6. परमेश्वरै इसहाका री तैंईंयैं इंतजाम केरू

ज़ैबै अब्रहाम बोहू खापरा हुआ ती, ता तेइरा बेटा, इसहाक ज़ुआन हुआ ती। तैबै अब्राहमै आपणा एक दासा आपणै बेटै इसहाका री तैंईंयै तेई देशा बै लाड़ी आंणदा भेजु।

ज़ौखै अब्राहमा रै रिश्तेदार रौहा ती तेई देशा बै जाणै री एक लोमी यात्रा बाद ज़ैबै सौ दास तौख पुजू ता, परमेश्वरै तेई दासा सामनै रिबका भेज़ी। सौ अब्राहमै रै भाई री पोत्री ती।

रिबका आपणै टबरा बै छ़ौड़िया अब्राहमै रै दासा सैंघै इसहाकै रै घौरा बै ज़ाणै री तैंइयैं त्यार हुई। रिबकै तौखै पुजिया एसहाका सैंघै ब्याह केरू।

एक लोमै अरसै बाद, अब्राहम मूँआ। तैबै परमेश्वरै अब्राहमा रै बेटै इसहाका बै, अब्राहमा सैंघै केरेदै वायदै री बजहा न आशीष धिनी। तेई वायदै न परमेश्वरा री एक प्रतिज्ञा ती कि अब्राहमै रै अनगिनत खानदान होंणै। पर इसहाकै री लाड़ी रिबकै री कोई औलाद नैंई हुई।

इसहाकै रिबका री तैंईंयैं परमेश्वरा हागै प्रार्थना केरी, होर सौ जुड़वै बच्चै सैंघै सुज़दी रौही। ज़ैबै ते बच्चै रिबका रै पेटा न ऐ ती, ते आपु न लड़दै लागै, तैबै जो किछ़ होंदा लागा ती रिबकै सौ परमेश्वरा बै दसु।

परमेश्वरै रिबका बै बोलू, “तौ दुई बेटै पैदा केरनै। तिन्हरै खानदाना दुई लग-लग जाति न बौंडिणा। तिन्हां एकी होरी न लड़िना। पर बड़े बेटै न पैदा होंणु आल़ी जाति बै होछ़ै बेटै रै अधीन होंणा पौड़ना।”

ज़ैबै रिबका रै बेटै पैदा हुऐ, बड़ा बेटा लाल बाला आल़ा ती, होर तिन्हैं तेइरा नाँ एसाव रखु। तैबै होछ़ा बेटा एसाबै री घुंडी ढौकिया पैदा हुआ, होर तिन्हैं तेइरा नाँ याकूब रखु।