47. फिलिप्पी न पौलुस होर सिलास

ज़ैबै शाऊलै सारै रोमी राज्य न यात्रा केरी ता तेबै तेईयै आपणै रोमी नाँ,“पौलुसै” रा इस्तेमाल केरना शुरू केरु। एक रोज़, पौलुस होर तेई रा दोस्त सिलास फिलिप्पी नगरा न यीशु रै बारै न खुशी री खबर शुणादै नौठै। ते नगरा रै बाहर नौई रै बौढ़ा न ऐकी जगह पैंधै नोठै जौखै लोका प्रार्थना केरनै री तैईंयैं कट्ठा ती। तौखै ते ऐक लुदिया नाँ री बेटड़ी सैंघैं मिले जो व्यपार केरा ती। सौ परमेश्वरा सैंघैं झ़ुरी रखा ती होर तेई री आराधना केरा ती।

पौलुसै लुदिया यीशु रै बारै शिक्षा होर बशाहा न मज़बूत केरी, पौलुस होर सिलासै तेसा बै होर तेसै रै परिवारा बै बपतिस्मा धिन्ना। तेसै पौलुस होर सिलासा बै आपणै घौरा न रौहणै री तैंईंयैं शाधै, तैबै ते तौखै रुकै।

पौलुस होर सीलास लोका सैंघै हमेशा तौखै मिला ती जौखै यहूदी लोका प्रार्थना केरा ती। हर रोज़ जैबै ते तौखै जा ती, तौखै एक चेली शौहरी जो दुष्टात्मा न भौरुदी ती तिन्हां रा पिछ़ा केरा ती। दुष्ट आत्में री बज़ह न सौ लोका बै भबिष्य रै बारै न दसै केरा ती, तेबै सौ आपणै मालकै री तैंईंयैं बोहु ढैबूऐ कमौऐ केरा ती।

तिन्हैं रै जान्दै बौक्त सौ चेली शौहरी ज़ोरा सेघैं बोलै केरा ती, “ऐ परमप्रधान परमेश्वरै रै सेवक सी। ऐ तुसै रै उद्धार पाणै रा रस्ता दसदै लागै सी!” सौ हर रोज़ ऐण्ढा केरै केरा ती जुणी सैंघैं पौलुस नराज़ हुआ।

आखिरी रा, एक रोज़ ज़ैबै सौ च़ेली ता शोहरीए ज़ोरा सैंघैं बोलणा शुरु केरु, ता पौलुसै तेसा धिरै फिरीया तेसा आँध्र री दुष्टात्मा बै बोलू, “यीशु रै नाँ न निकलिया जा।” तेई बौगत सौ दुष्टात्मा तेसा बै छौड़ीया नौठी।

तेसा शौहरी रै मालिका बै बोहू झिक आई, तिन्हांबै ऐबै पता चलू कि दुष्टात्मैं रै बगैर ऐ शोहरी लोका बै होणु आली गल्ला नैईं दसी सकदी ती। ऐथा रा मतलब ऐबै लोका तेसै रै मालिका बै ढबुऐ नैंई देणैं कि सौ तिन्हां बै भविष्य दसदी कि तिन्हां सैंघैं कि होणा सा।

तेबै तेसा चेली रै मालकै पौलुस होर सीलास रोमी अधिकारी हागै नैऐ। तिन्हैं ते मारै-पिटै, होर जेला न पाऐ।

तिन्हैं पौलुस होर सीलास जेला न ऐण्डी जगाह न रैखै जौखै बोहू सैनिक ती। औखै तकर कि तिन्हैं री जौंघा न लकड़ी रै फटै जोड़ै। पर पौलुस होर सीलास औधि राती बै भी परमेश्वरै रै स्तुति भजन गान्दै लागै ती।

चानक एक, एक जौज़री हुई! जेलखानै रै सारै दुरआज़ै खुलूऐ, होर सारै कैदी लोकै री शांगल़ीयां खुलूईया औल़ी।

तैबै दरोगा ऊठू, तेईयै हेरू कि जेलखानै रै सारै दुरआजै खुलूएदै सी। तेईयै सोचू कि सारै केदी बचिया भगै सी। सौ डोरु कि तिन्हैं भगणै री बज़ह न रोमी अधिकारी सौ मारना, तेबै सौ आपु बै मारनै री तैंईंयैं त्यार हुआ! पर पौलुस तेईबै हेरीया ज़ोरै ज़ोरै चिटा पांदा लागा,“रूकी जा! आपु बै नुकसान मौत केरदा। आसै सब औखे सी।”

तेई दरोगै कौमदैया पौलुसा होर सीलासा हागै ऐज़िया पुछू, “उद्धार पाणै री तैईंयैं हांऊ कि केरनु?”पौलुसै जवाब धिना,“प्रभु यीशु पैधैं बशाह केर, ता तेबै तु होर तेरै टवरा रा होणा।” तेबै सौ दरोगा पौलुस होर सीलासा बै आपणै घौरा बै नेया सा होर तिन्हैं री ज़ौघा बै धौआ सा। पौलुसै तेई रै टबरै रै सैभी लोका बै यीशु रै बारै न खुशी रा सन्देश शुणाऊ।

दरोगा होर तेई रै पूरै टवरै यीशु बशाह केरू, तेबै पौलुस होर सीलासै तिन्हां बै बपतिस्मा धिन्ना। तेबै दरोगै पौलुस होर सीलासा बै रोटी खियाई,होर ते सैभ मिलिया खुश हुऐ।

आगलै रोज़ नहरै रै अगुवै पौलुस होर सीलास जेलखानै न आज़ाद केरै होर फिलिप्पी देशा न जाणें बै बोलु। पौलुस होर सीलास लुदिया होर होरी सैंघी सैंघै मिलै तेबै न बाद ते नगरा न निकलै, ते यीशु रै बारै न खुशी रा सन्देश फलान्दै रौहै,होर कलीसिया बढ़दी रोही।

पौलुस होर होरी मसीह अगुवै बोहू सारै नगरै री यात्रा केरी। तिन्हैं लोका बै यीशु रै बारै न खुशी रा सन्देश शुणाऊ। तिन्हैं कलीसिया रै लोका बै उत्साहित केरनै होर शिक्षा देणै री तैंईंयैं केई चिट्ठी लिखी, इन्हां न कई चिट्ठी बाईबलै री कताबा न सी।