49. परमेश्वरा रा वायदा

ऐकी स्वर्गदूतै एक शोहरी मरियमा बै बोलू कि तौ परमेश्वरै रै शोहरू बै जन्म देणा। सौ ता कुँआरी शोहरी ती, पर पवित्र आत्मा तेसा हागै आऊ होर सौ सुज़दी रौही। तेसै एकी शोहरु बै जन्म धिन्ना जुणि रा नाँ यीशु रखु। तैबै यीशु परमेश्वर होर माँहणु दुऐ सा।

यीशुऐ बौहू सारै चमत्कार रिहाऐ सी कि सौ परमेश्वर सा। सौ पाणी पैंधैं च़लू होर आँधी तुफान शांन्त केरू। तेईयै बोहू सारै बीमार लोका ठीक केरै होर बोहू सारै लोका न दुष्टात्मा खोली। यीशुऐ मुँएंदै जिन्दै केरै, होर तेईयै पौज़ रोटी होर दुई मैच्छी सैंघै 5,000 लोका बै खियाणै री तेईयैं रज़ रोटी धिन्नी।

यीशु एक महान गुरु भी ती, जो किछ़ भी तिन्हैं सिखाऊ, सौ तिन्‍हैं सिद्धता सैंघैं सिखाऊ, जो सौ लोका बै केरनै री तैंईंयैं बोला सा सौ लोकै केरु लोड़ी किबैकि सौ परमेश्वरा रा बेटा सा। उदाहरणै री तैंईंयैं, यीशुऐ सिखाऊ कि तुसै होरी लोका बै भी ऐण्डी तरह झ़ुरी केरनै री जरूरत सा जैण्ढी तुसै आपु बै केरा सी।

तिन्हें ऐ भी सिखाऊ कि तुसा बै सैभी चिज़ा न ज्यादा होर आपणी धन दौलता न पैंधै परमेश्वरा सैंघै झ़ुरी केरा।

यीशुऐ बोलू कि संसारै री कौसी चीज़ा बै पाणैं न पैंधै शौभला सा परमेश्वरै रै राज्य न होणा। तेई रै राज्य न आँन्ध्रै जाँणा जरूरी सा कि परमेश्वर आसा बै आसै रै पापा न बचाला।

यीशुऐ बोलू कि किछ़ लोका हाँऊ ग्रहण केरना, परमेश्वरा ते लोका बचाणैं। पर दुजै लोका तेई बै ग्रहण नी केरलै, तिन्हैं ऐण्ढा भी बोलू किछ़ लोका शौभली ज़मीना सांही सी, किबैकि ते यिशु रै बारै न खुशी रै सन्देशा बै ग्रहण केरा सी, होर परमेश्वर तिन्हाबै बच़ा सा। पर किछ़ लोका बौता री ज़मीना सांही होआ सी सख्त, परमेश्वरा रा वचन बेज़ै सांही रस्तै न पौआ सा, पर तेथा न किछ भी नैंई निकलदा। ऐण्ढै लोका यीशु बै ग्रहण नैंई केरदै। ते तेई रै राज्य न जाणै बै नाँह केरा सी।

यीशुऐ सिखाऊ कि परमेश्वर पापी मांहणु सैंघैं झ़ुरी केरा सा। सौ तिन्हां बै माफ केरना चाहा सा होर तिन्हां बै आपणी औलाद बनाणा चाहा सा।

यीशुऐ दसु कि परमेश्वर पापा सैंघैं नफरत केरा सा। किबैकि आदम होर हब्बै पाप केरू, तैबै तिन्हैं री औल़ादीऐ भी पाप केरू। ऐई संसारा न रौहणु आल़ै हर कोई पाप केरा सी होर परमेश्वरा न दुर सी, हर ऐक माँहणु परमेश्वरा रा दुशमन सा।

पर परमेश्वरै ऐई संसारा न रौहणु आलै सेभी सैंघै एण्डी झ़ुरी केरी कि तेईयै आपणा केल्हा बेटा धिन्ना ताकि परमेश्वर तिन्हां बै सज़ा नेंई देला ता जो कोई यीशु पैंधै बशाह केरा सी। तेई री बज़हा न,तिन्हां तेई सैंघैं हमेशा री तैंईंयैं रौहणा।

तुसै मौरनै रै लाईक सी, किबैकि तुसै पाप केरू सा। तुसा सैंघै परमेश्वरा रा झिकिणा सही सा, आसै री बज़हा न, सौ यीशु पैंधै झिकुआ। होर यीशु बै क्रुसै री मौऊती री सज़ा धिन्नी।

