रवेश केरलै। तेई देशा न यरीहो नाँ रा एक मांहणु ती। तेइरी सुरक्षा री तैंईंयैं तेइरै चौऊ पासै होर मजबूत दीवारा ती। यहोशूऐ तेई नगरा न दुई भेदी भेजै। तेई नगरा न राहाब नाँ री एक वेश्या रौहा ती। तेसै ते भेदी गज़ियाऐ, होर फिरी बादा न तेसै तिन्हां बै नगरा न बचिया निकलनै री मज़त केरी। तेसै ऐण्ढा तैबै केरू किबैकि सौ परमेश्वरा पैंधै बशाह रखा ती। ज़ैबै इस्राएली लोका यरीहो बै नाश केरलै तैबै तिन्हैं राहाब होर तेसा रै टबरा बै बचाणै रा वायदा केरू ती।

इस्राएली लोका बै वायदै रै देशा न प्रवेश केरनै री तैंईंयैं यरदन नौई पार केरनी पौड़ा ती। परमेश्वरै यहोशू बै बोलू, “पुरोहिता बै पैहलै जाणै दै” ज़ैबै पुरोहितै यरदन नौई न आपणै कदम रखै ता पाणी री धारा एक दम रूकी, ज़ुणी सैंघै इस्राएली लोका नौई रै दुजी धिरिऐ शुकी धौरती पैंधै जाई सकलै।

तिन्हैं लोकै नौई पार केरी ता परमेश्वरै यहोशू बै बोलू कि यरीहो पैंधै हमला केरनै री तैंईंयैं त्यार रौहा, सौ बोहू मजबूत नगर ती। परमेश्वरै तिन्हां लोका बै बोलू कि तिन्हरै पुरोहित होर सैनिक छौ रोज़ा तकर तेई नगरा रै चौऊ धिरिऐ चक्कर लाणा सा। तैबै पुरोहित होर सैनिकै ऐण्ढा केरू।

तैबै सौतुऐ रोज़, इस्राएली लोकै तेई नगरा रै चौऊ धिरिऐ सौत बारी होर चक्कर लाऐ। तिन्हरै नगरा रै चौऊ पासै सौतुई बार चक्कर लाणै न बाद पुरोहितै आपणी तुरही फुकरी होर सैनिकै जोरै री आवाज़ केरी।

तैबै यरीहो रै चौऊ धिरिऐ री दीवारा ढौल़ी! ज़ैण्ढै परमेश्वरै हुक्म धिना ती इस्राएली लोकै नगरा री हर चीज़ नाश केरी। तिन्हैं सिर्फ राहब होर तेसा रै टबर छौड़ै, ज़ो इस्राएली रा भाग बणै ती। ज़ैबै कनाना न रौहणु आल़ै होरी लोकै शुणु कि इस्राएली लोकै यरीहो नाश केरै. ता ते डौरै कि ते इस्राएली लोकै यरीहो नाश केरू सा, ता ते डौरै कि इस्राएली लोका तिन्हां पैंधै भी हमला केरना।

परमेश्वरै इस्राएली लोका बै ऐ हुक्म धिना ती कि कनान देशा न रौहणु आल़ी कौसी भी जाति सैंघै मेल-मिलाप नैंई केरना सा। पर गिबोनी नाँ री एक कनानी जातियै झुठ बोलू कि कनाना न दूर एकी ज़ैगा रै रौहणु आल़ै सी। तिन्हैं यहोशू सैंघै मेल-मिलाप केरनै री अर्ज़ केरी। यहोशू होर होरी इस्राएली अगुवै परमेश्वरा न नैंई पुछू कि तिन्हांबै कि केरना चेहिऐ। तिन्हैं गीबोनी सैंघै मेल-मिलाप केरू।

त्राई रोज़ा बाद, इस्राएली लोका बै पता लागा कि गिबोनी लोका कनान देशा न रौहा ती। ते झिकुऐ किबैकि गिबोनी लोकै तिन्हां बै धोखा धिना ती। पर तिन्हैं तिन्हां सैंघै केरूदा मेल-मिला बणाईया रखु। किबैकि सौ परमेश्वरा रै सामनै केरूदा ती। तैबै किछ़ बौगता बाद, कनाना न रौहणु आली एक होरी जाति, एमोरी रै राज़ै शुणु कि गिबोनी लोकै इस्राएली लोका सैंघै ल मिलाप केरू, तैबै तिन्हैं आपणी-आपणी सैना बै एक-एक केरिया बड़ी सैना बणाई होर गिबोना पैंधै हमला केरू। गिबोनी लोकै तिन्हरी मज़त केरनै री तैंईंयैं यहोशू हागै एक संदेश भेजू।

तैबै यहोशू ए इस्राएली लोकै री सैना कठा केरी होर गिबोनी हागै पूजणै री तैंई ते पूरी रात च़लै। दोती झिशा तिन्हें एमोरी री सैना हैरान केरी होर तिन्हां पैंधै हमला केरू।

तेई रोज़ परमेश्वर इस्राएली लोका री तैंईंयैं लड़ू। तेइयै एमोरी लोका घबराऐ होर तेइयै बड़े-बड़े शौऊरू शेटिया बोहू एमोरी लोका मकाऐ।

परमेश्वरै सूरज भी सर्गा न एकी ज़ैगा न रखू। ताकि इस्राएली लोका बै पूरा बौगत मिली सकै कि एमोरी लोका बै पूरी तैरहा हराई सकलै। तेई रोज़ परमेश्वरै इस्राली लोका री तैंईंयैं एक बौहू बड़ी जीत हासिल केरी।

ज़ैबै परमेश्वरै तिन्हां सैना बै हराणै न बाद, बोहू कनानी लोका बै इस्राएली पैंधै हमला केरनै री तैंईंयैं कठा हुऐ। यहोशू होर इस्राइली लोकै हमला केरिया तिन्हरा नाश केरू।

इन्हां युद्धा न बाद, परमेश्वरै इस्राएली रै हर गोत्रा बै वायदै रै तेई देशा न तिन्हरा भाग धिना। तैबै परमेश्वरै इस्राएली लोका बै तेइरी सैभ सीमा पैंधै शान्ति धिनी।

ज़ैबै यहोशू खापरा हुआ ता तेइयै इस्राएली रै सैभ लोका सैंघै शाधै। तैबै यहोशूऐ तिन्हां सैभी लोका बै याद कराऊ कि तिन्हैं तेई वायदै रा पालन केरनै री प्रतिज्ञा की ती ज़ो, परमेश्वरै तिन्हां सैंघै सीनै ढौगा पैंधै केरू ती तिन्हैं लोकै परमेश्वरा री तैंईंयैं विश्वास योग्य रौहणै होर तेइरै बिधाना रा पालन केरनै रा वायदा केरू सा।