42. यीशु सर्गा बै जा सा

जुणी रोज़ परमेश्वरै यीशु मुँऐदै न जिन्दा केरू ती, तेई ध्याड़ै यीशु रै दुई च़ेले नैड़ै रै ग्राँ न जाँन्दै लागै ती, औंढदी गैरै ते यीशु री सब गैला बै ज़ो हुईदी ती गैल बात केरदै ज़ाँदै लागै ती। तिन्हां बै आश ती कि सौ मसीह ती,पर तैबै भी सौ लोकै मारु, ऐबै ते बेटड़ी बोला सी कि सौ फिरी जिन्दा हुआ सा। ते नी जाँणदै कि कौसी गला पैन्धै बशाह केरना सा।

यीशुऐ तिन्हां हागै ऐज़िया तिन्हां सैंघै हौंढणा शुरु केरु,पर ते यीशु बै पछिआणी नी सेकै। यीशुऐ तिन्हां न पुछू तुस्सै कुणी रै बारे न गल केरदै लागै सी। तिन्हैं तेई बै यीशु सैंघै हुईदी पिछलै महिनै री सारी घटना रै बारै न दसु। तिन्हैं सोचु कि ते कौसी परदेशी सैंघै गल्ला केरदै लागै सी जो नी जाँणदा कि यरुश्लेमा न कि हुआ ती।

तैबै यीशुऐ ते समझाए कि परमेश्वरा रा वचन मसीह रै बारै न कि बोला सा। बोहू साल पेहलै,भविष्यवाणी केरनु आलै बोलू ती कि बुरे लोका मसीह दुख देईया मारना, पर भविष्यवाणी केरनु आलै ऐ भी बोलू ती कि तेई त्रीज़ै रोज़ जिन्दै होणा।

ज़ैबै ते तेई ग्राँ न पुजै ज़ौखै ते दुऐ जैण रोहणा चाहा ती, तैबै तकर लगभग सौझ़ हुई ती। तिन्हैं यीशु बै बोलू, कि “औज़ औखै रौहा किबैकि ध्याड़ा ओड़ू सा होर सौंझ़ हुई सा।” तैबै यीशु तिन्हां सैंघै भितरै नौठा। ज़ैबै ते रोटी खाँदै बेठै ता यीशुऐ रोटी हौथा न लेईया परमेश्वरा रा धन्यवाद केरू होर रोटी चोड़िया तिन्हां बै धिनी। तैबै च़ानक तिन्हरी औछ़ी खुली होर तिन्हैं यीशु पछ़ियाणु , पर ते तिन्हरी नज़री न राहुऐ।

तिन्हैं दुई जणै आपुन बोलू, “सौ यीशु ती, तैबै जैबै तेईयै आसा बै परमेश्वरै रै वचन समझाऐ ता आसै उत्साहित हुऐ ती, तैबै तुरन्त ते यरुश्लेमा बै नौठे। जेबै ते पुज़ै ता तिन्हैं सेभी चेलै बै दसु, कि यीशु जिन्दा सा। आसे सौ हेरु सा!

जैबै चेलै आपु न इन्हां गैला बै केरदै लागै ती, कि यीशु तिन्हां मौंझ़ै एज़िया खड़ै हुऐ, होर तिन्हां बै बोलू, “तुसाबै शान्ति मिलै। ते सब बोऊ घबराऐ होर डौरै तिन्हैं बुझू ऐ ता कोई भूत सा। तैबै यीशुऐ तिन्हां बै बोलू, “तुसै किबै डौरा सी? तुसै ऐण्ढा किबै नी सोचदै कि हांऊ यीशु सा? तुसै मेरै हौथा-ज़ोंघा बै हेरा हांऊँ कोई भूत नी ऑथि, मुँभै छ़ुँगिया हेरा किबैकि भूतै रै हाड-मांस नी होंदा, ज़ैण्ढा मूँ हागै सा।” तेईयै खाणै री तैंईयै किछ़ मौंगू। तिन्हैं तेई बै मच्छी रा एक टुकडा धिना, होर तेईयै खाऊ।

यीशुऐ बोलू, “मेरै बारै न परमेश्वरा रा वचन जो किछ़ मेरै बारै न बोलू सा सौ पूरा होणा। तैबै यीशुऐ परमेश्वरै रा वचन शौभली तरह समझाऊ। यीशुऐ बोलू, “बोहू पैहलै भविष्यवाणी केरनू आलै लिखू सा मुँ, मसीह बै दु:ख सौहणा, होर मौरना पौऊ होर त्रीज़ै रोज़ फिरी मूँऐंदै न ज़िन्दै होंणा।”

“तिन्है भविष्यवाणी केरनु आलै भी लिखू ती कि मेरै चेलै परमेश्वरै रै वचनै री घौषणा केरलै। तिन्हां सेभी बै पश्चाताप केरनै री तैंईयैं दसलै। अगर ते ऐण्डा केरा सी ता परमेश्वर तिन्है रै पापा बै माफ केरा सा। मेरै चेलै ऐई सन्देश यरुश्लेमा न शुरू केरना। तैबै तिन्हा सब जगाह सब जाति न जाणा। तुस्सै लोका मेरी हर एक गल्ला होर कौमै रै गवाह सी जो मैं बोलू होर केरू ती, होर तेथा सैभि रै भी जो मुँ सैंघै हुआ ती।”

आगलै 40 रोज़ा रै दौरान, प्रभु यीशु केई बार आपणै चेले सामनै प्रगट हुआ। एक बार ता 500 न ज्यादा माँहणु रै सामने प्रगट हुआ। तेईयै आपणै सेभी चेलै पैंधै कैई तरिकै न प्रगट केरू कि सौ जिन्दा सा, होर तेईये तिन्हां बै परमेश्वरै रै राज्य रै बारै न शिक्षा धिन्नी।

तैबै यीशुऐ आपणै चेले बै बोलू, “स्वर्ग होर धौरती रा सारा हक मुँभै धिना सा। तैबै ऐबै तुसै ज़ाआत् होर सैभी ज़ाति बै मेरा च़ेला बणात् होर तिन्हां बै परमेश्वर पिता, बेटै होर पवित्र आत्मै रै नाँ न बपतिस्मा दैआत्, जौ किछ़ मैं तुस्सा बै हुक्म धिन्नै सी तिन्हां बै मनणा सिखात् ज़ो मैं तुसाबै सीखाई। ऐ याद रखा कि हांऊँ दुनिया रै आखरी तैंईंयैं तुसा सैंघै रौहणा।

यीशु रै मुँऐंदै न जिन्दा होणै रै चाहली रोज़ा न बाद, तेईयै आपणै चेलै बै बोलू,“जैबै तकर मेरा बापू तुस्सा बै शक्ति नी देला तैबै तकर यरुश्लेमा न रूकिया रौहित। प्रभु तुस्सा पैंधै पवित्र आत्मा भेजणै रै ज़रियै ऐण्ढा केरना,“ तैबै यीशु सर्गा बै नोठा, होर ऐकी बादलै सौ तिन्हां न गजिहाऊ सर्गा न यीशु सैभी चिज़ा पैंधै अधिकार केरनै री तैंइयैं परमेश्वरा रै दैहिणै धिरै बैठा।