यीशुऐ कैधी पाप नैंई केरुदा ती, पर तेईयै परमेश्वरा बै सज़ा देणै धिन्नी। तेईयै मौरना मंज़ुर केरू। ऐण्डी तरह, तुसै पापा बै होर ऐई संसारा न रौहणु आल़ै सैभी माँहणु रै पापा बै च़कणै री तैंईंयैं सैभी न खरी बौल़ि ती। यीशुऐ आपणै आपु बै परमेश्वरै री तैंईंयैं बौल़ि केरी, तैबै परमेश्वर कौसी रै भी पापा बै, औखै तकर कि भयंकर पापा बै माफ केरा सी।

च़ाहै तुसै शौभलै कोम केरै होलै, तेबै भी परमेश्वरा तुसै नेंई बचाणैं। तेथै रे दुआरा परमेश्वरा तुसै नेंई बचाणें। तेई रा दोस्त बणनै री तेईयें किछ़ भी नैंई ऑथि जो तुसै केरी सका सी। ऐथा न खरा, तुसा बै बशाह केरना सा कि यीशु परमेश्वरा रा बेटा सा, होर सौ तुसै री तैईयैं क्रुसा पैंधैं मुँआ, होर परमेश्वरै सौ मुँएंदै न जिन्दा भी केरू, अगर तुसै तेई पैंधै बशाह केरलै, ता परमेश्वरा तुसरै पाप माफ केरनै।

परमेश्वरा ते सैभी माँहणु बचाणै जो यीशु पैधैं बशाह केरा सी होर तेई बै आपणा प्रभु मना सी। पर ते नेंई बचाणै जो तेई पैंधै बशाह नैंई केरदै। ऐ कोई मायनै नी रखदा कि तुसै अमीर सी या गरीब सी, मर्द सी या बेटड़ी सी, खापरै सी या जुआन सी, या तुसै कौखै रौहा सी। परमेश्वर तुसा सैंघैं झुरी केरा सा होर चाहा सा कि तुसै यीशु पैंधै बशाह केरलै होर सौ तुसा रा दोस्त बणी सकला।

यीशु तुसा बै शाधदा लागा सा कि तुसै तेई पैंधैं बशाह केरलै होर बपतिस्मा लैलै, कि तुसै बशाह केरा सी कि परमेश्वरा रा इकलौता बेटा, यीशु मसीह सा? कि तुसै बशाह केरा सी तुसै एक पापी सी होर ऐ कि तुसै परमेश्वरा न सज़ा पाणैं रै लायक सी? कि तुसै बशाह केरा सी कि तुसै रै पापा बै मिटाणै री तैंईंयै यीशु क्रुसा पैंधै मुँआ?

अगर तुसै यीशु पैंधै होर ज़ो किछ़ तेईयै तुसै री तैंईंयैं कि केरु सा तेई पैधैं बशाह केरा सी, तैबै तुसै मसीह सी! शैतान आपणै निहारै राज्य न ऐबै तुसा पैंधै राज़ केरा सा। ऐबै परमेश्वर आपणै प्याशै सैंघैं तुसा पैंधै राज़ केरा सा। तेईयै तुसै पाप केरनै न रोकै सी, जुणा तुसै केरा ती। तेईयै तुसा बै एक नोंऊँई, होर सही जिन्दगी धिन्नी सा।

अगर तुसै एक मसीह सी ता जो यीशुऐ केरू सा तेई री बज़ाह न परमेश्वरै तुसै रै पाप माफ केरै सी। ऐबै परमेश्वर तुसा बै दुश्मन नेंई दोस्त बनाणा चाहा सा।

अगर तुसै परमेश्वरै रै दोस्त सी होर प्रभु यीशु रै सेबक सी तैबै तुसा तिन्हां गलै बै जो यीशुऐ सिखाई सी पालन केरलै। चाहे तुसै मसीह सी, शैताना हाज़ी भी तुसा बै पाप केरनै री तैंईंयैं तुसैरी परीक्षा केरा सा। पर परमेश्वर हमेशा जो सौ बोला सा होर केरा सा। कि अगर तुसै आपणै पापा बै मंनलै, तेबै सौ तुसै रै पाप माफ केरा सा, सौ तुसा बै पापा सैंघै लड़नै री शक्ति देया सा।

परमेश्वर तुसा बै प्रार्थना केरनै होर तेई रै वचना बै पौड़नै री तैंईंयैं बोला सा। सौ तुसा बै होरी विश्वासी सैंघै तेई री आराधना केरने बै बोला सा। तुसा बै होरी लोका बै भी दसणा कि यीशुऐ तुसै री तैईंयैं कि केरु सा। अगर तुसै इन्ना कौमा बै केरलै, ता तुसै तेई रै एक पक्कै दोस्त बणी सका सी।