38. जैबै यीशु बै ढौका सी

हर बौर्ष यहूदी लोका फसह रा त्यौहार मना ती। ऐ ऊँईरै बारै न एक त्यौहार ती कि बौर्ष पैहलै परमेश्वरै तिन्हरै बुज़ुर्ग मिस्रा री गुलामी न छुड़ाऐ ती। लगभग त्राई बौर्षा बाद यीशुऐ लोका बै प्रचार केरना होर शिक्षा देणा शुरू केरू। यीशुऐ आपणै चेले बै दसु कि सौ तिन्हां सैंघै यरूशलेमा न फसह रा त्यौहार मनाणा चाहा सा, होर ऐ भी कि तौखै सौ मारना

यीशु रै चेले मौंझ़ै न एक यहूदा नाँ रा मांहणु ती। यहूदा चेले न ढैबुऐ रखणै री थैली रखणै रा कोम केरा ती, पर सौ हमेशा तेसा थैली मौंझ़ै न ढैबुऐ खोला ती। यीशु होर चेले रै यरूशलेमा न पूजणै न बाद यहूदा यहूदी अगुवै हागै नौठा। तेइयै ढैबुऐ रै बदलै यीशु बै तिन्हरै हौथा न ढौकणै रा प्रस्ताव रखु। सौ जाणा ती कि यहूदी अगुवै नैंई मनदै ती कि यीशु ऐ मसीह ती कि ते तेइबै मकाणा चाहा ती।

महापुरोहिता रै बोलणै पैंधै यहूदी अगुवै यीशु बै तिन्हरै हौथा न ढौकणै री तैंईंयैं यहूदा बै तीह चाँदी रै सिक्कै धिनै। सौ यीशु बै ढौकणै न तिन्हरी मज़त केरनै री तैंईंयैं कौसी मौकै री खोज केरदा लागा।

यरूशलेमा न, यीशुऐ आपणै चेले सैंघै फसह रा त्यौहार मनाऊ। फसह रै भोजे रै बौगत, यीशुऐ रोटी लेइया चोड़ी। तेइयै बोलू, “ऊँईबै लेआ होर खात। ऐ मेरा शरीर सा ज़ो हांऊँ तुसा री तैंईंयैं देआ सा। ऊँईंबै मेरी यादा री तैंईंयैं केरदै रौहित।” ऐण्ढी तैरहा, यीशुऐ बोलू कि तेई तिन्हंरी तैंईंयैं मौरना, तिन्हंरी तैंईंयैं तेई आपणा शरीर बौलि च़ढ़ाणा।

फिरी यीशुऐ अँगूरा रै रसा रा एक प्याला लेऊ होर बोलू, “ऊँईबै पियात् ऐ नोंऊँऐ वायदै रा लोहू सा ज़ो कि मुँ पेरना ताकि परमेश्वर तुसाबै माफ केरला। हर बारी ऊँईबै पिंदै घेरै मेरी यादी न ऐण्ढा केरदै रौहित ज़ो हांऊँ ऐबै केरदा लागा सा।”

तैबै यीशुऐ आपणै चेले सैंघै बोलू, “तुसा मौंझ़ै न एकी मांहणु हांऊँ ढौकणै ध्याणा।” चेले हैरान हुऐ, होर पूछदै लागै कि कुणी ऐण्ढा कोम केरना। यीशुऐ बोलू, “मेरा ढौकणु आल़ा मांहणु तेई होंणा ज़ुणिबै मुँ रोटी रा टुकड़ा देणा।” तैबै तेइयै रोटी यहूदा बै धिनी।

तेसा रोटी बै लेणै न बाद, यहूदा न शैतान आऊ। यहूदा निकलिया यीशु बै ढौकणै री तैंईंयैं यहूदी अगुवे री मज़त केरदा नौठा। ऐ राती रा बौगत ती।

खाँणै न बाद, यीशु होर तेइरै चेले जैतूना रै ढौगा बै नौठै। यीशुऐ बोलू, “तुसा सैभिऐ औज़ राती हांऊँ छौड़ना सा। ऐ लिखूदा सा, मुँ फुआल मारना होर सारी भेड़ा तितर-बितर होंणा।’”

पतरसै ज़वाब धिना, “भलै चाहै बाकी सैभ छौड़लै, मुँ तू नैंई छौड़ना!” तैबै यीशुऐ पतरसा बै बोलू, “शैतान तुसा सैभी बै लेणा चाहा सा, पर ओ पतरस, मैं तेरी तैंईंयैं प्रार्थना केरी सा कि तू बशाह न पिछै नैंई लोड़ी हुआ। तैबै भी, औज़ की रात, मुर्गे रै बाशणै न पैहलै तौ त्राई बार मेरा नाँह केरना कि तू मुँभै जाणदा भी नैंई।”

पतरसै यीशु बै बोलू, “भलै हांऊँ मौरनु, मुँ कैधी भी तेरा नाँ नैंई केरना!”होरी चेले भी ऐण्ढाऐ बोलू।

तैबै यीशु आपणै चेले सैंघै गतसमनी नाँ री ज़ैगा बै नौठा। यीशुऐ आपणै चेले सैंघै प्रार्थना केरने री तैंईंयैं बोलू ताकि शैतान तिन्हरी परीक्षा नैंई केरी सकला। तैबै यीशु आपु भी प्रार्थना केरनै री तैंईंयै नौठा।

यीशुऐ त्राई बारी प्रार्थना केरी,“ओ मेरे बापू जी, अगर होई सका सा ता ऐ दुःख मुँ न दूर केर। पर अगर लोका हागै माफ़ केरनै री तैंईंयै कोई होर बौत नैंई ऑथि, ता मेरी ऐ इच्छा पूरी केर।” यीशु बोहू उदास ती होर तेइरा पसीना लोहू री बूंदा सांही हुआ ती। तेइबै सामर्थ देणै री तैंईंयैं परमेश्वरै एक स्वर्ग दूत भेजू।

हर बार प्रार्थना न बाद, यीशु आपणै चेले सैंघै वापस आऊ, पर ते सूतैदै ती। ज़ैबै यीशु त्राई बार वापस आऊ ता यीशुऐ बोलू, “बिऊज़ात्! मेरा ढौकणु आल़ा औखै सा।”

यहूदी अगुवै, सैनिक, होर एक बड़ी भीड़ा सैंघै यहूदा आऊ। तिन्हैं तलवार होर शोठै लेएदै ती। यहूदै यीशु हागै एजिया तेइन बोलू, ओ गुरू जी, नमस्ते, “होर तेइबै माँकी धिनी। तेइयै गिरफ्तार केरनु आल़ै मांहणु यहूदी अगुवै पैंधै प्रगट केरनै री तैंईंयैं ऐण्ढा केरू ती। तैबै यीशुऐ बोलू, “ओ यहूदा, कि तू एक माँकी देईया मुँभै ढौकदा लागा सा।

ज़ैबै ते सैनिक यीशु बै ढौकदै लागै ती, ता पतरसै आपणी तलवार खोली होर महापुरोहिता रै एक दासा रा कोन काटू। यीशुऐ बोलू, “तलवारी बै दूर केर! हांऊँ आपणै बापू सैंघै आपणा बचाव केरनै री तैंईंयैं स्वर्गदूता री एक सैना री तैंईंयैं अर्ज़ केरी सका सा। पर मुँभै मेरे बापू री गैल मनणी सा।” तैबै यीशुऐ तेई मांहणु रा कोन ठीक केरू। तैबै सारै चेले भगै।