42. यीशु को स्वर्ग खिन जानो

जै दिना यीशु ज्यून भायन, उई दिन यीशु का द्वी शिष्य इम्माऊस नामाका गौ खिन जान मरेछ्या।। उन यीशु बारिमें बात करून मरेछ्या, उनून आश छी कि उ मसीह छ्यो, लेकिन उ मार डाली ग्योछ। और अब उन स्यैनिन कुंन मर्यान कि उ ज्यूनो हो ग्योछ। उन यो नी समझ पान मरेछ्या कि को बात में विश्वास करा।

यीशु उनार पास आभेरन उनार दगाड़ हिटून लागछ्य, लेकिन उन ऊस नै पछ्याण पाया। उले उनूनथैं पूछ्छै तुम कैका बारिमें बात करून मरेछा। तब उनूनले ऊस यीशु का बारिमें बताछ। उनूनले सोचछ्य कि उ कोई परदेशी छै जैस यीशु का बारिमें के मालूम नाहातिन।

तब यीशु ले उनून समझाछ कि परमेश्वरो को वचन मसीह का बारिमें कि कुछो। भौत पैलि परमेश्वरा का तरफ भटे संदेश दीन वालान ले कि कईना को छ्यो, मसीह दुख उठालो और मार डाली जालो। लेकिन परमेश्वरा का तरफ भटे संदेश दीन वालान ले कि कईना को छ्यो कि उ तीसर दिन ज्यूलो हो जालो।

जब उन उ नगर में पुज्यान जाँ उन रूछ्या, तब उनूनले यीशुथैं क्योछ याँ रूक ज्या क्याखिनकि ब्याल होगैछी। और जब उन खान खिन बैठ्यान, त यीशु ले एक रोटो लीछ और परमेश्वरे स धन्यवाद दीछ और फिर ऊस तोड़छ्य। तब उन जाण लीछ कि वह यीशु छै। लेकिन उई बखत उ वाँहै गायब हो जाछो।

तब उन आपस में कुन लाग्यान, "उ त यीशु छ्यो! येक कारण जब उले हमून परमेश्वरो को वचन स समझाछ त हम भौत उत्साहित भ्या!" तुरन्त ही उन निकल भेरन वापिस यरूशलम खिन ग्यान। और वाँ पुज भेरन शिष्यून, "यीशु ज्यून हो ग्योछ! हमूले ऊस देखछ्य!"

जब शिष्य यो बात करून मरेछ्या, यीशु अचानक उ कमरा में आछ जाँ उन छ्या, और उले क्योछ, "तुमून शान्ति मिलौ!" शिष्यून ले सोचछ्य कि उ कोई भूत छै, लेकिन यीशु ले क्योछ, "तुम क्याखिन डरछा? और तुमारा मन में क्याको सक छै? म्यारा हाथ और खुटान देखा। भूतून का पास इसो शरीर नै हुनो जसो म्यारा पास छै।" यो देखुन खिन कि मैं भूत नाहातिनू, उले उनूथैं खान खिन माँगछ्य। उनूले ऊस माछा को एक टुकूड़ो दीछ, और उले ऊस खाछ।

यीशु ले क्योछ, "मेरे बारिमें परमेश्वरा का वचन जो कुछ ले कईना को छै, मैंले तुमून बताईना को छ्यो उको पूरो हुन जरूरी छै।" तब यीशु ले उनून परमेश्वरा का वचन निकीकैं समझाछ। कि "भौत पैलि लिखी ग्योछ, मसीह स दुःख उठाभेरन मरून होलो और फिर तीसर दिन मुर्दान में भटे ज्यूनो होलो।"

और उन परमेश्वरा का तरफ भटे संदेश दीनवालान ले यो ले लिखीना को छै कि म्यारा शिष्य परमेश्वरा का वचन की घोषणा कराला। और हरेक स पश्चाताप करुन खिन बताला। अगर लोग इसो कराला त परमेश्वर उनार पापून माफ करोलो। म्यारा शिष्य यो सन्देशो प्रचार यरूशलम भटे शुरू कराला। और फिर सब जागा सब जातिन में जाला। तुम लोग मेरी हरेक बात और कामा का गवाह छा जो मैंले क्योछ और करीना का छन, और उ सबा का ले जो म्यारा दगाड़ भ्योछ।

और चालीस दिनून तक यीशु अपून शिष्यून दिखाई दीछ। एक बार त उ पाँच सौ है ज्यादा लोगून दिखाई दीछ! उले अपून शिष्यून कई तरीका ले साबित करछ्य किउ ज्यूनो छै, और उले उनून परमेश्वरा का राज्या का बारिमें शिक्षा दीछ।

यीशु ले अपून शिष्यून थैं क्योछ, "परमेश्वरे ले मैंस स्वर्ग और धरती का हरेक जन में राज्य करना को अधिकार दीईना को छै। येक कारण अब मैं तुमूनथैं कुछूँ, जाभेरन सब जातिन का लोगून शिष्य बना। इसो करून खिन तुम उनून पिता, पुत्र, और पवित्र आत्मा का नाम ले बपतिस्मा दी। जो कुछ ले मैंले तुमून सिखा रैछ उन सब बातून उनून ले मानून सिखा। और मैं हमेशा तुमारा दगाड़ा रूलो।"

यीशु का ज्यून हुनाका चालीस दिन बाद, उले अपून शिष्यूनथैं क्योछ, "जब तक म्योरो पिता तुमून सामर्थ नी द्योलो तब तक यरूशलम मेंई रया। वह तुमून पवित्र आत्मा दीभेरन इसो करोलो।" तब यीशु स्वर्ग में खिन न्हैजाछो, और बादल ले उ छिप जाछो। स्वर्ग में यीशु सब चीजून में राज्य करून खिन परमेश्वरा का दैन तरफ बैठ जाछो।