13. इस्राएली लोका सैंघै परमेश्वरा रा वायदा

इस्राएली लोका बै लाल समुन्द्रा न पारै नेणै न बाद, परमेश्वरै ते सुनसान ज़ैगा न होईया सीनै ढौगा धिरिऐ नेऐ। ऐ सौऐ ढौग ती ज़ौखै मूसै फुकिदा लागादा झौकड़ हेरू ती। तिन्हें लोकै तेई ढौगा हेठै आपणै तौम्बू खड़ै केरै।

परमेश्वरै मूसा होर इस्राएली रै सेभी लोका सैंघै बोलू, “तुसा बै हमेशा मेरी गैला मनणी पौई होर ज़ो वायदा हांऊँ तुसा सैंघै केरा सा तुंई बै बणाईया रखेई। अगर तुसै ऐण्ढा केरा सी, ता तुसा मेरा ईनाम, कीमती धन, पुरोहिता रा राज्य, होर एक पवित्र जाति होंणा।”

परमेश्वरा रै ज़रियै तिन्हां हागै ऐणै री तैंईंयैं लोकै त्राई रोजा तकर आपु बै त्यार केरू। तैबै परमेश्वर सीनै ढौगा री चोटी न बुनै ओसू। ज़ैबै सौ आऊ ता, जौजरी हुई, बिजली चमकी, धूँआ उठू, रही री जोरै सैंघै आव़ाज हुई। तैबै मूसा आपू ढौगा पैंधै च़ढ़ू।

तैबै परमेश्वरै लोका सैंघै एक वायदा केरू। तेइयै बोलू, “हांऊँ तुसरा परमेश्वर, प्रभु सा। ज़ुणियै तुसै मिस्रा री गुलामी न छ़ड़ाऐ। कौसी होरी देऊआ री पूजा हेरित् केरदै।”

“मूर्ति हेरित् बणादै होर तिन्हरी पूजा हेरित् केरदै, किबैकि हाँऊँ प्रभु सा, तुसरा एकै परमेश्वर सा। गलत रीति सैंघै मेरे नाँ रा इस्तेमाल हेरित् केरदै। बशाँ रा ध्याड़ा मनणै री तैंईंयैं याद रखेईत्। छौ रोजा न आपणै सारै कोम केरेईत्, सौतुआ रोज़ तुसरी तैंईंयैं बशाँ केरनै होर मुँभै याद केरनै रा ध्याड़ा सा।”

“आपणै आमा बापू रा आदर केरना। हत्या हेरित् केरदै। व्यभिचार हेरित् केरदै। चोरी हेरित् केरदै, आपणै पड़ेशी री लाड़ी, तेई रै घौर, या तेइरै कौसी घौरा, या तेइरै कौसी भी चीजा नेणै री इच्छा हेरी केरदै।”

तैबै परमेश्वरै ते दस हुक्म पात्थरा री दुई पौटी न लिखिया मूसा बै धिनी। परमेश्वरै लोका बै मनणै री तैंईंयैं होर बिधान धिनै। अगर तिन्हैं इन्हां बिधाना रा पालन केरू ता परमेश्वरै तिन्हां लोका बै आशीष देणै होर तिन्हरी सुरक्षा केरनै रा वायदा केरू। पर तेइयै बोलू अगर ते इन्हरा पालन नैंई केरलै ता तेई तिन्हां बै सज़ा देणी।

परमेश्वरै इस्राएली लोका बै एक बड़ा तौम्बू बनाणै बै बोलू, मिलाप आल़ा तौम्बू। तिन्हैं तिन्हां बै ठीक-ठीक दसु कि ऐ तौम्बू कैण्ढै बनाणा, होर तेई आँध्रै कि-कि चीजा रखणी। तेइयै तिन्हां बै तेई तौम्बू रै दुई कमरै न बौंडणै री तैंईंयैं एक बड़ै पर्दे बै बनाणै री तैंईंयैं बोलू। परमेश्वरा तेई पर्दे रै पिछलै कमरै न ऐणा होर तौखै रौहणा। ज़ौखै परमेश्वर ती तेई कमरे बै जाणै रा हुक्म सिर्फ महापुरोहिता बै ती

