48. यीशु वायदा केरुदा मसीह सा

जैबै परमेश्वरे संसार बणाऊ ता सैभ किछ़ शौभला ती, तेबै कोई पाप नेंई ती ऑथि। आदम होर हव्वा ऐकी दुजै सैंघै झ़ुरी केरा ती, होर परमेश्वरा सेघैं भी झ़ुरी केरा ती। तेसा बौक्तै कोई बीमारी होर मौऊत नैंई ती ऑथि। परमेश्वर ऐसा दुनिया न झ़ुरी केरा ती।

शैतान कीड़ै रै रुपा न बगीचै न हव्वा सैंघै गल्ला केरदा लागा, किबैकि सौ तेसा बै धोखा देणा चाहा ती। तैबै आदम होर हव्वै परमेश्वरै रै बिरुद्ध पाप केरू, किबैकि तिन्हैं पाप केरु ती तेबै दुनियाँ रै सैभ लोका मौरा ती।

किबैकि आदम होर हव्बै पाप केरू ती,तैबै किछ़ होर भी बुरा हुआ, ते परमेश्वरै रै बैरी बणै। जुणी रा नतिज़ा निकलु, कि तैबै न लेईया सेभिऐ पाप केरु सा। हर एक पैदा होणैं न लेईया परमेश्वरै रै दुश्मन सी। परमेश्वर होर लोकै रै बीचा न शान्ति नेंईं रोही, पर परमेश्वर शान्ति देणा चाहा सा।

परमेश्वरै वायदा केरु कि हब्बा होर तेसै रै बशा शैतानै री मुंण्डी जेथणी, होर ऐ भी बोलू कि शैताना तेई री गुण्ढी डंसणी। दुज़ै शब्दा न, शैताना मसीह मारना, पर परमेश्वरा सौ फिरी जिन्दा केरना। ऐथा न बाद, यीशु मसीह शैतानै री शक्ति हमेशा री तैंईंयै खत्म केरनी। कई बौर्षा बाद, परमेश्वरै प्रगट केरु कि मसीह यीशु सा।

परमेश्वर तेई औढ़ काठा न आपणै टबरा बै बच़ाणैं री तैईयैं जो होणु आला ती, नूहा बै एक ज़हाज़ बनाणै बै बोलू कि सौ ऐण्ढी तैरह परमेश्वरै रै तिन्हां लोका बै बच़ाई सकै जो तेई पैंधै बशाह केरा ती। पर परमेश्वरै तिन्हां सेभी बै बचाणै री तैंईंयैं यीशु मसीह भेजू जो तेई पैंधै बशाह केरा सी।

केई बौर्षा तकर, परोहित परमेश्वरै री तैंईयें बौल़ि चढ़ांदै रोहा ती। ऐ दसा सा कि लोकै पाप केरु, होर ऐण्ढा ती कि ते परमेश्वरा न सज़ा पाणै रै लाईक ती। पर ते बौलि चढ़ाई सका ती आपणै पापै री तैंईंयैं तैबै भी तिन्हैं रै पाप माफ नेंई होई सकदै ती, यीशु सैभी न बड़ा महापुरोहित सा। तेईयै सौ केरु जो कोई पुरोहित नेंई केरी सकदा ती, तेईयै आपणी किमती ज़ान बौलि होणैं री तैंईंयैं धिनी जो सैभी रै पाप मिटाई सका सा। सेभी रै पापै री तैंईंयैं परमेश्वरै तेई बै सज़ा धिनी। ऐसा बज़ाह न, यीशु सिद्ध महापुरोहित ती।

परमेश्वरै अब्राहमा सैंघै बोलू, “मुँ तेरे द्वारा दुनिया री सैभी जाति बै आशीष देणी।” यीशु मसीह भी अब्राहमैं रै खानदाना न सा, परमेश्वरै अब्राहमैं रे जरीऐ सैभी जाति बै आशीष देआ सा, किबैकि जो यीशु पैंधैं बशाह रखा सी परमेश्वर तिन्हां बै तिन्हैं रै पापा न छुड़ा सा जैबै ऐ लोका यीशु पैधैं बशाह केरा सी, तैबै परमेश्वर तिन्हां बै अब्राहमैं रै वंश मना सी।

