37. यीशु लाजरा बै मूँऐंदै न जिन्दा केरा सा

लाज़र नाँ रा एक मांहणु ती। तेइरी दुई बैहणी ती ज़ुणिरै नाँ मरियम होर मार्था ती। ते सैभ यीशु रै गैहरै सैंघी ती। एक रोज़ कौसियै यीशु बै बोलू कि, लाजर बोहू बीमार ती। ज़ैबै यीशुऐ ऐ शुणु ता तेइयै बोलू, “ऐ बीमारी लाजरा रै मौरनै सैंघै खत्म नैंई होंणी। एथा रै बजाय, इन्हां लोका बै परमेश्वरा रा आदर केरनै री तैंईंयैं उत्साहित केरना पौड़ू।”

यीशु आपणै सैंघी सैंघै झ़ुरी केरा ती, पर ज़ौखै सौ ती तौखै तेईए दुई रोज़ा तकर इन्तजार केरू। तिन्हां दुई रोजा बाद, तेइयै आपणै चेले सैंघै बोलू, “एज़ा आसा यहूदिया बै जाणा” च़ेले ज़वाब धिना, “पर ओ गुरू जी, ऐबै किछ़ रोज़ा पैहलै तौखलै लोका तौभै मारना चाहा ती!” यीशुऐ बोलू, “आसरा सैंघी लाजर सुता सा, होर मुँ सौ च़कणा सा।”

यीशुऐ चेले बै ज़वाब धिना, “ओ प्रभु, अगर लाजर सोंदा लागा सा, ता तेई ठीक होंणा।” तैबै यीशुऐ स्पष्ट रूपा न बोलू, “लाजर मुँआ सा। हांऊँ खुश सा कि हांऊँ तौखै नैंई ती, ताकि तुसै मुँ पैंधै बशाह केरी सकलै।”

ज़ैबै यीशु लाजरा रै ग्राँ न पुजू ता लाजरा बै मुँऐंदै चार रोज़ हुऐ ती। मार्था यीशु सैंघै मिलनै री तैंईंयैं बाहरै आई होर बोलू, “ओ प्रभु, अगर तू औखै होंदा ता मेरा भाई नैंई मौरदा। पर हांऊँ बशाह केरा सा कि ज़ो किछ़ भी तौ परमेश्वरा न मुँगणा तेई तौभै देणा।”

यीशुऐ ज़वाब धिना, “तेई दबारा जिन्दै होंणा होर ज़िन्दगी हांऊँ सा। ज़ो कोई मुँ पैंधै बशाह केरा सा अगर सौ मौरला भी तैबै भी जिन्दै होंणा। ज़ो कोई मुँ पैंधै बशाह केरा सा तेई कैधी भी नैंई मौरना। कि तू मुँ पैंधै बशाह केरा सा?” मार्थे ज़वाब धिना, “ओ प्रभु हांऊँ बशाह केरा सा कि तू परमेश्वरा रा बेटा मसीह सा।”

तैबै मरियम आई। तेसै यीशु री जौंघा पैंधै टुँबड़ै पौड़िया बोलू, “ओ प्रभु, अगर तू औखै होंदा ता मेरा भाई नैंई मौरदा।” यीशुऐ पुछू, “तुसै लाजर कौखै रखु सा? तिन्हैं दसु, “कब्रा न। एज़ा होर हेर।” तैबै यीशु रोंदा लागा।

सौ कब्र एक गुफा ती ज़ुणिरै दुआरा पैंधै एक पात्थर डाहऊदा ती| ज़ैबै यीशु कब्रा न पुजू ता तेइयै बोलू, “पात्थरा बै हटात्” पर मार्थे बोलू, “तेइबै मौरिया चार रोज़ हुऐ सी। तेइन बास पौईदी होली।”

यीशुऐ ज़वाब धिना, “कि मैं तुसा सैंघै नैंई बोलू ती कि अगर तुसै मुँ पैंधै बशाह केरलै ता परमेश्वरै री सामर्थ हेरनी?” तैबै तिन्हैं पात्थर हटाऊ।

तैबै यीशुऐ स्वर्गा धिरिऐ एज़िया बोलू, “ओ बापू। जी, मेरी अर्ज़ शुणनै री तैंईंयैं हांऊँ तेरा धन्यवाद केरा सा। हांऊँ जाणा सा कि तू हमेशा मेरी शुणा सा, पर मैं औखै इन्हां सैभ लोका री मज़त केरनै री तैंईंयैं बोलू ताकि ऐ बशाह केरलै कि तैं हांऊँ भेजू सा।” तैबै यीशुऐ हाक पाई, “ओ लाजर, बाहरै एज़!”

तैबै लाजर बाहरै निकता!सौ हाज़ी भी टौलै न लपेटूआदा ती। “यीशुए बोलू, “ऐई टौलै बै खोलणै न तेइरी मज़त केरा होर तेइबै आजाद केरा” ऐई चमत्कारा री बजहा न यहूदी लोकै यीशु मसीह पैंधै बशाह केरू।

पर यहूदी लोका रै धार्मिक अगुवै यीशु सैंघै जलन केरदै लागै, तैबै ते तरकीब बनाणै री तैंईंयै सैभै ए कठा हुऐ कि कैण्ढी तरह यीशु होर लाजर मकाणै।