तिन्हां लोका बै तेई मिलाप आल़ै तौम्बू रै सामनै एक वेदी बनाणी पौड़नी। कोई भी जो परमेश्वरा रै बिधाना बै नैंई मनदै सौ तेसा वेदी पैंधै एक पशु बै लेइया आंणै। तैबै पुरोहिता सौ बौलि केरनी होर वेदी पैंधै परमेश्वरा री तैंईंयै बौलि रै रूपा न फुकला। परमेश्वरै बोलू कि तेई पशु लोहू सैंघै तेई मांहणु रै पाप खौटणै। ऐण्ढी तैरहा परमेश्वरा ऐबै सौ पाप नैंई हेरना तिन्हा मांहणु परमेश्वरा री ज़री न “च़ोखै” होंणा। परमेश्वरै मूसा रा भाई हारूना होर तेइरै खानदान पुरोहित होंणै री तैंईंयैं चुनू सा।

परमेश्वरै तिन्हां लोका बै ज़ो नियम धिनै ती ते तिन्हरा पालन केरनै री तैंईंयैं सहमत हुऐ| ते सिर्फ परमेश्वरा रै लोका होंणै री तैंईंयैं होर सिर्फ तेइरी आराधना केरनै री तैंईंयैं सहमत हुऐ|

कई रोजा तकर मूसा सीनै ढौगा री चोटी पैंधै रौहू। परमेश्वरा सैंघै गैला केरदा लागा ती। पर लोका तिन्हरा वापस ऐणै रा इन्तजार केरदै-केरदै थकै। तैबै ते हारूना हागै सूना लेइया आऐ होर मूर्ति बनाणै री तैंईंयैं बोलू ताकि ते परमेश्वरा रै बजाय तेइरी आराधना केरी सकलै। ऐण्ढी तैरहा तिन्हैं भयंकर रूपा सैंघै परमेश्वरा रै खिलाफ पाप केरू।

हारूनै बौछू रै रूपा न सूनै री एक मूर्ति बणाई। तिन्हैं लोकै तेसा मूर्ति री पूजा केरनी शुरू केरी होर तेसा बै बौलि च़ढ़ाई! तिन्हरै पापै री बजहा न परमेश्वर तिन्हां सैंघै बोहू झिकूआ ती। सौ तिन्हां बे नाश केरना चाहा ती। पर मूसै परमेश्वरा सैंघै अर्ज़ केरी परमेश्वरै तेइरी अर्ज शुणी होर सौ नाश नैंई केरू।

तैबै मूसा सीनै ढौगा न बुनै औसू। सौ तिन्हां दुई पात्थरा री पौटी बै लेऐ दै ती ज़ुणी पैंधै परमेश्वरै दस हुक्म लिखै ती। फिरी तेइयै सौ मूर्ति हेरी। सौ ऐतरा झिकूआ कि तेइयै सौ पौटी चकनाचूर केरी।

फिरी मूसै सौ मूर्ति पिशिया तेसा रा बुरा बणाऊ, होर सौ बुरा पाणी न मिलाईया तिन्हा लोका बै पियाऊ परमेश्वरै तिन्हां लोका पैंधै एक विपति भेजी होर तिन्हां मौंझ़ै न बोहू लोका मूँऐ।

ज़ो पौटी मूसै चोड़ी ती तिन्हरी ज़ैगा लेणै री तैंईंयैं मूसै ते दस हुक्म पात्थरै री नौउँई पौटी बणाई। तैबै सौ दबारा ढौगा पैंधै च़ढ़ू होर प्रार्थना केरी कि परमेश्वर तिन्हां लोका बै माफ केरै। परमेश्वरै मूसा री शुणी होर तेआ माफ़ केरै। नौंऊई पौटी न दस हुक्म लेइया मूसा ढौगा न बूनै औसू। तैबै परमेश्वरै सीनै ढौगा न लेइया वायदै रै देशा तकर इस्राएली री अगुवाई केरी।