46. पौलुस मसीही विश्वासी बणा सा।

तेबै महापरोहितै शाऊला बै दमिश्क शैहरा बै जाणै री ईज़ाजत धिनी। तेईयै तौखे रै मसीह लोका बै गिरफ्तार केरनै होर तिन्हां बै यरूशलेमा न वापस आणंनै बै बोलू।

तेबै शाऊलै दमिश्क जाणै री यात्रा शुरू केरी। तेई शैहरा न पुजणै न थोड़ी देर पेहलै, तेई रै चौऊ पासै सर्गा न तेज़ प्याशा च़मकू, होर सौ धौरती पैंधै झ़ौड़ीया पौडू, शाऊलै कोई बोलदा शुणू, “ओ शाऊल! ओ शाऊल! तु मुँभै किबै दु:ख देआ सा?” शाऊलै पुछू, “ओ प्रभु तु कुण सा?” यीशुऐ तेई बै जवाब धिन्ना, “हाँऊ यीशु सा! तू मुँभै किबै सता सा!”

जैबै शाऊल उठू ता सौ हेरी नी सकदा ती। तेई रै दोस्त तेई बै दमिशक देशा बै नेआ सी, शाऊलै त्राई रोज़ा तकर किछ़ भी खाऊ पिऊदा नेंई तीऑथि।

दमिशक देशा न हनन्याह नाँ रा ऐक चेला ती। परमेश्वरै तेई बै बोलू, “तेई घौरा बै जा जौखै शाऊल रूकूदा सा।” आपणैं हौथा बै तेई पैंधै रख ताकि सौ दबारा हेरी सकला।” पर हनन्याहै बोलु, ‘ओ प्रभु, मैं शुणू सा कि ऐई माँहणुऐ विश्वासी लोका केण्ढी तेरह सताऐ ती।” परमेश्वरै तेई बै जवाब धिन्ना, “जा! मैं तिन्हां यहूदी लोका होर होरी जाति रै लोके रै बिचा न मेरै नाँ रा प्रचार केरनै होर घोषणा केरनै री तैंईयैं चुनू सा। तेई मेरै नाँ री तैंइयैं बोहू दु:ख सौहणा।”

तेबै हनन्याह शाऊला हागै नौठा, होर तेईयै आपणे हौथ तेई पैंधै रखै, होर बोलू, “यीशुऐ, जो तौभै औखै ऐन्दी गैरै रस्तै न तौ पैंधै प्रगट हुआ ती, हाँऊ तौ हागै भेजू ती, ताकि तू दबारा हेरी सकै, होर पवित्र आत्मा तौभै मिलला।” तैभै ए शाऊल हेरदा लागा, होर हनन्याहै तेई बै बप्तिस्मा धिना। तेबै शाऊलै रोटी खाई होर ताकत पाई।

तेबै न लेईया, शाऊलै दमिशका न रोहणू आलै यहूदी लोका न प्रचार केरना शुरू केरी धिन्ना। बोलू, “यीशु ए परमेश्वरै रा बेटा सा!” यहूदी लोका हैरान ती, किबैकि शाऊलै यहूदी लोका बै मारने री कोशीश केरी ती, पर ऐबै तेईयै यीशु पैंधै बशाह केरू ती। शाऊलै यहूदी लोका सैंघै बैंहस केरी। तेईयै हेरू की यीशु ए मसीह ती।

बोहू धियाड़ै बाद, यहूदी लोकै शाऊला बै मारनै री तरकीब बणाई। तिन्है तेईबै मारनै री तैंइयैं शैहरा न लोका भेजै, कि तेई पैंधै नज़र रखलै पर शाऊलै तिन्हें री तरकीबै रै बारै न शुणू ती, होर तेई रै सैंघियै बचिया निकलणें न तेई री मदत केरी, एकी राती न तिन्हें एकी टोकरी न बशाईया नगरै री दिवारा हेठै ऊतारी धिना। दमिश्का न बचिया निकलणै न बाद शाऊलै यीशु रै बारे न प्रचार केरना शुरू केरू।

शाऊल प्रेरित लोका सैंघै मिलणैं री तैंइयैं यरुशलेमा बै नोठा,पर ते तेई न डोरा ती। तेबै बरनबास नाँ रा एक विश्वासी शाऊला बै प्रेरिता हागै नेया सा। तेईयै तिन्हां बै दसू कि शाऊलै कैण्ढै हिम्मती सैंघैं दमिशक देशा न प्रचार केरू ती। तेथा न बाद, प्रेरित लोकै सौ मैनू।

किछ़ विश्वासी जो यरुशलेमा न सताऊदै ती दूर अंताकिया नगरा न नोठै ती होर यीशु रै बारै न प्रचार केरा ती। अंताकिया न रोहणु आलै ज्यादातर यहूदी नी ती आथि, पर पेहली बार, तिन्हा मौझें न बोहू सारै लोक विश्वासी बणै। बरनबास होर शाऊल इन्हा नौऊँऐ विश्वासी बै यीशु रै बारै होर ज्यादा शिक्षा देणैं री तैंइयैं तौखै नोठै होर कलीसिया मज़बूत केरी। यीशु पैंधै बशाह केरनै न पैहली बार अंताकिया आल़ै ऐ “मसीह” कहलाऐ।

ऐक रोज़, अंताकिया रै मसीह लोक व्रत केरीया प्रार्थना केरदै रोहै ती। पवित्र आत्मै तिन्हां बै बोलू,“मेरी तैंइयैं बरनबास होर शाऊला बै तेई कौमै री तैंइयैं अलग केरी देया जुणी कौम केरनै री तैंइयैं मैं शाधै सी।” तेबै अंताकिया री कलीसिए बरनबास होर शाऊलै री तैंइयैं प्रार्थना केरी होर तिन्हा पैंधै आपणै हौथ रखै। तेबै तिन्हैं ते बोहू सारी जगाह न यीशु रै बारै न खुशी री खबरी रा प्रचार केरनै री तेईयें भैजै। बरनबास होर शाऊलै अलग-अलग जाति रै लोका बै शिक्षा धिन्नी, होर बोहु सारै लोकै यीशु पैंधै बशाह केरू।