30. यीशु ले पाँच हजार लोगून खानो खिलूनान

यीशु ले अपूना शिष्यून प्रचार करून खिन और लोगून शिक्षा दिन खिन भौत अलग- अलग गौं में भेजछय। जब उन वाँ भटे लौटियान जाँ यीशु छ्यो त उनूनले यीशु स बताछ की उनूनले कि- कि करछ्य। जब यीशु ले यो सुणछ्य, त नाव में चढ़भेरन उ वाँ भटे एकान्त जाग में न्हैजाछो।

लेकिन भौत लोगून ले यीशु और उक शिष्यून जान देखछ्य, और जाण ग्या कि उन काँ जान मर्यान, येक कारण लोग उ जाग का आश-पास सबै गौंन में है पैदल दौड़भेरन उनार है पैलि वाँ पुजी ग्या।

उ भीड़ में, उनूनमें लगभग पाँच हजार आदिमी छ्या, और उनून स्यैनिन की और बच्चान की गिनती नी छी। और उन लोगून देखिभेरन यीशुस दया आगै, क्याखिनकि उन भेड़ून का जसा छ्या जिनोरो कोई देख-भाल करूनवाला नाहातिनी; और यीशु उनून परमेश्वरा का राज्य बारिमें भौत सी बातुन सिखून लाग्यान, और उनारा बिच में जो लोग बीमार छ्या उनून चंगो करछ्य।

और ब्याल हुन मसछ्य त यीशु का शिष्यून ले उक पास आभेरन क्योछ, “यो त बिरान जागा छै, और देर हो गै; त तुम इन लोगून विदा करा कि इन आश-पासा का बसतीन में जाभेरन अपून खिन खानो मोल ली लिया।”

लेकिन यीशु ले उनूनथैं क्योछ, “उनोरो जानो जरूरी नाहातिन! तुम इन लोगून खिन खान का इन्तजाम करा।” उनूनले यीशु थैं क्योछ, इसो कसकै कर सकनू? “याँ हमार पास पाँच रोटा और द्वी माँछा का अलावा केले नाहतिन।”

यीशु ले अपूना शिष्यून थैं क्योछ की उ भीड़ का लोगून घास में पचास- पचास का समूह में बैठून खी कौ।

यीशु ले उन पाँच रोटान और द्वी माँछा हात में थामीयान, और स्वर्ग का तरफ चाँभेरन, परमेश्वरो को धन्यवाद करछ्य

और फिर यीशु ले रोटा और माछान का टुकूड़ टोड़ी-टोड़ी भेरन शिष्यून दीनै रैयान, और उन लोगून बाढ़नै रयान। और उ कभै खतम नै भ्या! और उन लोगून ले पेट भर भेरन खान खिन खाछ।

येक बाद, शिष्यून ले उन बचिना का टुकुड़ान जाम करछ्य, जो कि पाँच रोटान में भटे बचिना का छ्या, जिनूनले बारा टोकरी भर भेरन जाम कर्यान।