8. परमेश्वरै यूसुफ होर तेइरै टबर बचाए

कई बौर्षा बाद ज़ैबै याकूब खापरा हुआ ती तेइयै आपणा प्यारा बेटा यूसुफ तेइरै भाई बै परेखणै री तैंईंयैं भेजू ज़ो पशु रै छुण्डा री हेर-शूण केरा ती;

यूसुफा रै भाई तेई सैंघै जलन रखा ती, किबैकि तिन्हरा बापू तेई सैंघै बोहु झु़री रखा ती होर यूसुफै सुपना हेरू कि सौ तिन्हरा अधिकारी बणु। ज़ैबै यूसुफ आपणै भाई हागै आऊ ता तिन्हैं सौ ढौकु होर दासा रा व्यापार केरनु आल़ै बै बेचू।

घौरा वापस ऐणै न बाद तिन्है तेइरै झिकड़ै बौकरी मकाईया तेसा रे लोहू न डबैऐईया होर तिन्है ते झिकड़ै आपणै बापू न रिहाऐ होर बोलू, “कौसी दुष्ट पशुऐ सौ खाऊ।” तैबै याकूब बोहू उदास हुआ ती।

दासा रा व्यापार केरनु आल़ै तिन्हैं व्यपारिऐ युसुफ मिस्रा बै नेऊ। मिस्र नील नौई रै बौढ़ा रा एक बड़ा शक्तिशाली देश ती। तिन्हैं व्यपारिऐ युसुफ एक धनी सरकारी अधिकारी बै दासा रै रूपा न बेच़ू। यूसुफै आपणै मिस्री मालकै री शोभली तैरह सेवा केरी, होर परमेश्वरै यूसुफा बै आशीष धिनी।

तेइरै मालकै री लाड़ियै युसुफा सैंघै सोणै री कोशिश केरी, पर यूसुफै परमेश्वरा रै खिलाफ पाप केरनै बै नाँह केरू होर बोलू, “हांऊँ एतरी बड़ी दुष्टता केरिया परमेश्वरा रा गुनहगार किबै बणनू?” तैबै सौ बोहू झ़िकुई होर युसुफा पैंधै झ़ूठै दोष लाइया सौ कैदखानै न पाऊ। यूसुफ जेला न भी परमेश्वरै रै तैंईंयैं सचा रौहू होर परमेश्वरै तेइबै आशीष धिनी।

दुई बौर्षा बाद निर्दोष होणै रै बावज़ूद यूसुफ ऐबै कैदखानै न ऐ ती। एकी राती न मिस्र देशा रै राज़ै ज़ौसरा नाँ फिरौन ती, तेइयै दूई सुपनै हेरै ज़ो तेइबै परेशान केरदै लागै ती। ज़ो सुपनै तेई राज़ै हेरै ती, तिन्हरा मतलब दसणु आल़ा कोई नी ती ऑथी।

परमेश्वरै युसुफा बै ऐण्ढी समझ़ धिनी ती कि सौ सुपनै रा मतलब समझ़ी सकला। तैबै फिरौन राज़ै सौ कैदखानै न शाधू। यूसुफै तिन्हां सुपनै रा मतलब दसू होर बोलू, “सारै मिस्र देशा न सौत बौर्षा न बोहू ज़ादा फसल होणी होर तेथा न बाद सौत बौर्षा तकर अकाल पौड़ना।”

फिरौन राज़ा युसुफा न बोहू प्रभावित हुआ होर तेइयै सौ मिस्रा रा दूजा सैभी न शक्तिशाली मांहणु चुनु।

युसुफै लोका बै शोभली फसला आल़ै सौत बौर्षा न खाणै री च़ीज़ा बै कठा केरनै बै बोलू। अकालै रै ध्याड़ै न ज़ैबै लोका हागै खाणै बै किछ़ नी ती ऑथी होर सारी धौरती न अकाल पौड़ू ता यूसुफ मिस्री लोका बै नाज़ बेच़दा लागा ताकि तिन्हां हागै खाणै बै होला।

सौ अकाल सिर्फ मिस्र देशा न ऐ नैईं ती ऑथि पर कनान देशा न भी भयंकर ती ज़ौखै याकूब होर तेइरा टबर ती।

तैबै याकूबै आपणै बेटै नाज़ आंणनै री तैंईंयैं मिस्र देशा बै भेजै। ज़ैबै ते नाज़ लेणै री तैंईंयैं यासूफा रै सामनै खड़ै हुऐ ता तेईरै भाईयै यूसुफ नैंई पछियाणु।

ऐ जाणनै री तैंईंयैं कि ते बदलै सी या नैंई ते परेखै होर यूसुफै तिन्हां बै बोलू, “हांऊँ तुसा रा भाई यूसुफ सा! मौता डौरदै। ज़ैबै तुसै हांऊँ दासा रै रूपा न बेचू ती ता तुसै बुरा केरनै री सोची ती, पर परमेश्वरै सौ बुराई भलाई रै रूपा न इस्तेमाल केरी! ऐज़ा होर मिस्रा न रौहा ताकि हांऊँ तुसा होर तुसा रै टबरा री तैंईंयैं नाज़ै रा इंतजाम केरी सकनु।”

ज़ैबै यूसुफा रै भाई घौरा वापस आऐ होर आपणै बापू बै दसु कि यूसुफ ऐबै भी जिन्दा सा ता सौ बोहू खुश हुआ ती।

हालांकि याकूब एक खापरा मांहणु ती तैबै भी सौ आपणै पूरै टबरा सैंघै मिस्र देशा बै नौठा। होर ते तौखै रौहंदै लागै, याकूबै मौरनै न पैहलै सैभी बेटै बै आशीष धिनी।

परमेश्वरै ज़ो वायदा अब्राहमा सैंघै केरू ती, अब्राहमा न बाद इसहाका सैंघै, इसहाका न बाद याकूब होर तेता न बाद तेइरै बारा बेटै होर तिन्हरै परिवारा सैंघै। बारा बेटै री औलादी सैंघै इस्राइलै रै बारा गोत्र बणै।