14. सुनसान ज़ैगा न भटकणा

परमेश्वरै इस्राएली लोका बै ते नियम दसणै बन्द केरै ज़ुणिरा तिन्हां बै केरैदै वायदै री बजहा न मनणा ती। फिरी तेइयै सीनै ढौगा न आगै तिन्हरी अगुवाई केरी। सौ तिन्हां बै वायदै रै देशा न नेणा चाहा ती। ऐ देश कनान भी बोलिया ती। परमेश्वर बादला रै थौम्बै न तिन्हां न आगै-आगै च़लू, होर ते तेई पिछे च़लै।

परमेश्वरै अब्राहम, इसहाक होर याकूबा न वायदा केरू ती कि सौ वायदै रा देश तिन्हां रै खानदाना बै देणा, पर ऐई बौगत तौखै बोहू जाति रौहंदी लागी ती ते कनानी बोलिया ती ऐ कनानी लोका परमेश्वरा री आराधना नैंई केरदै ती होर तेइरा हुक्म नैंई मनदै ती ते झूठै देऊआ री पूजा केरा ती होर बोहू बुरै कोम केरा ती

परमेश्वरै इस्राएली लोका सैंघै बोलू, “ज़ैबै तुसै तेई वायदै रै देशा न जालै ता तौखलै सैभ कनानी न छुटकारा पाईत्। तिन्हां सैंघै मिलाप हेरी केरदै होर न ऐ ब्याह हरित केरदै। तुसा बै तिन्हरी सैभ मूर्ति पूरी तैरहा नाश केरनी पौई। अगर तुसै मेरा हुक्म नैंई मनलै ता, तैबै तुसा मेरी नैंई तिन्हरी पूजा केरनी शुरू केरनी।”

ज़ैबै इस्राएली लोका कनान देशा री सीमा न पूजै, ता मूसै इस्राएली रै हर गोत्रा मौंझ़ै न एक-एक केरिया बारा मर्द चुनै। तेइयै तिन्हां बै तेई देशा रा भेद लेणै री तैंईंयैं हुक्म धिना कि हेरलै कि सौ कैण्ढा देश सा। तिन्हां बै तिन्हां कनानी रा भी भेद लेणा ती कि ते ताकतवर ती या कमजोर ती।

तिन्हां बारा मर्दे पूरै कनान देशा न होइया चाल़ी रोज़ा री यात्रा केरी होर ते वापस आऐ तिन्हैं लोका बै दसु, “सौ देश उपजाऊ सा होर तौखै बोहू नाज़ होआ सा!” पर दस भेदीयै बोलू, “तिन्हरै नगर बोहू मजबूत सी होर ते लोका बोहू लौम्मे- चौड़ै सी! अगर आसै तिन्हां पैंधै हमला केरा सी , ता तिन्हां आसै पक्का हराणै होर आसा मकाणै”

छ़ेकै कालेब होर यहोशू होर दुई भेदियै बोलू, “ऐ सच़ सा कि कनानी लोका लौम्मै होर ताकतवर सी, पर पक्का आसा बै हराई सका सी! परमेश्वरा ऐ आसरी री तैंईंयैं लड़ना!”

पर लोकै कालेब होर यहोशू री नैंई शुणी ते मूसा होर हारूना पैंधै झिकूऐ होर बोलू, “तुसै आसै ऐसा खतरनाक ज़ैगा न किबै आंणै सी? आसा मिस्रा न ऐ रौहणा ती अगर आसै तेई देशा बैं जान्दै ता आसा युद्धा न मौरना, कनाना रै लोका आसरी लाड़ी होर शोहरू गुलाम बनाणै” ते लोका तिन्हां बै मिस्रा न वापस नेणै री तैंईंयैं एक होर अगुवै बै चुनना चाहा ती

ज़ैबै इन्हें लोकै ऐण्ढा बोलू ता परमेश्वर बोहू झिकुआ ती। सौ मिलाप आल़ै तौम्बू न आऊ होर बोलू, “तुसै मेरे खिलाफ़ विद्रोह केरू, तैबै तुसा बै ऐसा सुनसान ज़ैगा न भटकणा पौड़ना। हर एक मांहणु ज़ो बीह बौर्ष या तूंई न ज़ादा उम्रा रा सा तौखै मौरना होर कैधी भी तेई देशा न नैंई एज़ी सकदा। ज़ो हांऊँ तुसा बै देआ सा। सिर्फ कालेब होर यहोशू तेथा न एज़ी सका सा।”

