9. परमश्वरै मूसा शाधु

यूसुफा रै मौरने न बाद तेईरै सैभ रिशतैदार मिस्रा न रौंहदै लागै। कई बौर्षा तकर ते होर तिन्हरै खानदान तौखै रौहै होर तिन्हरी बोहू सारी औलाद पैदा हुई। ते इस्राइली कहलाऐ।

कई बौर्षा बाद मिस्र देशा न एक नोऊँआ राज़ा आऊ। मिस्र देशै रै लोकै ऐबै यूसुफ होर तेइरै ते सारै कोम ज़ो तेइयै तिन्हरी मज़ती री तैंइयै केरै ती ते बिसरै ती। ते इस्राइली लोका न डौरा ती किबैकि ते बोहू ती। तेई बौगतै फिरौन राज़ै इस्राइली लोका मिस्री रै गुलाम बणाऐ।

मिस्री लोकै इस्राइली लोका सैंघै कठोरतापूर्ण व्यवहार केरू। तिन्हैं तिन्हां न कई बड़ी-बड़ी कोठी होर ग्राँ बणाणै धियाऐ। पर, परमेश्वरै तिन्हां बै आशीर्वाद धिना होर तिन्हरै होर ज़ादा सन्तान पैदा हुई।

ज़ैबै फिरौनै हेरू कि इस्राएली री औलादा बोहू ज़ादा बढ़दी लागी, तैबै फिरौनै आपणै लोका बै हुक्म धिना कि, इस्राएली रै ज़ेतरै बेटै पैदा होलै तिन्हां सैभी बै तुसै नील नौई न शेटिया मारेइत्।

एक इस्राइली बेटड़ियै एक शोहरू बै जन्म धिना। तेसै होर तेसरै लाड़ै सौ शोहरू गज़याईया रखु।

ज़ैबै तेई शोहरू रै आमा बापू तेइबै होर ज़ादा गजियाई नैंई सकू, तैबै तिन्हैं सौ बचाणै री तैंईंयैं सौ एकी टोकरी न रखिया नील नौई न छ़ौड़ू। तेई शोहरू री बैहण दूर खड़ी हेरदी रौही कि एई शोहरू रा कि होआ सा।

फिरौन राज़ै री बेटियै तेसा टोकरी बै हेरिया तेथा भीतरै हेरू। ज़ैबै तेसै सौ शोहरू हेरू ता, तेसै सौ शोहरू आपणै बेटै रै रूपा न रखू। तेसै एक इस्राइली बेटड़ी ज़ो तेई शोहरू री आमा ती, दूध पियाणै री तैंइयै रखी। ज़ैबै सौ शोहरू बड़ा हुआ, फिरौन राज़ै री बेटियै तेइरा नाँ मूसा रखू।

एक रोज़ ज़ैबै मूसा ज़ुआन हुआ, तेइयै हेरू कि एक मिस्री मांहणु इस्राइली मांहणु बै मारदा लागा सा, तैबै मूसै आपणै इस्राएली सैंघी बै बच़ाणै री कोशिश केरी।

ज़ैबै मूसै सोच़ू कि सौ कौसियै नी हेरू होर तेइयै सौ मिस्री मांहणु मारू होर सौ दबाऊ, पर मूसा ऐण्ढा केरदा कौसियै हेरू ती।

ज़ैबै मूसा बै पता लागा कि मूसै कि केरू सा। तेइयै तेईबै मारनै री कोशिश केरी, पर मूसा मिस्रा न कौसी सुनसान ज़ैगा बै नौठा ताकि सौ तौखै बचिया रौहला।

मिस्रा न दूर सुनसान ज़ैगा न मूसा एक फुआल बणु ती। तेइयै तौखै एक बेटड़ी सैंघै ब्याह केरू होर दुई बेटै पैदा हुऐ।

मूसा आपणै शौहरै री भेड़ा रै छुण्डै री हेर-शुण केरा ती। एक रोज़ ज़ैबै मूसा आपणी भेड़ा बै हेरदा लागा ती, तैबै तेइयै एक झौकड़ भौकदा हेरू। पर सौ झौकड़ भौकदा ता लागा सा, पर फुकिदा नी ऑथी। तैबै मूसा तेसा ज़ैगा बै ऐ हेरदा नौठा कि झौकड़ किबै नैंई फुकिदा लागा। ज़ैबै मुसा झौकड़ हेरदा नौठा, तैबै परमेश्वरै तेइबै बोलू, “ओ मूसा, “आपणै बुट खोल! ज़ुणि ज़ैगा न तू खड़ा सा, सौ पवित्र ज़ैगा सा।”

परमेश्वरै बोलू, “मैं आपणी प्रजा रा दु:ख हेरू सा। ज़ो मिस्रा न सी। ऐबै एज़ मूँ तू फिरौन राज़ै हागै भेज़णा। ताकि तू इस्राएली प्रजा बै मिस्रै री गुलामी न खोलिया आणला। मूँ तिन्हां बै कनान देशै री सौ ज़मीन देणी, ज़ौसरा वायदा मैं अब्राहम, इसहाक होर याकूबा सैंघै केरूदा ती”

मूसै पुछू, “अगर लोका ऐ जाणना चाहलै हाँउं कुणिऐ भेजू सा ता मुँ कि बोलणा?” परमेश्वरै बोलू, “ज़ो हांऊँ सा सौऐ सा। तिन्हां सैंघै बोल,तेइयै हाँऊं तुसा हागै भेज़ू सा। तिन्हां सैंघै ऐ भी बोला, ‘हाँउं तुसरा बुज़ुर्ग अब्राहम, इसहाक होर याकूबा रा परमेश्वर प्रभु सा।’ मेरा ऐ नाँ हमेशा तकर रौहणा।”

मूसा फिरौना हागै ज़ाणै बै डौरदा लागा ती, किबैकि तेइयै सोचु कि हांऊँ शोभली तैरहा नैंई बोली सकदा। तैबै परमेश्वरै तेइरी मज़ती री तैंइयै तेइरा भाई हारून तेई सैंघै भेज़ू। परमेश्वरै मूसा होर हारूना बै चेतावनी धिनी कि फिरौन कठोर मांहणु सा।