परमेश्वरै अब्राहमा बै बोलू कि सौ आपणै बेटै बै, तेई री तैंईंयैं बौलि केरी दै। पर फिरी परमेश्वरै इसहाकै रै बदलै बौल़ि केरने री तैंईंयैं गौभु धिना। आसै आपणै पापै री तैंईंयैं मौरनु आलै ती! पर परमेश्वरै आसै रै बदलै यीशु बै मौरनै री तैंईंयैं धिन्ना। ऐसा बज़ाह न आसै यीशु बै परमेश्वरै रा मैमणु बोला सी।

ज़ैबै परमेश्वरै मिस्र देशा न आखरी मुसीबत भेजी ता, तेईयै सैभी इस्राएली टबरा बै बोलू, कि ते एक मेमणु बौल़ि केरले। तेई मेमणु न कोई खुभी नैंई हुई लोड़ी। तेबै आपणै दुराज़ै री चौखटा पैंधैं होर साईढ़ा न तिन्हां तेई मेमणु रा खुन लाणा ती। ज़ैबै परमेश्वरै सौ खुन हेरू ता सौ तेई घौरा न आगे बै नौठा होर तिन्है रै पैहलै शौहरु नैंई मारै, जैबै तेण्ढा हुआ ता तैबै तेथा बै परमेश्वरै फसाह रा त्योहार बोलू।

यीशु भी फसाह रै एक मैमणु साहीं सा। तेईयै कैधी पाप नेंई केरू, तैबै तेईयै किछ़ भी गलत नैंई केरू, सौ फसाह रै त्योहारै रै बौगत मारू ती। जैबै कोई यीशु पैंधै बशाह केरा सा, तैबै यीशु रा खून तेई माहणु रै पापै री किम्मत चुका सा। ऐ ऐण्ढा सा कि ज़ैण्ढै परमेश्वर तेई घौरा न आगै नौठा ती, किबैकि सौ तेई बै सज़ा नैंई देंदा।

परमेश्वरै इस्राएली लोका सैंघैं एक वायदा केरू, किबैकि ते खास लोका ती जुणा परमेश्वरै आपणी जाति होणें री तैंईंयैं चुनी ती। पर ऐबै परमेश्वरै एक ऐण्डा वायदा केरू सा जो सैभी री तैंईंयैं सा, ता ते परमेश्वरै रै ऐ लोका न शामिल होआ सी। सौ ऐण्ढा तैबै केरा सा किबैकि ते यीशु पैंधै बशाह केरा सी।

मूसा एक ऐण्ढा भविष्यवाणी केरनु आल़ा ती जुणीऐ परमेश्वरा रा वचन बड़ी शक्ति सैंघैं प्रचार केरू ती। पर यीशु सैंही भविष्यवाणी केरनु आल़ै न बड़ा सा। सौ परमेश्वर सा, तैबै जो किछ़ भी तेईयै केरू होर बोलू ते परमेश्वरै रै कौम होर वचन ती, तैबै पवित्र शास्त्र यीशु रा वचन बोला सा।

परमेश्वरै राजा दाउदा सैंघैं वायदा केरू ती कि राज़ै रै रुपा न तेई रा एक वंश परमेश्वरा रै लोका पैंधै हमेशा री तैंईंयैं राज़ केरदै रोहणा। यीशु परमेश्वरा रा बेटा सा, तैबै सौ राजा दाऊदा रा वंश सा जो हमेशा री तैंईयैं राज़ केरा सा।

दाऊद ता इस्राएला रा राजा ती पर यीशु सारी दुनिया रा राजा ती! तेई फिरी दवारा ऐणा होर हमेशै री शान्ति होर सही फैंसलै सैंघैं राज्य होर अधिकार केरना।