50. यीशु रा वापस ऐणा

लगभग 2,000 बोर्षा न पैहलै, संसारा न सैभी ज़ैगा पैंधै ज्यादा लोका मसीह यीशु रै बारै न खुशी री खबर शुणदै लागै ती। कलीसिया फैलदी लागी ती। यीशुऐ वादा केरू ती कि तेई दुनिया रै आखरी न वापस ऐंणा, तैबै भी आपणै वायदे पूरै केरनै।

ज़ैबै कि आसै यीशु रै वापस ऐणै रा वायदा केरा सी, परमेश्वर आसा न शौभली जिन्दगी जीणैं री इच्छा केरा सा जो पवित्र सा होर जो आदर केरा सा। जैबै यीशु धोरती पैंधै रौहंदा लागा ती तैबै तेईयै बोलू, “मेरै च़ेलै सारै संसारा री ज़गाह न जाईया लोका बै खुशी री खबरा रा प्रचार केरलै, तेबै दुनिया रा खात्मा होणा।”

बोहु सारी जाति रै लोके हाज़ी तकर यीशु रै बारे न नेईं शुणु सा। सर्गा न जाणें न पेहलै, यीशुऐ मसीह लोका बै खुशी री खबर शुनाणैं बै बोलू जुणियै हाज़ी ढौई नेंई शुणु सा। तेईयै बोलु, “जा होर सेभी जाति रै लोका बै च़ेला बणा!” होर” काटणें री तैंईंयैं छ़ेत पोकैदै सी!”

यीशुऐ ऐण्ढा भी बोलु कि, “कौसी माँहणु रा सेवक तेई रै मालका न बड़ा नेंई होन्दा। ऐई संसारै रै खास लोकै मुँ सैंघै नफरत केरनी, होर मेरी बज़ह न तुसा बै दु:ख देलै होर मारलै। ऐई संसारा न तुसा बै दु:ख मिलणा, पर हिम्मत रखैईत्, किबैकि मैं शैतान हराऊ सा जो एई संसारा पैंधै राज़ केरा सा। अगर तुसै आखिरी तक विश्वासयोग्य बणीया रौहलै, ता परमेश्वरा तुसै बचाणै!”

यीशुऐ आपणै चेलै बै समझाणै री तैंईयैं कहाणी शुणाई कि ज़ैबै संसारा रा खात्मा होला तैबै लोका सैंघै कि होणा। तेईयै बोलू, “कौसी माँहणुऐ आपणैं छ़ेता न शौभला बेज़ा बाहु ती। ज़ैबै सौ सोन्दा लागा ती तैबै दुश्मनै आऊ होर गेंहु रै बेजै जौन्दरै बौणै रै कौन्डै आल़ै बेज़ै बाहै, होर फिरी नौठा।”

“ज़ैबै बुटै निकल़दै लागै ता सेबकै तेई माँहणु सैंघै बोलू, ‘ओ मालका, तैं ता आपणै छ़ेता न शौभला बेजा बाहु ती। तैबै फिरी ऐथा न बौणै रै बुटै किबै निकतै सी? तेई माँहणुऐ ज़वाब धिन्ना, ‘मेरा दुश्मन बाहणां चाहा होन्दा। ऐ मेरा कोई दुश्मन सा जुणिऐ ऐण्ढा केरु सा।”

तेई रै सेवकै तेई बै जवाब धिन्ना, ‘कि ऐ बौणै रै बुटै पेचिया खोलणै सी?’ तेई मालकै बोलू, ‘नेंई। अगर तुसै ऐण्ढा केरलै ता तुस्सा किछ़ गेंहुं भी पैचणै। काटणे रै बौगता तकर इन्तज़ार केरा। तैबै बौणै रै बुटै रै डण्डै बै कट्ठा केरीत् ताकि तिन्हां बै फुकी सकलै। पर गेंहुँ बै मेरे भण्डारा न आंणीत्।”

तेई रै च़ेलै ऐसा कहाणी रा मतलब नेंईं समझु, तैबै तिन्हैं यीशु बै समझाणै री तैंईंयैं विनती केरी। यीशुऐ बोलु, “शौभला बेज़ा बाहणु आल़ै माँहणु मसीह रै पिछै च़ला केरा सी। छेत दुनिया री अगुआई केरा सा। शौभला बेज़ा परमेश्वरै रै राज्य रै लोकै री अगुआई केरा सा।”

