5. वायदै रा बेटा

अब्राम होर सारै रै कनान देश पुजणै न दस बौर्षा बाद, ऐबै तकर भी कोई औलाद नैंई औथि। तैबै अब्रामै री लाड़ी सारै बोलू, “किबैकि परमेश्वरै मेरी कोख बन्द केरी सा होर ऐबै हांऊँ औलाद पैदा केरनै बै बोहू खापरी हुई सा, हेर, मेरी दासी हाजिरा औखै सा। तेसा सैंघै ब्याह भी केर ताकि सौ मेरी तैंईंयैं एक औलाद पैदा केरी सकली।”

तैबै अब्रामै हाजिरा सैंघै ब्याह केरू। हाजिरा रै एक बेटा पैदा हुआ, होर अब्रामै तेइरा नाँ इश्माएल रखु। परमेश्वरै फिरी अब्रामा सैंघै गैला केरी।

परमेश्वरै बोलू, “ हांऊँ सर्व शक्तिमान परमेश्वर सा। मुँ तौ सैंघै एक वायदा केरना।” तैबै अब्रामै धौरती पैंधै टुँबड़ै पौड़िया प्रणाम केरू। परमेश्वरै अब्रामा सैंघै बोलू, “तौ जाति रा बापू होंणा। मुँ तौभै होर तेरै खानदाना बै तिन्हरी आपणी ज़मीन होंणै री तैंईंयैं कनान देश देणा होर मुँ हमेशा री तैंईंयैं तिन्हां रा परमेश्वर होंणा। तौभै आपणै घरानै रै हर मर्दा रा खतना केरना पौऊ।”

तेरी लाड़ी सारै सैंघै तौ न एक बेटा होंणा होर तेई मेरै वायदै रा बेटा होणा। तू तेइरा नाँ इसहाक रखेई। मेरा वायदा तेई सैंघै होंणा होर तेई एक बड़ी ज़ाति होणा। परमेश्वरै बोलू ऐबै न तेरा नाँ अब्राम नी बल्कि अब्राहम होणा ऐण्ढी तैरहा तेइरा नाँ अब्रहाम हुआ। ज़ौसरा मतलब होआ सा, “मूलपिता।” परमेश्वरै सारै रा नाँ बदलिया सारा रखू। ज़ौसरा मतलब होआ सा, “आदिमाता।”

तेई रोज़ अब्राहमै आपणै सैभ घरानै रा खतना केरू। लगभग एक बौर्षा बाद, ज़ैबै अब्राहम 100 बौर्षा रा ती होर सारा 90 बौर्षै री ता सारै अब्राहमै रै शोहरू बै जन्म धिना। ज़ैण्ढै परमेश्वरै तिन्हां बै बोलू ती तिन्हैं तेइरा नाँ इसहाक रखू।

ज़ैबै इसहाक ज़ुआन हुआ ता परमेश्वरै ऐण्ढै बोलिया अब्राहमै री परीक्षा केरी, “तू आपणै इकलौतै बेटै बै मेरी तैंईंयैं बौलि केरिया च़ढ़ा। तैबै अब्राहमै परमेश्वरा रा हुक्म मनु होर आपणा बेटा इसहाक बौलि री तैंइयै त्यार केरू।

ज़ैबै अब्राहम होर इसहाक बौलि री ज़ैगा बै जांदै लागै ती ता, इसहाकै पुछ़ू, “ओ मेरै बापू, आसा हागै बौलि री तैंईंयै छ़िड़ी ता सी पर, बौलि री तैंइयै गौभु कौखै सा?” अब्राहमै जवाब धिना, “ओ मेरै बेटैआ, परमेश्वरा बौलि री तकर गौभु रा इंतज़ाम आपू ऐ केरना।”

ज़ैबै ते बौलि च़ढ़ाणै री ज़ैगा पैंधै पूजै, ता अब्राहमै इसहाक बौनिया वेदी पैंधै रखु। सौ आपणै बेटै बै मारनु ऐ आल़ा ती कि परमेश्वरै बोलू, “रुक! बेटै बै नुकसान हेरी पजांदा! ऐबै मैं ज़ाणू सा कि तू मेरा आदर केरा सा किबैकि तैं आपणा एकलौता बेटा भी मुँ न बचाईया नैंई रखु।”

तैबै अब्राहमै तेई पिछै एक मेमणा हेरू जो झौकड़ा न फसूदा ती। इसहाका रै बदलै बौलि री तैंईंयैं परमेश्वरै मेमणै रा इंतजाम केरू ती। अब्राहमै खुशी-खुशी मेमणै री बौलि च़ढ़ाई।

तैबै परमेश्वरै अब्राहमा सैंघै बोलू, “तू मेरी तैंईंयैं सैभ किछ़ देणै री इच्छा रखा ती, औखै तकर कि आपणा एकलौता बेटा भी, तैबै हांऊँ आशीष देणै रा वायदा केरा सा। तेरा खानदान सर्गा रै तारै न भी बोहू होंणा। किबैकि तैं मेरा हुक्म मनु सा तैबै मुँ तेरै टबरा रै ज़रियै दुनिया रै सैभ खानदाना बै आशीष देणी।