34. होरी कहाणी री शिक्षा

यीशुऐ परमेश्वरा रै राज्य रै बारै न होर बोहू कहाणी शुणाई। उदाहरणा री तैंईंयैं तेइयै बोलू, “परमेश्वरा रा राज्य एक राई रै बेज़ै सांही सा ज़ो कौसियै आपणै छेता न बाहू। तुसै जाणा सी कि राई रा बेजा सारै बेज़ै मौंझ़ै न सैभी न होछ़ा सा।”

“पर ज़ैबै राई रा बेज़ा बढ़ा सा ता सौ बगीच़ै रै सारै बूटै न सैभी न बड़ा होआ सा, एतरा बड़ा होआ सा चीड़ू एज़िया तेइरी शांहणी पैंधै बशाँ केरा सी।”

यीशुऐ एक होर कहाणी दसी, “परमेश्वरा रा राज्य मलेड़े सांही सा ज़ुणिबै लेइया एक बेटड़ी पिठै न मुछ़ा सा तैबै सौ सारा पिठा मलेड़िया सा।”

“स्वर्गा रा राज्य तेई खजानै सांही सा ज़ो कौसी मांहणुऐ छेता न गज़िआऊ। कौसी होरी मांहणु बै सौ खजाना मिलू होर तेइयै तेइबै पाणै री बोहू इच्छा केरी। तैबै तेइयै सौ दबारा पौथू। सौ खुशी सैंघै एतरा भौरूआदा ती कि तेइयै जाइया आपणा सैभ किछ़ बेचू ताकि सौ तेई छेता बै कीमतियै लेई सकै ज़ौखै सौ खज़ाना ती।”

“स्वर्गा रा राज्य एक बोहू कीमती च़ोखै मोती सांही भी सा। ज़ैबै कोई मोती रा व्यापारी तेइबै पा सा ता सौ तेइबै लेणै री तैंईंयैं आपणा सैभ किछ देआ सा।”

तौखै किछ़ लोका ती ज़ो ऐ सोचा ती कि परमेश्वरा ते स्वीकार केरनै किबैकि ते भलै कोम केरदै लागै सी। ऐ लोका ऐण्ढै लोका बै तुच्छ जाणा ती ज़ो तिन्हां भलै कोमा बै नैंई ती करदै। तैबै यीशुऐ तिन्हां बै ऐ कहाणी दसी, “दुई मांहणु ती दुऐ प्रार्थना केरनै री तैंईंयैं मन्दिरा बै नौठै। तिन्हां मौंझ़ै न एक चुंगी लेणु आल़ा ती, होर दुजा एक धार्मिक अगुवा ती।”

“तेई धार्मिक अगुवै ऐण्ढी तैरहा प्रार्थना केरी, ‘ओ परमेश्वर, तेरा धन्यवाद हुआ लोड़ी हुआ कि हांऊँ होरी लोका सांही ज़ैण्ढै कि डाकू, साही न्याय नैंई केरनु आल़ै मांहणु, व्यभिचारी, औखै तकर कि औखै मौजुद तेई चुंगी लेणु आल़ै सांही एक पापी नैंई ऑथि।”

“उदाहरणै री तैंईंयैं, हांऊँ हफ्ते न ब्रत रखा सा होर हाँऊ आपणै खज़ानै न दसुवां हिस्सा तौभै देआ सा।”

“पर सौ चुंगी लेणु आल़ा तेई धार्मिक अगुवै सैंघै बोहू दूर खड़ा हुआ। तेइयै स्वर्गा धिरिऐ औछी भी नैंई च़की,होर बोलु ‘ओ परमेश्वर, जिबाण केरिया मुँ पैंधै दया केर किबैकि हांऊँ एक पापी सा।’”

फिरी यीशुऐ बोलू, “हांऊँ तुसा सैंघै सच़ बोला सा, परमेश्वरै तेई चुंगी लेणु आल़ै री प्रार्थना शुणी होर सौ धर्मी ठहराऊ। पर तेइयै तेई धार्मिक अगुवै री प्रार्थना नैंई शुणी। परमेश्वर हर घमण्डी मांहणु री मुँडी निष्टि केरा सा, पर सौ हर मांहणु बै आदर देआ सा ज़ो आपु बै दीन केरा सी।