बौणै रै बुटे तेई बुरै माँहणु, शैताना रै लोका पिछै चला केरा सी। तेई माँहणु रा दुश्मन शैतानै रे पिछै चला केरा सा, जुणिऐ बौणै रै बुटे बाहे ती। कटाई केरना एई संसारा रै खात्मै बै दर्शाए सी, छैता बै काटणु आल़ै लोका परमेश्वरै रै पिछै च़लणु आलै सी।”

“जैबै दुनिया रा खात्मा होणा तैबै स्वर्गदुतै तिन्हां सैभी लोका ऐकी ज़ैगा न कठै केरै जो शैतानै रै सी। तिन्हां स्वर्गदूता तै सैभ बौहु ज्यादा भौकदी औगी न शौटणै सी। तौखै तिन्हां लोका बोहु ज ज़ादा दु:ख सौहणा होर दौंद पिशणै। पर जो लोका धर्मी सी, जो यीशु पिछै चला सी, तिन्हां परमेश्वर बापू रै राज्य न सुरज़ा सांही च़मकणा।”

यीशुऐ ऐण्डा भी बोलू कि तेई संसारै रै खत्म होणै न पेहलै धौरती पैंधै ऐणा। तेई तेण्डी तरह ऐणा जैण्डी तरह सौ सर्गा बै नौठा ती। मतलब, तेई हागै आपणा शरीर होणा, होर तेई सर्गा रै बादला पैंधै स्वार होईया ऐणा। जैबै यीशु वापस ऐणा सा, तैबै हर एक मसीह जो मुँऐ सी मुँएंदै न जिन्दा होणा होर तेई सैंघै स्वर्गा न मिलणा।

तेबै जो मसीह हाज़ी भी जिन्दा सी तिन्हां स्वर्गा न चकणा होर तिन्हां मसीह लोका सैंघैं शामिल होई जाँणा जो मुँएंदै न जिन्दा हुऐ सी। तिन्हां सैभी तौखै यीशु सैंघैं होणा। तेथा न बाद, यीशु आपणै लोका सैंघैं रौहणा। जैबै तिन्हां सैभी एकी ज़ैगा रौहणा ता तिन्हां हागै हमेशा री शान्ति होणी।

यीशुऐ तेई पैंधै बशाह केरनु आलै सैभी माँहणु बै एक मुकूट देणै रा वायदा केरु सा। ते हमेशा री तैंईंयै परमेश्वरा सैंघै सेभी चिज़ा पैंधै राज़ केरना सा। तेई हागै पूरी शान्ति होणी।

पर परमेश्वरा तिन्हां सैभी रा न्याय केरना जो यीशु पैंधैं बशाह नेंई केरदै। तेई ते सैभ नरका न पाणै। तौखै तिन्हां रौहणा होर दौँदै रा पिशणां होणा, होर तिन्हां हमेशा तकलीफा न रोहणा। कदी नी हिशणु आल़ी औगी तिन्हां हमेशा फुकिदै रोहणा, होर हमेशा किड़ै तिन्हां बै खान्दै रौहणा होर नैंई रुकणा।

ज़ैबै यीशु वापस ऐणा, ता तेई पूरी तरह न शैताना रा राज्य रा खात्मा केरना। तेई शैतान नरका न पाणा। तौखै शैतान हमेशा री तैईयै फुकिदै रौहणा, तिन्हां सैभी सैंघै जुणियैं परमेश्वरै री गैला नेंई मनी होर शैतानै रै पिछै चलणै रा फेसला केरु ती।

किबैकि आदम होर हब्बै भी परमेश्वरै रै हुक्म नेंई मन्नै ती होर पाप एई संसार न आणु ती, परमेश्वरै तेई बै श्राप धिना होर तेथा बै नाश केरनै रा फैसला केरु। पर कोई रोज़ परमेश्वरा एक नौऊँआ सर्ग होर नौऊँई धौरती बनाणी होर सिद्ध होणी।

यीशु होर तेई रै लोका तेसा नोंऊँई धौरती पैंधै रौहणा, होर हमेशा री तैंईंयैं सैभी चीज़ा पैंधै राज़ केरना। तेई लोकै री औछ़ी न हर एक औछू दुर केरनै। ऐबै कोई तकलीफ या दु:खी नेंई होणा। तिन्हां रोणा नेंई। तिन्हां बीमार नेंई होणा होर नाँ ता मौरना। होर नाँ तौखै किछ़ बुराई होणी। यीशु आपणैं राज्य पैंधै सही न्याय केरना होर शान्ति सैंघै राज़ केरना। तेई हमेशा आपणै लोका सैंघै रौहणा।