45. स्तिफनुस होर फिलिप्‍पुस

पैहलै मसीह अगुवै मौंझै एक स्तिफनुस नाँ रा मर्द ती। सैभ लोका तेई रा आदर केरा ती,पवित्र आत्में तेई बै बोहू शक्ति होर बुध्दि धिन्नी ती। स्‍तिफनुसै बोहू सारै चमत्कार केरै ती, ज़ैबै तेईयै लोका बै यीशु पैन्धैं बशाह केरनै रै बारे न लोका बै शिक्षा धिन्नी ता बौहू लोकै तेई पैंधै बशाह केरु।

ऐक रोज़ स्तिफनुस यीशु रै बारै न शिक्षा देन्दा लागा ती, होर किछ़ यहूदी लोका आये जुणा यीशु पैंधै बशाह नी ती केरदै होर तेई सैंघै पुछ़-ताछ़ केरदै लागै ते बौहू झिकुऐ, तैबै ते धार्मिक अगुवै हागै नोठै होर तेई रै बारै न झूठ बोलू। तिन्हें बोलू, “आसे स्तिफनुस मूसा होर परमेश्वरै रै बारै न बूरी गल्ला बोलदा शुणू सा!” तेबै धार्मिक अगुवै स्तिफनुस गिरफ्तार केरू होर सौ महापुरोहित होर यहूदी लोके रै होरी अगुवै सामने आणु। होर भी झूठें गवाह आणें होर तिन्हें तेई रै बारै न झूठ बोलू।

तैबै महापुरोहिते स्तिफनुसा न पुछू, “कि ऐ लोका तेरै बारै न सच़ बोलदै लागै सी?” स्तिफनुसै महापुरोहिता बै जबाब देणें री तैंइयैं बोहू सारी गल्ला बोलणी शुरू केरी। तेईयै बोलू अब्राहमैं रै बौक्ता न लेईया यीशु रै बौक्ता तकर परमेश्वरै इस्राएली लोकै री तैंईयैं बोहू सारै नौखै कोम केरै सी। पर लोका हमेशा परमेश्वरै रै विरुधा रा हठिलै कोम केरदै रोहै सी, तुसै हमेशा पवित्र आत्मा रा इन्कार केरू होर हमेशा तेई रै भविष्यवाणी केरनु आलै बै मारा ती। पर जो तिन्है केरू ती तेथै री तुलना न तुसै होर भी ज्यादा बूरा केरू सा! तुसै मसीह यीशु मारू सा!

ज़ैबै तिन्हैं धार्मिक अगुवै शुणू, ता ते बोहू ज्यादा गुस्सै न हुऐ तिन्हें आपणै कौन बन्द केरै होर जौरै सैघें बोलदे लागै, ते स्तिफनुसा बै घशीटीया नगरा न बाहरै नेआ सी होर तेई बै खत्म केरनै री तैंईयैं पात्थर मारा सी।

ज़ैबै स्तिफनुस मौरदा लागा ती, तेईयै ज़ोरै सेगैं बोलू, “ओ प्रभु यीशु मेरी आत्मा बै ग्रहण केर।” तैबै स्तिफनुस घुटनै टेकिआ ज़ोरै सैंघै पुकारू, ओ प्रभु ऐई पापा बै तिन्हां पैंधै मत लान्दा होर ऐण्ढा बोलिआ सौ मूँआ।

तेई रोज़,यरुशलेमा न रौहणु आल़ै बोहु सारै लोकै यीशु पिछ़ै चलणु आल़ै बै दु:ख देणा शुरु केरू, तेबै विश्वासी लोका अलग-अलग ज़गाह बै भगै। पर तेबै भी, जौखै-जौखै ते नोठै तोखै यीशु रै बारै न प्रचार केरू।

फिलिप्पूस नाँ रा एक यीशु रा विश्वासी ती। जैण्ढा कि होरी विश्वासीऐ भी केरू ती सौ भी यरुशलेमा न भगिया नौठा। सौ सामरिया रै ग्राँ बै नौठा। तौखै तेईयै लोका मौंझै यीशु रै बारे न प्रचार केरू,बोहू सारे लोके तेई पेन्धैं बशाह केरू होर उध्दार पाऊ। एक रोज़,फिलिप्पूसा हागै परमेशवरै री धिरै न स्वर्गदूत आऊ होर सौ जगलां न नेऊ,होर ऐकी सड़का पैन्धैं चलणै री तैंईयैं बोलू, जेबै फिलिप्पुस सड़का पैंधै हौंढदा लागा ती,ता तेईये माँहणु आपणै रौथा पैंधै जान्दा हेरू। सौ माँहणु कूश देशा रा एक खास अधिकारी ती,पवित्र आत्मै फिलिप्पुसा बै बोलू कि जाइया तेई माँहणू सैंघै च़ला।

तेबै फिलिप्पुस रौथा हागै नोठा, तेईयै शुणू कि ऐ कूशी माँहणू परमेश्वरै रै वचना बै पौड़दा लागा सा। जो यशायाह भविष्य वाणी केरनु आल़ै लिखू ती सौ पौढ़दा लागा ती, “ते तेई बै मारनु आल़ी भेड़ा सैंही लेआ सी, होर जेण्ड़ै एक मैम्णु च़ुप रोहा सा, तेईयै भी एक शब्द नी बोलू, तिन्हैं तेई सैघैं बूरा व्यवहार केरू होर तेई रा आदर नैंई केरु। तिन्हैं तेई री ज़ान लेई।”

फिलिप्पुसै तेई माँहणू न पूछू, “जो तू पौड़दा लागा सा कि तू तेथा बै समझ़ा भी सा?” तेई कूशी माँहणूऐ जबाब धिन्ना,“नेंई। जैबै तक कोई मुँभै नेईं समझाला ता, तैबै तकर हाँऊ ऐथा बै नी समझी सकदा। विनती केरीया मुँ हागै ऐज़िया बैश, यशायाह ऐ आपणै बारै न लिखदा लागादा ती कि होरी रै बारे न?”

फिलिप्पुस रथा पैंधै चड़ीया बैठा। तेबै तेईयै कूशी माँहणु बै तेथै रै बारै न दसू जो यशायाहै यीशु रै बारै न लिखू ती। फिलिप्पुसै परमेश्वरै रै वचनै रै बोहू हिस्सै री चर्चा केरी। ऐण्डी तरह न, तेईयै तेई माँहणु बै यीशु रै बारै न खुशी री खबर शुणाई।

फिलिप्पुस होर सौ माँहणु च़लदे च़लदे पाणी हागै पुज़ै। तेई कूशी माँहणुऐ बोलू, “हेरा! औखै पाणी सा! कि हांऊँ बपस्तिमा लेई सका सा?” होर तेईयै सारथी बै रथ रोकणै बै बोलू।

तेबै ते पाणी न ऊतरै, होर फिलिप्पुसै तेई कूशी बै बपतिस्मा धिना। जैबै ते पाणी न बाहरै आये, ता पवित्र आत्मा चानक ए फिलिप्पुसा च़किया कौसी होरी ज़गाह पैंधै नेऊ। तौखै भी फिलिप्पुसै लोका बै यीशु रै बारै न दसणां ज़ारी रखु।

सौ कूशी आपणै घोरे री यात्रा न आगै नौठा। सौ खुश ती, कि सौ ऐबै यीशु बै ज़ाणा ती।