ज़ैबै लोकै परमेश्वर ऐण्ढा केरदा शुणु, ता ते दुखी हुऐ किबैकि तिन्हैं पाप केरू ती। तैबै तिन्हैं कनाना रै लोका पैंधै हमला केरनै रा फैसला केरू। मूसै तिन्हां बै नैंई जाणै रा हुक्म धिना किबैकि परमेश्वरै तिन्हां सैंघै नैंई जाणै री तैंईंयैं चेताऊणी धिनी किबैकि परमेश्वरै तिन्हां बै बोलू ती कि नैंई जाणा, पर तिन्हैं तेइरी नैंई शुणी।

परमेश्वर ऐई युद्धा न तिन्हां सैंघै नैंई नौठा ती, तैबै कनानी लोकै ते हराऐ होर तिन्हां मौंझ़ै न बोहू मकाऐ। तैबै इस्राएली लोका कनाना न वापिस आऐ। आगलै चाल़ी बौर्षा तकर ते सुनसान ज़ैगा न औरै-पौरै भटकदै रौहै।

इस्राएली लोकै रै ज़रियै सुनसान ज़ैगा न भटकणै रै चाल़ी बौर्षा न, परमेश्वरै तिन्हरी ज़रूरत पूरी केरी। तेइयै तिन्हां बै स्वर्गा न “मन्ना” री रोटी धिनी। तेइयै तितरा रै छ़ुण्ड भी तिन्हरै डेरै न भेज़ै ताकि तिन्हां हागै खाणै री तैंईंयैं मांस होला। तेई पूरै बौगता न, परमेश्वरै तिन्हरै झिकड़ै होर बूट चुटणै न बचाऐ।

औखै तकर कि परमेश्वरै तिन्हरै पीणै री तैंईंयैं चमत्कार केरिया टोहली न पाणी खोलू। पर इन्हां सैभी रै बावजूद, इस्राएली लोकै परमेश्वरा रै खिलाफ़ होर मूसा रै खिलाफ़ शिकायत केरी होर कुड़कुड़ांदै लागै। तैबै भी परमेश्वर विश्वासयोग्य ती। तेइयै जो वायदा केरू ती कि सौ अब्राहम, इसाहक, होर याकूबा रै खानदाना री तैंईंयैं केरना, तेइयै सौ केरू।

एक होर बारी ज़ैबै तिन्हां लोका हागै पाणी नैंई ती ऑथि, परमेश्वरै मूसा बै बोलू, “टोलही सैंघै गैला केर, होर तुंई न पाणी निकलणा” पर मूसै टोलही सैंघै गैला नैंई केरी। पर तेइयै शोठी सैंघै दुई बारी मारी। ऐण्ढी तैरहा तेइयै परमेश्वरा रा निरादर केरू। सैभी री तैंईंयैं पीणै रा पाणी टोलही न ता निकता, पर परमेश्वर मूसा न झिकुआ। तेइयै बोलू, “किबैकि तैं ऐण्ढा केरू सा, तैबै तू वायदै रै देशा न नैंई जाई सकदा।”

ज़ैबै इस्राएली लोका चाल़ी बौर्षा तकर सुनसान ज़ैगा न भटकदै रोहै, तैबै तिन्हैं परमेश्वरा रै बिरोधा न विद्रोह केरू ती होर ते सैभ मूँऐ ती, तैबै परमेश्वरै लोका री अगुआई केरनै होर तिन्हरी मज़त केरनै री तैंईयैं यहोशू चुनू। परमेश्वरै मूसा सैंघै वायदा केरू ती कि एक रोज़ सौ तिन्हां लोका हागै मूसा सांही एक भविष्यवाणी केरनु आल़ा भेजणा।

तैबै परमेश्वरै मूसा बै एक ढौगै री चोटी पैंधै जाणै री तैंईंयैं बोलू ताकि सौ वेतनदै रै देशा बै हेरी सकला मूसै सौ वायदै रा देश हेरू पर परमेश्वरै तेइबै तेथा न जाणै रा हुक्म नैंई धिना तैबै मूसा मूँआ, होर इसराएली लोकै तीह रोज़ा तकर दुःख मनाऊ यहोशू तिन्हरा नोंऊँआ अगुवा बणु यहोशू तिन्हरा एक शोभला अगुवा ती किबैकि तेइयै परमेश्वरा पैंधै बशाह केरू होर तेइरी गैला मनी