40. यीशु बै क्रुसा पैंधै च़ढ़ा सी

यीशु रा मज़ाक केरनै न बाद, सैनिक तेइबै क्रुसा पैंधै च़ढ़ाणै री तैंईंयैं नौठै। तिन्हैं सौ क्रुस तेईबै च़कणै धिना ज़ुणी पैंधै तेई मौरना।

ते सैनिक यीशु बै तेसा ज़ैगा पैंधै लेइया आऐ ज़ो “खोपड़ी” कहला सा होर तेइरै हौथा होर जौंघा न क्रुसा पैंधै कीलै ठोकै। पर यीशुऐ बोलू, “ओ बापू जी, इन्हां बै माफ़ केर, किबैकि ऐ नैंई जाणदै कि ऐ कि केरदै लागै सी।” तिन्हैं एक पौटी भी तेइरी मुण्डी पैंधै लटकाई। तुंई पैंधै लिखू ती, “यहूदी रा राजा।” पिलातुसै तिन्हां बै ऐ लिखणै री तैंईंयैं बोलू ती।

तैबै सैनिकै यीशु रै झिकड़ै री तैंईंयैं चिट्ठी पाई। ज़ैबै तिन्हैं ऐण्ढा केरू ता तिन्हैं सौ भविष्यवाणी पूरी केरी ज़ो बोली ती, “तिन्हैं मेरे झकड़ै आपु न बौंडै, होर मेरे झिकड़ै री तैंईंयैं चिट्ठी पाई”

तौखै दुई डाकू भी ती, ज़ो सैनिकै तेई बौगत क्रुसा पैंधै च़ढ़ाऐ ती| तिन्हैं ते यीशु रै दुई धिरिऐ रखे ती। तिन्हां मौंझ़ै एक डाकूऐ यीशु रा मज़ाक उड़ाऊ, पर दुजै बोलू, “कि तू नैंई डौरदा कि परमेश्वरा तौभै सज़ा देणी? आसै बोहू बुरै कोम केरनै रै दोषी सी, पर ऐ मांहणु निर्दोष सा।”तैबै तेइयै यीशु सैंघे बोलू,“ज़ैबै तू आपणै राज्य न ऐला ता जिबाण मुँभै याद रखेई।” यीशुऐ ज़वाब धिना, “औज़ै तौ मुँ सैंघै स्वर्गलोका न होंणा।”

यहूदी लोकै होर भीड़ा रै होरी लोकै यीशु रा मजाक उड़ाऊ। तिन्हैं तेई सैंघै बोलू, “अगर तू परमेश्वरा रा बेटा सा ता, क्रूसा न बुनै औसिया एज़ होर आपु बै बचा! तैबै आसा तौ पैंधै बशाह केरना।”

तैबै तेई पूरै देशा रा सर्ग सारा काला हुआ, भलै सौ ध्याड़का बौगत ती। ऐ ध्याड़की बौगत काला हुआ ती होर त्राई घण्टै तकर ऐण्ढाऐ रौहू ती।

तैबै यीशुऐ जोरै सैंघै बोलू, “बौगत पूरा हुआ! ओ बापू जी, हांऊँ आपणी आत्मा तेरे हौथा न देआ सा।” तैबै तेइयै आपणी मुण्डी टुँम्बड़ी केरी होर आपणै प्राण छौड़ै। ज़ैबै सौ मुँआ ता एकदम जौजरी हुई। सौ बड़ा पर्दा ज़ो परमेश्वरा री मौज़ुदगी न लोका बै आँगी केरा ती उझ़ै न बुनै तकर फूटिया दुई भाग हुऐ।

आपणी मौऊती रै ज़रियै, यीशुऐ लोका री तैंईंयैं परमेश्वरा हागै ऐणै री बौत खोली। ज़ैबै यीशु री हेर-शुण केरनु आल़ै एक सैनिकै ज़ो किछ़ हुआ ती ऐ सैभ हेरू ता तेइयै बोलू, “पक्का, ऐ मांहणु निर्दोष ती। ऐ परमेश्वरा रा बेटा सा।”

तैबै यूसुफ होर नीकूदेमुस नाँ रै यहूदी अगुवै आऐ। ते बशाह केरा ती कि यीशु ऐ मसीह ती। तिन्हैं पिलातुसा न यीशु रा शरीर मुँगु। तिन्हैं तेइरा शरीर टौलै न लपेटू। तैबै तिन्हैं सौ एक टोलही मौंझ़ै न काटिया बणाईदी कब्रा न नेऊ होर तुंई आँध्रै रखु। तैबै तिन्हैं तेसा कब्रा रै दुआरा बै बन्द केरनै री तैंईंयैं एक बड़ा पात्थर लुढ़काऊ।