44. पतरस होर यहुन्ना एक भिखारी बै ठीक केरा सी

एक रोज़, पतरस होर यहुन्ना मंदिरा बै नोठै। एक माँहणु जो अपंग ती मौंगणै री तैंईयैं शीड़ी हागै बेठा ती।

पतरसै सौ लंगड़ा माँहणु हेरू होर बोलू, “मुँ हागै तौभे देणै री तैंइयैं ढबुऐ ता नी ऑथि। पर जो मुँ हागै सा सौ तौभै देनु। उठ होर हौंढ फिर।”

परमेश्वरै सौ लंगड़ा माहणु ठीक केरी धिन्ना। तेईयै छेकै छेकै औरे-पौरे कूदणा शुरु केरू, होर परमेश्वरै री स्तुति केरना शुरू केरी। मंन्दिरा रै लोका ऐथा हेरीया हेरान ती।

तैबै लोकै री एक बड़ी भीड़ तेई माँहणु बै हेरनै री तैईयैं जो ठीक हुआ ती। पतरसै तिन्हां लोका बै बोलू, , “ऐ माँहणु ठीक सा, पर तुसै ऐसा गला पैंधै हैरान मौता होन्दै। आसै ऐ आपणी शक्ति सेगैं ठिक नेई केरू सा, या तेबै नैंई कि आसे परमेश्वरा रा आदर केरा सी। बल्कि,यीशु सा जुणिऐ ऐ आपणी शक्ति सैंघै ठीक केरू सा, किबैकी आसै यीशु पैंधै बशाह केरा सी।”

तैबै तुसै सी जुणीऐ सौ रोमी राज्यपाला बै यीशु मारनै री तैंईयैं बोलू ती। तुसै सौ मारु जो सेभी बै ज़िन्दगी देया सा। पर परमेश्वरै सौ मुँई हुन्दै न जिन्दा केरु। तुसै नी बुझू कि तुसै कि केरदै लागै सी, पर जेबै तुसै तेई कौमा बै केरदै लागे ती, तेबै जो भविष्यदक्तै बोलू ती सौ पूरा हुआ। तिन्है बोलू ती कि मसीही दुख च़कणा होर मौरना सा। परमेश्वरै ऐण्ढा होंणै धिन्ना। तेबै, पश्चाताप केरा होर परमेश्वरा धिरै फिरा, ताकि सौ तुसै रै पापा बै धोईया माफ केरी देला।”

ज़ैबै मन्दिरा न अगुवे पतरस होर यहुन्ना री गला शुणी, ता ते बोहू घबराऐ। तेबै तिन्है ते जेलखाने न पाऐ। पर जो पतरसै बोलू ती तेथा पैन्धै बोहू सारे लोके बशाह केरू, यीशु पेन्धै बशाह केरनुआलै री गिनती बढ़ीया लगभग 5,000 हुई।

आगलै रोज़, ते यहूदी अगुवै पतरस होर यहून्ना बै महायाजक होर धार्मिक अगुवै रै सामने आंणा सी। होर ते तेई अंपग माहणु बै भी आंणा सी। तिन्है यहुन्ना होर पतरसा न पुछू, “कुणी अधिकारा सेघैं तुसै ऐ अंपग माँहणु ठीक केरू?”

पतरसै ज़वाब धिन्ना,“ऐ माँहणु जो तुसा सामनै खड़ा सा सौ यीशु मसीह री शक्ति रै दुआरा ठीक हुआ सा। तुसै यीशु क्रूसा पैंधै चढ़ाऊ, पर परमेश्वरै सौ फिरी जिन्दा केरू! तुसै यीशु रा नाँह केरू, पर यीशु री शक्ति रै बगैर होर कोई उद्धार नैंई देई सकदा होर कोई दुज़ा रस्ता नैंई ऑथि।”

ते अगुवै हैरान ती कि पतरस होर यहून्नै बोहू साहसा सैंघैं गल्ला केरी ती। तिन्है हेरू कि ऐ ता साधारण माँहणु ती जो अनपढ़ ती। पर फिरी तिन्हां बै याद आऊ कि ऐ माँहणु ता यीशु सैघैं रोहा ती। तेबै तिन्हैं तिन्हां बै बोलू,“आसा तुसा बै ज्यादा सज़ा देणी अगर तुसै तेई माँहणु यीशु रै बारै न लोका बै कोई सन्देश देलै। “ऐण्ड़ी बोहू सारी गल्ला बोलणै न बाद,तिन्है पतरस होर यहून्ना जाणै धिन्ना।