39. यीशु पैंधै मुकदमा च़ला सा

ऐबै ऐ औधी राती रा बौगत ती। ते सैनिक यीशुऐ महापुरोहिता रै घौरा बै आंणै, किबैकि ते यीशु सैंघै सवाल केरना चाहा ती। पतरस दूरा न तिन्हरा पिछा केरदा लागा ती। ज़ैबै सैनिकै यीशु घौरा नेऊ, ता पतरस बाहरै रुकिया आपु बै औगी न गर्म केरदा लागा।

घौरा आँध्रै, यहूदी अगुवै यीशु पैंधै मुकदमा चलाऊ। तिने तेइरै खिलाफ झूठी गैला बोलणै री तैंईंयैं बोहू सारै झूठे गवाह आंणै। हालांकि तिन्हरी गैला एकी होरी सैंघै नैंई मिला ती, तैबै यहूदी अगुवै ऐ साबित नैंई केरी सकै कि सौ कौसी गैला रा दोषी ती। यीशुऐ किछ़ नैंई बोलू।

आखरी न, महापुरोहिते सीधे यीशु धिरिऐ एज़िया बोलू,“आसा बै दस कि तू परमेश्वरा रा बेटा सा?”

यीशुऐ बोलू, “हांऊँ सा, होर तुसा हांऊँ परमेश्वरा सैंघै बेठादा होर स्वर्गा न ऐंदैआ हेरना।” महापुरोहिते आपणै टौलै चीरै किबैकि जो यीशुऐ बोलू सौ तेसा गैला पैंधा झिकुआ ती। सौ होरी अगुवै पैंधै चिल्लाऊ, “आसा बै दसणै री तैंईंयैं कौसी होर गवाह री ज़रूरत नैंई ऑथि कि ऐई मांहणुए लिखू सा! तुसै आपु ऐ बोलदा शुणु सा कि सौ परमेश्वरा रा बेटा सा एथा रै बारै न तुसरा कि फैसला सा?”

सैभ यहूदी अगुवै महापुरोहिता बै ज़वाब धिना,“सौ मौरनै लायक सा!” तैबै तिन्हैं यीशु री औछी पैंधै पट्टी बौनी, तेई पैंधै थूकु, सौ मारू होर तेइरा मज़ाक उड़ाऊ।

होर पतरस, ज़ैबै सौ घौरा बाहरै इन्तजार केरदा लागा ती। तैबै एक दासी शोहरीयै सौ हेरु। तेसै बोलू, “तू भी यीशु सैंघै ती!” पतरसै नाँ केरू। बादा न कौसी होरी शोहरीयै भी ऐ गैल बोली, होर पतरसै फिरी नाँह केरू। आखरी न, किछ़ लोकै बोलू, “आसै जाणा सी कि तू यीशु सैंघै ती किबैकि तुसै दुऐ गलीला न ती”

तैबै पतरसै बोलू, “अगर हांऊँ ऐई मांहणु बै जाणा सा ता परमेश्वरा मुँभै श्राप देणा!” तुरन्त पतरसा रा ऐण्ढी तैरहा कसम खाँणै न बाद, एक मुर्गे बांग धिनी। यीशुऐ पिछै मुड़िया हेरू।

पतरस तौखै न नौठा होर जोरै-जोरै रोंदा लागा। तेई बौगता, यीशु बै ढौकणै ध्याणु आल़ै यहूदै हेरू कि यहूदी अगुवै यीशु बै मौऊती री सज़ा धिनी सा। यहूदा बोहू दुखी हुआ होर जाईया आपु बै मका सा|

ऐबै तेई देशा रा राज्यपाल पिलातुस ती। सौ रोम शैहरा री तैंईंयैं कोम केरा ती। यहूदी अगुवै यीशु तेई हागै आंणु। ते चाहा ती कि पिलातुस तेइबै मौऊती री सज़ा दे होर तेइबै मकालै। तैबै पिलातुसै यीशु न पुछू, “कि तू यहूदी रा रजा सा?”

यीशुऐ ज़वाब धिना, “तैं सच़ बोलू सा। पर राज्य औखै धौरती रा नैंई ऑथि। अगर होंदा ता मेरै दास मेरी तैंईंयैं युद्ध केरदै। हांऊँ धौरती पैंधै परमेश्वरा रै बारै न सच दसणै री तैंईंयैं आऊ सा। हर एक मांहणु ज़ो सचा सैंघै झ़ुरी रखा सा सौ। मेरी शुणा सा।” पिलातुसै बोलू, “ता सच़ कि सा?”

यीशु सैंघै गैला केरनै न बाद, पिलातुसै बाहरै भीड़ा हागै जाइया बोलू ,“हांऊँ ऐण्ढी कोई बजहा नैंई पांदा कि ऐ मांहणु मारनै रै लायक सा।” पर यहूदी अगुवै होर भीड़ा रै लोकै चिखिया बोलू, “ऐईबै क्रुसा पैंधै च़ढ़ा!” पिलातुसै ज़वाब धिना, “सौ किछ़ केरनै रा दोषी नैंई ऑथि।” पर ते होर भी ज़ोरै सैंघै बोलदै लागै। तैबै पिलातुसै त्रीजी बारी बोलू,“सौ दोषी नैंई ऑथि।”

पिलातुस डौरू कि भीड़ा रै लोका लड़ाई केरनी शुरू केरनी, तैबै सौ आपणै सैनिका रै ज़रियै क्रुसा पैंधै च़ढ़ाणै री तकर मनु। रोमी सैनिकै यीशु बै कोढ़ै लाऐ तेइबै राजै रै झकड़ै लाऐ, होर तेइरी मुण्डी पैंधै कौन्डै रा बणाऊदा ताज़ रखु। तैबै ते ऐ बोलिया तेइरा मजाक उड़ांदै लागै, “हेरा यहूदी रा राजा!”