11. फसह रा त्यौहार

परमेश्वरै मूसा फिरौना हागै ऐ बोलणै री तैंईंयैं भेजू कि इस्राएली लोका बै जाणै दै। तिन्हैं तेइबै चिताऊणी धिनी कि अगर कोई तिन्हां बै जाणै नैंई देला. ता परमेश्वरा मिस्रा रै लोका होर पशु रै सैभ पैहलै शोहरू मकाणै। फिरौनै ऐ शुणिया भी रमेश्वरा पैंधै बशाह केरनै न होर तेइरी गैल मनणै न नाँह केरू।

परमेश्वरै तेई पैंधै कौसी रै भी पहलौठै शोहरू बै बचाणै री तैंईंयैं एक तरकीबै रा इंतजाम केरू। हर टबरा बै एक निर्दोष मेमणै बै लेइया तेइरी बौलि देणी ती।

परमेश्वरै इस्राएली लोका बै तेई मेमणै रै लोहू बै लेइया आपणै घौरा रै द्वारा पैंधै लाणै री तैंईंयैं बोलू। तिन्हां बै तेइरा मांस भूनणा ती होर फिरी तिन्हां बै बगैर मलेड़े री रोटी सैंघै सौ छ़ेकै खाणा ती। तेइयै तेई खाणै न बाद छ़ेकै मिस्र छौड़नै बै भी त्यार रौहणै बै बोलू।

ज़ैण्ढा केरनै री तैंईंयैं परमेश्वरै इस्राएली लोका बै हुक्म धिना ती। औधी राती न, परमेश्वर सैभी रै पैहलै शोहरू बै मकांदैआ मिस्र देशा न होईया नौठा।

इस्राएली लोकै रै हर घौरा रै दुआरा पैंधै लोहू लागादा ती, तैबै परमेश्वरै ते घौर छौड़ै। तिन्हां घौरा रै आँध्रलै लोका बच़ेदै ती। ते मेमणै रै लोहू री बजहा न बचे ती।

पर मिस्री लोकै परमेश्वरा पैंधै बशाह नैंई केरू ती होर तेइरा हुक्म नैंई मनु ती। तैबै परमेश्वरै तिन्हरै घौर नैंई छौड़ै। परमेश्वरै मिस्री लोका रै हर ज़ेठै शोहरू मकाऐ।

कैदखानै न कैदी रै ज़ेठै न लेईया, फिरौना रै ज़ेठै तकर, हर ज़ेठा शोहरू मुँआ| दुखा री बजहा न मिस्र देशा रै बोहू लोका रोंदै लागै ती।

तेसा राती, फिरौनै मूसा होर हारून शाधै होर बोलू, “इस्राएली लोका बै लेईया छ़ेकै मिस्र देशा न निकल़ा।” मिस्री लोकै भी इस्राएली लोका बै छ़ेकै जाणै री अर्ज़ केरी।