36. रूप बदलना

एक रोज़, यीशुऐ आपणै त्राई चेले, पतरस, याकूब होर यूहन्ना आपु सैंघै नेऐ (ऐ युहन्ना नाँ रा चेला सौ मांहणु नैंई ऑथि ज़ुणियै यीशु बै बप्तिस्मा धिना ती।) ते प्रार्थना केरदै एक उथड़ी ज़ैगा पैंधै नौठै।

ज़ैबै यीशु प्रार्थना केरदा लागा ती ता तेइरा मुँह सूरजा सांही प्याशा हुआ। सौ प्याशै सांही शेता हुआ, ज़ैण्ढा धौरती पैंधै कोई केरी सकलै तेइन भी बढ़ी केरिया शेता।

तैबै मूसा होर एलिय्याह भविष्यवाणी केरनु आल़ै प्रगट हुऐ। ऐ मांहणु एसा धौरती पैंधै सैंकड़ों बौर्ष पैहलै रौहा केरा ती, तिन्हैं यीशु री मौऊती रै बारै न गैला केरी ती, किबैकि तेई छ़ेकै यरूशलेमा न मौरना।

ज़ैबै मूसा होर एलिय्याह यीशु सैंघै गैला केरदै लागै ती, तैबै पतरसै यीशु सैंघै बोलू, “आसरा औखै होंणा सही सा। आसा त्राई मंडप बनाणै, एक तेरी तैंईंयैं, एक मूसा री तैंईंयैं, होर एक एलिय्याह री तैंईंयैं।” पर पतरस नैंई जाणदा ती कि सौ कि केरदा लागा सा।

ज़ैबै पतरस गैला केरदा लागा ती, एक चमत्कारी बादलै एज़ियै ते खौटै। फिरी तिन्हैं बादला न एक आवाज़ शुणी। तेइयै बोलू, “ऐ मेरा प्यारा बेटा सा ज़ुणी सैंघै हांऊँ झ़ुरी केरा सा। हांऊँ तेईन खुश सा। तेइरी शुणा।” ते त्राई चेले डौरै होर मूसा धौरती पैंधै लेटू।

तैबै यीशुऐ ते छ़ुँगै होर बोलू, “मौता डौरदै। खड़ै उठा।” ज़ैबै तिन्हैं चौऊ पासै हेरू, ता ज़ो भी तौखै ती, सिर्फ यीशु ती।

यीशु होर ते त्राऐ चेले तेई ढौगा पैंधै न वापस बुनै ओसै। तैबै यीशुऐ बोलू, “ऐबै ज़ो किछ़ औखै हुआ तेइरी चर्चा कौसी सैंघै हेरित केरदै। मुँ छ़ेकै मौरना होर फिरी जिन्दै होंणा। तेथा न बाद तुसै लोका बै दसी सका सी।”