35. दयालु बापू री कहाणी

एक रोज़, यीशु तिन्हां बोहू बै शिक्षा देंदा लागा ती ज़ो तेइरी शुणनै री तैंईंयैं कठै हुऐ ती। ऐ लोका चुंगी लेणु आल़ै होर सैंघै दूजै लोका भी ती ज़ुणियै मूसा रा बिधान मनणै री कोशिश नैंई केरी ती।

किछ़ धार्मिक अगुवै हेरू कि यीशु इन्हां लोका सैंघै एक सैंघी सांही गैला केरदा लागा ती। तैबै यीशुऐ ते गैला केरदै शुणै, तैबै तेइयै तिन्हां बै ऐ कहाणी दसी।

“एक मांहणु ती ज़ुणिरै दुई बेटै ती। होछ़ै बेटै आपणै बापू बै बोलू, ‘ओ बापू, मुँभै मेरा हिस्सा लोड़ी!’ तैबै बापूऐ आपणै दुऐ बेटै रै बिचा न आपणी धन-दौलता रा बंटवारा केरू।”

“छ़ेकै होछा बेटा आपणा सैभ किछ. कठा केरिया दूर देशा बै नौठा होर पापी ज़िन्दगी जिणै री तैंईंयैं आपणा सारा धन बर्वाद केरू।”

“एथा न बाद, ज़ौखै होछा बेटा ती तेई देशा न एक भयंकर अकाल पौड़ू, होर तेई हागै खाँणा लेणै री तैंईंयैं ढैबुऐ नैंई ती ऑथि। तैबै तेइयै ज़ो कोम मिलूसौ सुंगरा बै चारनै रा ती। सौ एतरा दुखी होर भूखा ती कि सौ सुंगरा रा चारा खाँणा चाहा ती।”

“आखिरकार तेई होछ़ै बेटै आपु न बोलू, ‘हांऊँ कि केरनु? मेरे बापू रै सैभ नौकरा हागै खाँणै बै बोहू सा, फिरी भी हांऊँ औखै भूखा मौरदा लागा सा। मुँ आपणै बापू हागै वापस जाणा होर आपणै बापू रा एक नौकर बणनै री तकर तेईन अर्ज़ केरनी।’”

“तैबै तेई होछ़ै बेटै आपणै घौरा धिरिऐ जाणा शुरू केरू। ज़ैबैकि सौ हाज़ी दूरै ती, तेइरै बापूऐ हेरू होर तेई पैंधै तरस खाऊ। सौ दौड़िया आपणै बेटै हागै नौठा होर तेइबै गौल़ै लाइया मांकी धिनी।”

“तेई बेटै बोलू, ‘ओ बापू जी, मैं परमेश्वर होर तेरै खिलाफ पाप केरू सा। हांऊँ तेरा बेटा कहलाणै रै लायक नैंई ऑथि।’”

“पर बापूऐ आपणै एक दासा सैंघै बोलू, ‘छेकै जाईया सैभी न शोभलै टोहलै लेइया आंणा होर मेरै बेटै बै लात्! तेइरी गुठी न मुंदरी होर तेइरी जौंघा न बूट लात्। तैबै सैभी न शोभला बौकरा मारा ताकि आसै खालै होर त्यौहार मनालै, किबैकि मेरा बेटा मुँआ ती, पर ऐबै सौ ज़िन्दा सा! सौ राहुआ ती, पर ऐबै आसा बै मिलू सा!”

“तैबै लोकै त्यौहार मनाणा शुरू केरू। किछ़ रोज़ा बाद, बड़ा बेटा छेता न कोम केरिया आऊ। तेइयै नौच़णै होर गाणै री आवाज़ शुणी होर हैरान हुआ कि ऐ कि होंदा लागा सा।”

“ज़ैबै बड़े बेटै बै पता लागा कि ते तैबै त्यौहार मनांदै लागै ती किबैकि तेइरा भाई घौरा आऊ ती, ता सौ झिकुआ होर घौरा नैंई आऊ। तेइरै बापूऐ बाहरै एज़िया तेइबै तिन्हां सैंघै त्यौहार मनाणै री अर्ज़ केरी, पर तेइयै नाँह केरू।”

“तेई बड़े बेटै आपणै बापू सैंघै बोलू, ‘एतरै बौर्षा न मैं तेरी तैंईंयैं इमानदारी सैंघै कोम केरू! कैधी तेरी गैल नैंई टाली, पर तैं कैधी मुँभै एक होछ़ा गोभू भी नैंई धिना ताकि हांऊँ आपणै सैंघी सैंघै धाम केरदा। पर तेरे ऐई बेटै तेरा धन पापा रै कोमा न बर्वाद केरू। होर ऐबै ज़ैबै सौ आऊ ती ता तेइरी तैंईंयैं त्यौहार मनाणै री तैंइयैं सैभी न शोभला बौकरा काटू!’”

“बापूऐ ज़वाब धिना, ‘ओ मेरै बेटैआ, तू हमेशा मूँ सैंघै सा, होर ज़ो किछ़ मेरा सा सौ सैभ तेरा सा। पर आसा री तैंईंयैं त्यौहार मनाणा सही सा किबैकि तेरा भाई मुँआ ती, पर ऐबै सौ जिन्दा सा। सौ राहुआ ती, पर ऐबै सौ आसा बै मिलू सा!’”