7. परमेश्वरै याकूबा बै आशीष धिनी

ज़ैबै ते बच्च़ै बड़ै हुए ता याकूबा बै घौरा न रौहणा शोभला लागा। पर एसावा बै पशु रा शिकार केरना शोभला लागा ती। रिबीका याकूबा सैंघै झुरी रखा ती, पर इसहाक एसावा सैंघे झुरी रखा ती।

एक रोज़ ज़ैबै एसाव शिकार केरिया वापस आऊ ता सौ बोहू भूखा ती। एसावै याकूबा बै बोलू, “ज़ो तैं पकाऊ सा तुंई न थोड़ा खाणा मुँभै दै।” याकूबै जवाब धिना, “पैहलै मुँ सैंघै ऐ वायदा केर कि पैहलै बेटै होंणै री बजहा न हर एक चीज़ ज़ो तौभै मिलणी, सौ सैभ तौ मुँभै देणी।” तैबै एसावै ते सैभ चीज़ा याकूबा बै देणै रा वायदा केरू। तैबै याकूबै तेईबै खाणा धिना।

इसहाक एसावा बै आशीष देणा चाहा ती पर एथा न पैहलै कि तेइयै ऐण्ढा केरू, रिबका होर याकूबै एसाव होंणै रा ढोंग केरिया तेई सैंघै धोखा केरू; इसहाक खापरा हुआ ती, औखै तैकर कि ऐबै हेरी भी नैंई सकदा ती; तैबै याकूबै एसावा रै झिकड़ै लाऐ होर बौकरी री खौल आपणै गौला न होर हौथा न लपेटी;

याकूब इसहाका हागै आऊ होर बोलू, “हांऊँ एसाव सा। हांऊँ तैबै आऊ सा कि तू मुँभै आशीष देला।” ज़ैबै इसहाकै बौकरी रै बाल महसूस केरै होर झिकड़ै री बास सिंघी, ता तेइयै सोचू कि सौ एसाव सा होर तेईबै आशीष धिनी।

एसावै याकूबा सैंघै जलन केरी किबैकि याकूबै तेइरै पैहलै बेटै रा अधिकार होर सैंघै तेइरी आशीष भी चोरी ती। तैबै तेइयै तिन्हरै बापू रै मौरनै न बाद याकूबा बै मकाणै री तरकीब बणाई।

पर रिबकै इसहाका री तरकीब शुणी; तैबै तेसै होर इसहाकै याकूबा तेइरै रिश्तेदारा सैंघै रौहणै री तैंईंयैं बोहू दूर भेजू;

याकूब कई बौर्षा तकर रिबका रै रिश्तेदारा सैंघै रौहू। तेई बौक्तै तेइयै ब्याह केरू होर तेइरै बारा बेटै होर एक बेटी पैदा हुई। परमेश्वरै सौ बोहू धनी बणाऊ।

बीह बौर्षा तकर कनान देशा न आपणै घौरा न दूर रौहणै न बाद, याकूब आपणै दास होर पशु रै सारै छुण्डा सैंघै तौखै वापस आऊ

याकूब तैबै बोहू डौरू ती, किबैकि तेइयै सोचू ती की एसाबा हांऊ मकाणा; तैबै तेइयै भेंटा रै रूपा न पशु रै छुण्ड एसावा हागै भेजै; ज़ो दास तिन्हां छुण्डा बै नेईया नौठै ती तिन्हैं बोलू, “तेरै दास याकूबै ऐ पशु रै छ़ुण्ड तौभै धिनै सी।सो छेकै ऐणु आल़ा सा।”

पर एसाव ऐबै याकूबा बै नुकसान पजाणा नैंई चाहा ती। सौ तेईबै एक बार दबारा हेरिया बोहू खुश ती। तूंई न बाद याकूब देशा न शान्ति सैंघै रौहू। फिरी इसहाक मूँआ याकूब होर एसावै सौ पौथू। वायदै री कसम जो परमेश्वरै अब्राहमा सैंघै केरी ती ते ऐबै एसाब होर याकूबा पैंधै आई ती।