4. अब्राहमा सैंघै परमेश्वरा रा वायदा

औढ़ा रै कई बौर्षा बाद,, दुनिया न बोहू लोका रौहै केरा ती, तिन्हैं दबारा परमेश्वरा रै होर एकी दुजै रै खिलाफ पाप केरू। किबैकि ते सैभ एकै भाषा बोलै केरा ती, तैबै ते सैंघै कठा हुऐ होर दुनिया बै भौरनै रै परमेश्वरा रै हुक्मा बगैर एक नगर बणाऊ।

ते बोहू घमण्डी ती, होर तिन्हां बै कैण्ढी जिन्दगी जिणी चेहिऐ। एसा बारै न ते परमेश्वरा रै हुक्मा रा पालन केरना नैंई ती चांहदै। औखै तकर कि तिन्हैं एक ऐण्ढी मीनार बनाणी शुरू केरी जो सर्गा तकर पुजली। परमेश्वरै हेरू कि अगर ते सैंघै मिलिया बुराई केरदै रौहलै, ता ते बोहू पापै रै कोम केरी सका सी।

तैबै परमेश्वरै तिन्हरी बोली न गड़बड़ी पाई होर ते तौखै न सारी धौरती न फैलाऐ। जो नगर तिन्हैं बनाणा शुरू केरू ती, तेइरा नाँ बेबीलोन ती, जुणिरा मतलब सा “गड़बड़ी”।

कई बौर्षा बाद परमेश्वरै अब्राहम नाँ रै एकी मांहणु सैंघै गैला केरी। परमेश्वरै अब्राहमा बै बोलू, “आपणा देश, आपणा टबर होर आपणै बापू रै घौरा बै छ़ौड़िया तेई देशा बै ज़ा, ज़ो मूँ तौभै रिहाणा। मुँ तौभै आशीष देणी होर तौ न एक बड़ा देश बनाणा। मुँ तेरा नाँ महान केरना। जो तौभै आशीष देला, तेइबै मुँ आशीष देणी, होर जो तौभै श्राप देला तेइबै मुँ श्राप देणा। तेरी बजहा न सारी दुनिया रै खानदाना आशीष पाणी।”

तैबै अब्राहमै परमेश्वरा री गैल मनी। तेइयै आपणै सारै सेवक होर आपणी सारी धन दौलता समेत आपणी लाड़ी सारै आपु सैंघै नेई होर कनान देशा बै नौठा जो परमेश्वरै तेइबै रिहाऊ ती।

ज़ैबै अब्राहम कनान देशा न पुजू ता परमेश्वरै अब्राहमा बै बोलू, “आपणै च़ोहू पासै हेर, मुँ ऐ सारा देश तौभै देणा होर तेरै खानदाना हमेशा री तैंईंयै अधिकार रखणा।” तैबै अब्राहम तेई देशा न रौहंदा लागा।

एक रोज़ अब्राहम मलकिसिदिक नाँ रै परमेश्वरै रै पुरोहिता सैंघै मिलू। मलकिसिदिकै अब्राहमा बै ऐ आशीर्वाद धिना, “परमप्रधान परमेश्वरै री धिरिऐ न, ज़ो सर्ग होर धौरती रा स्वामी सा, तू धन्य सा।” तैबै अब्राहमै तेइबै सैभी च़ीज़ा रा दशमाँश धिना।

कई बौर्ष बीतै, पर ऐबै भी अब्राहम होर सारै रा कोई बेटा नैंई ती ऑथि। परमेश्वरै अब्राहमा सैंघै गैला केरी होर दबारा वायदा केरू, कि तेइरा एक बेटा पैदा होंणा होर तेइरा वंश सर्गा रै तारै साही होणा। अब्राहमै परमेश्वरै रै वायदै पैंधै बशाह केरू। परमेश्वरै घोषणा केरी कि अब्राहम एक धर्मी मांहणु ती किबैकि तेइयै परमेश्वरा रै वायदै पैंधै बशाह केरू ती।

तैबै परमेश्वरै अब्राहमा सैंघै एक वायदा केरू। एक वायदा दुई छुण्डा रै बीचा न एकी होरी री तैंईंयैं कोमा बै केरनै रा एक समझौता होआ सा। परमेश्वरै अब्राहमा सैंघै सौ वायदा तैबै केरू ती ज़ैबै अब्राहम सोंदा लागा ती, पर तैबै भी परमेश्वरा बै शुणी सका ती। परमेश्वरै बोलू, “मुँ तेरै शरीरा न पैदा केरिया तौभै तेरा एक आपणा बेटा देणा। हांऊँ तेरै खानदाना बै ऐई कनान देशा बै देआ सा।” पर ऐबै भी अब्राहम रै कोई बेटा नैंई ती ऑथी।