50. यीशु वापस ऊछो

लगभग द्वी हजार सालून भटे, संसार में सब जगान में ज्यादा है ज्यादा लोग मसीह यीशुक बारिमें सुसमाचार स सुणून मर्यान। कलीसिया उन्नति करून मर्यान। यीशु ले वादा करीना को छै कि उ संसार का अंत में वापस आलो। उ एल तक वापस नै आयो, तबले उ अपूनो वादा स पूरो करोलो।

जब कि हम यीशुक वापस ऊनाको इनतजार करनू, परमेश्वर हमूथैं इसा तरीका ले जीवन जीना की इच्छा करछो जो पवित्र छै और जो उक आदर करछो। जब यीशु संसार में छ्यो तब उले क्योछ, "म्यार शिष्य पूर संसार में हरेक जागान में सब लोगून परमेश्वरा का राज्या का बारिमें सुसमाचार प्रचार कराला, और तब अंत आ जालो।"

भौत सी जातिन ले ऐल तक यीशुक बारिमें नै सुणरै। स्वर्ग खिन जान है पैलि यीशु ले अपून शिष्यून थैं उन लोगून सुसमाचार सुणून खिन क्योछ जिनूनले यो बाता का बारिमें नी सुणिना को छ्यो। उले क्योछ, "जा और सब जातिन का लोगून शिष्य बना!" और "कटाई करून खिन गाड़ तैयार छन!"

यीशु ले यो ले क्योछ, "कोई आदिमी सेवक अपून मालिक है ठूलो नै हूनो। यो संसारा का लोगून ले मैं है नफरत करछ्य, और म्यार नामाका कारण उन तुमून ले सताला और मार डाला। यो संसार में तुम दुख उठाला, लेकिन मज़बूत बना, क्याखिनकि मैंले शैतान स हरा हैछ जो यो संसार में राज्य करछो। अगर तुम अंत तक म्यार विश्वासयोग्य बनिना का रौला, त परमेश्वर तुमून बचालो!"

यीशु ले अपून शिष्यून यो समझून खिन एक कहानी सुणाछ कि जब संसारो को अंत होलो त लोगून का दगाड़ कि होलो। उले क्योछ, "कोई आदिमी ले अपून गाड़ में निको बी बोछ। जब उ पड़िर्योछ त उक दुश्मन आछ और ग्यू का बी में जंगली बी बो भेरन न्गैग्यो।"

जब बी जामछ्य त उक सेवकून ले उ आदिमी थैं क्योछ, 'हे मालिक, तैले त अपून गाड़ में निको बी बोईना को छ्यो। त फिर येमें जंगली बोट काँ है आयान?' उ आदिमी ले जवाब दीछ, यो म्यार कोई दुश्मन छै जैले इसो काम करछ्य।'

उन सेवकून ले अपून मालिक थैं क्योछ, 'क्या हम जंगली बोटून उखाड़ दीनू?' उ मालिक ले क्योछ, 'नै। अगर तुम इसो करला त तुम कुछ ग्यू का बोट ले उखाड़ देला। ग्यू कटाई का बखत तक इनतजार करा। तब जंगली बोटून का गट्ठा बनाभेरन तुम उनून जला द्याला। और ग्यू स म्यार खत्ता जाम कर द्याला।'

शिष्यून ले यो कहानी को मतलब स नै समझ्यो, येक कारण उनूनले यीशु थैं उ काहानी को मतलब समझून खिन क्योछ। यीशु ले क्योछ, " निको बी बूनवालो आदिमी परमेश्वरो को च्योलो छै, गड़ो संसार छै। निको बी परमेश्वरा का राज्या का लोग छन।"

जंगली बी दुष्ट लोग छन। जिनूनले जंगली बी बोईना को छ्यो। कटाई यो संसारो को अंत छै, और कटाई करून वाला परमेश्वरा का स्वर्गदूत छन।

जब संसारो को अंत होलो तब स्वर्गदूत उन सब लोगून एक दगाड़ इकट्ठा कराला जो शैताना का छन। उन स्वर्गदूत उनून एक आगा का कुण्ड में खीत द्याला। वाँ उन लोग रोला और अपून दाँत पीसाला। लेकिन जो लोग धर्मी छन, जिनूनले यीशु का बातून मान्यान, उन परमेश्वर पिता का राज्य में सूरजा का नियाति चमकाला।

प्रभु यीशु ले यो ले क्योछ कि उ संसारो का अंत हुन है पैलि यो धरती में आलो। उ उसीकै वापस आलो जसकैं उ ग्योछ। और उ आकाश में बादलून में सवार होभेरन आलो। जब प्रभु यीशु आलो, त हरेक जो प्रभु यीशु में विश्वास करून वाला जो मर चुक ग्यान उन ज्यून होल और प्रभु यीशु स आकाश में मिलाला।

और तब जो विश्वासी ज्यूना होला उन आकाश में उठा ली जाला और उन दूसार विश्वासीन का दगाड़ शामिल हो जाला जो मरीना में भटे ज्यून होईना का छन। उन सब वाँ यीशुक दगाड़ होला। उक बाद, यीशु अपून लोगून का दगाड़ रौलो। जब उन एक दगाड़ रौला त उनार पास हमेशा खिन पूरी शान्ति होलि।

यीशु ले उमें विश्वास करून वाल हरेक जन स एक मुकुट दीना को वादा करीना को छै। उन हमेशा खिन परमेश्वरा का दगाड़ हरेक चीज में राज्य कराला। उनार पास सिद्ध शान्ति होलि।

लेकिन परमेश्वर उन सबून को न्याय करोलो जो यीशु में विश्वास नै करना। उ उनून नरक में डाल द्योलो। वाँ उन रोला और अपून दाँत पीसाला, और उन हमेशा दुख में रोलो। कभी न बुझून वाली आग उनून हमेशा जलूनै रोलि, और कीड़ा उनून खाँला।

जब प्रभु यीशु वापस आलो, त उ पूरी रीतिका ले शैतान स और उक राज्य स नाश कर द्योलो। उ शैतान स नरक में डाल द्योलो। वहाँ शैतान हमेशा खिन जलनै रोलो, उन सबून का दगाड़ जिनूनले परमेश्वर की बातून मानना का बजाए शैताना का पीछे चलना का चुनाव करछ्य।

क्याखिनकि आदम और हव्वा ले परमेश्वर की हुकुम नै मान्यो और पाप स यो संसार में लीभेरन आयान, परमेश्वरेले ऊस श्राप दीछ और ऊस नाश करना को फैसला करछ्य। लेकिन एक दिन परमेश्वर एक नय्या स्वर्ग और एक नय्या धरती बनालो जो सिद्ध होला।

यीशु और उक लोग उ नय्या धरती में रौला, और यीशु हमेशा खिन सब चीजून में राज्य करोलो। और उ लोगून का आँखान भटे आँसून पोंछ द्योलो। फिर कोई ले तखलीफून में या दुखून में नी होलो। नै कोई रोलो। नै उन बीमार होला और नै मराला। और वाँ ले बुराई नी होलि। यीशु अपून राज्य में न्यायपूर्वक, और शान्ति का दगाड़ राज्य करोलो। उ हमेशा खिन अपून लोगून का दगाड़ रौलो।