41. परमेश्वर यीशु बै मुऐदै न जिन्दा केरा सा

सैनिका रै दुआरा यीशु मसीह रा क्रुसा पैंधै चड़ाणै न बाद, यहूदी रै सेभी अगुवै बोलू, तेई झुठै, यीशुऐ, बोलू ती कि मुँ मौरनै न त्राई रोज़ा बाद जिन्दै होणा। कौसी बै ऐ पता केरनै री तेईये कब्रै री पैहरेदारी केरनी पौई; कि तेई रै चेले तेई री लाशा बै चोरीया नेलै अगर ते ऐण्डा केरलै होर बोललै कि सौ मौरिया जिन्दा हुआ सा।

पिलातुसै तिन्हां बै बोलू, “तुसा हागै ता पहरैदार सी ज़ा, होर आपणी समझ़ै रै मुताबक पौहरैदारी केरा।” तैबै तिन्हैं पहरैदार नेऐ, होर कब्रा न मोहर लाई। होर तिन्हैं पहरैदार बशाऐ कि कोईऐ लाश नी लोड़ी नेई।

यीशु रै मौरने न बाद वशाँ रा धियाड़ा ती। बशाँ रै धियाड़ै न कोई भी कौम नी ती केरदा, हाज़ी तकर यीशु रा कोई भी सैंघी कब्रा बै नेई आऊ ती,पर वशाँ रै धियाड़ै न बाद, दोथी झिशा, किछ़ बेटड़ी यीशु री कब्रा हागै जाणै री तैंइयैं त्यार हुई। ते यीशु रै शरीरा पैंधै होर भी मसाला लाणा चाहा ती।

तिन्हां बेटड़ी पुजणै न पेहलै, कब्रा हागै एक बड़ी ज़ौज़री हुई होर सर्गा न एक स्वर्गदूत तौखै एज़िया सौ बड़ा पात्थर लुढ़काऊ, जुणी सैंघै सौ बन्द ती होर तेथा पैंधै बेठा तेइरा रूप बिजली सांही च़मकदा लागा ती होर तेइरै झिकड़ै हिंऊँआ सांही शेतै ती। ते पैहरैदार ज़ो कब्रा रा पैहरा देंदै लागै ती कब्रा पैन्धै जो सैनिक ती ते डौरै लाइया कोमदै लागै, होर मूँऐंदै सांही हुऐ।

जैबे ते बेटड़ी कब्रा हागै पुज़ी ता तैबै स्वर्गदूतै तिन्हां बेटड़ी बै बोलू, “डौरदी मौता। यीशु औखै नी ऑथि, ज़ैण्ढा तेइयै बोलू ती सौ मौरेनै न बाद ज़िन्दा हुआ सा। एज़ा, तेसा ज़ैगा बै हेरा होर तौपा ज़ौखै यीशु रा शरीर रैखू ती। तिन्हैं बेटड़ीए कब्रा आँन्द्रै जाईया हेरु कि तौखे यीशु रा शरीर नी ती ऑथि।

तैबै तेई स्वर्गदूते तिन्हां बेटड़ी बै बोलू,“जाईया तेई रै चेले बै दसा, ‘यीशु मुँएदै न जिन्दा हुआ सा होऱ तुस्सा न आगै-आगै गलिला बै जा सा।

ते बेटड़ी हेरान हुई होर बौहु खुश हुई। ते चेलै बै ऐ खुश खबरी शुनाणै री तैंईयैं दौऊड़ी।

जैबै ते बेटड़ी च़ेले बै ऐ खबर दसणै री तैंईंयैं हाज़ी बौता न ती,ता तैबै यीशुऐ तिन्हां पैन्धै प्रगट हुआ। तै तेईरी ज़ौंगा पैंधै पौड़ी। तेबै यीशुऐ बोलू” मौता डोरदै, जाइया मेरे चेलै बै गलील जाणै बै बोला। तिन्हां तौखै हांऊ हेरना।