12. मिस्रा न निकल़ना

इस्राएली लोका मिस्र देशा न निकलिया बोहू खुश ती। ते ऐबै दास नैंई ती औथि, होर ते वायदै बै जांदै लागै ती! ज़ो किछ़ भी इस्राएली लोकै मौंगू, मिस्री लोकै तिन्हां बै सैभ किछ़ धिना, औखै तकर कि सूना च़ाँदी होर कीमती चीज़ा। होरी देशा रै किछ़ लोकै परमेश्वरा पैंधै बशाह केरू होर ज़ैबै इस्राएली लोका मिस्रा न निकतै ता ते भी तिन्हां सैंघै चलै।

ध्याड़ी रै बौक्तै एक बड़ा बादल़ा रा थौम्बा तिन्हां रै आगै-आगै च़लु। होर राती रै बौक्तै एक औगी रा थौम्बा बणु। परमेश्वर ज़ो कि तेई बादला रै थौम्बै न ती, हमेशा तिन्हां सैंघै ती होर तेइयै यात्रा केरदी घेरै तिन्हरी अगुवाई केरी। तिन्हां बै सिर्फ ऐतरा केरना ती कि तेई पिछ़ै च़लै।

थोड़ै बौक्ता न बाद, फिरौन होर तेइरै लोकै आपणा मन बदलू। ते इस्राएली लोका बै दबारा आपणा दास बनाणा चाहा ती। तैबै तिन्हैं इस्राएली लोका रा पीछा केरू। ऐ परमेशरै ती ज़ुणियै तिन्हरा मन बदलू ती। तेइयै ऐण्ढा तैबै केरू किबैकि सौ हा ती कि फिरौन ऐ जाणला कि परमेश्वरै ए इस्राइली धिरीए न लड़ीदा लागा सा।

ज़ैबै इस्राएली लोकै मिस्रै री सैना ऐन्दी हेरी ता तिन्हां बै पता लागा कि ते फ़िरौना री सैना लाल समुन्द्रा रै बीचा न फसै। ते बोहू डौरै होर रोंदै लागै, “आसै मिस्र देश किबै छौड़ू? आसै मौरनु आल़ै सी!”

मूसै इस्राएली लोकै बै बोलू, “मौत डौरदै! परमेश्वरा औज़ तुसरी तैंईंयैं लड़ना होर तुसै बच़ाणै।” तैबै परमेश्वरै मूसा बै बोलू, “इन्हां लोका बै लाल समुन्द्रा धिरिऐ आगै बढ़नै बै बोल।”

तैबै परमेश्वरै तेई बादल़ा रा थौम्बा लेइया इस्राएली होर मिस्री लोकै रै बीचा न रखु कि मिस्री लोका इस्राएली बै हेरी नैंई सकलै।

परमेश्वरै मूसा बै समुन्द्रा पैंधै आपणा हौथ बढ़ाणै री तैंईंयैं बोलू। फिरी परमेश्वरै बागरी सैंघै समुन्द्रा रा पाणी बाऊँई होर दैहिणै धिरिऐ कराऊ, ज़ुणी सैंघै समुन्द्रा न होइया एक बौत बणी

इस्राएली लोका आपणै दुई पासै री दीवारा सैंघै शुकी धौरती पैंधै समुन्द्रा न होईया च़लै

तैबै परमेश्वरै तेसा बौता न बादल हटाऊ ताकि मिस्री लोका इस्राएली लोका बै बच़िया जांदैआ हेरलै। मिस्री लोकै तिन्हां बै ढौकणै री तैंईंयैं तिन्हरा पिछा केरनै रा फैसला केरू।

तैबै तिन्हैं समुन्द्रा रै ज़रियै तेसा बौता पैंधै इस्राएली लोका रा पिछा केरू, पर परमेश्वरै मिस्री लोका घबराऐ होर तिन्हरै रौथ अटकाऐ। ते चिखदै लागै, “भगा! इस्राएली धिरिऐ न परमेश्वर लड़दा लागा सा!”

सारै इस्राएली लोका समुन्द्रा रै दुज़ै पासै पूजै। तैबै परमेश्वरै मूसा सैंघै बोलू कि सौ दबारा पाणी पैंधै हौथ बढ़ाला ज़ैबै मूसै ऐण्ढा केरू, ता पाणी मिस्री सैना पैंधै आऊ होर पाणी आपणी स्थिति न हुआ। सारी मिस्री सैना पाणी न डूबी।

ज़ैबै इस्राएली लोकै हेरू कि मिस्री लोका मुँऐं ती ता तिन्हैं परमेश्वरा पैंधै बशाह केरू। तिन्हैं बशाह केरू कि मूसा परमेश्वरा धिरिऐ न भविष्यवाणी केरनु आल़ा ती।

इस्राएली लोका तैबै भी बोहू खुश ती किबैकि परमेश्वरै ते मौरनै न होर गुलाम होंणै न बचाऐ ती। ऐबै ते परमेश्वरा री आराधना केरनै होर तेइरा हुक्म मनणै री तैंईंयैं आज़ाद ती। इस्राएली लोकै आज़ादी रा त्यौहार मनाणै री तैंईंयैं होर परमेश्वरा री सराऊथि केरनै री तैंईंयैं कई गाणै लाऐ किबैकि तेइयै ते मिस्री लोकै री सैना न बचाए ती।

परमेश्वरै इस्राएली लोका बै हर बौर्ष एक त्यौहार मनणै रा हुक्म धिना ऐ याद केरनै री तैंईंयैं कि कैण्ढै परमेश्वरै मिस्री लोका हराऐ होर ते दास होंणै न आज़ाद केरै। ऐ फसहा रा त्यौहार कहलाईया ती। एथा न तिन्हां बै त्यौहार मनाणै री तैंईंयैं एक शोभला मेमणु बौलि केरना ती, सौ भुनणा ती, होर सौ बिना मलेड़े री रोटी सैंघै खाणा ती।