16. छोड़ायना वाला

यहोशूया गोजना लो:ढो इसराइली कि पोनोमोसोर या हुकुम उमाय मानेयो। होकि पोनोमोसोरया नियमते पालन उमाय कारायो, रो होकि हो कारार काराल राइजते बनचे आवना कनानीकि बाहरे मु:किमोय। इसराइलीकि आडिकिया सो:तो पोनोमोसोर, यहोवा ते मेलाय कोन कनानी देवताकिया उपासना कारायना सुरुगोठोकि। इसराइलीकिया बो:ते कोलेन उमाय आवखो: होवाथोम बेहारते इघाय बेस ला:कि होघायगा होकड़ कारायो।

पोनोमोसोर या हुकुमते उम मानेनाया कारण इसराइली कि मोन्ज पद्धतिते सुरु कारायगोठोकि होजे घरी घरी दोहरायोकि। उ पद्धति उघाय चालेकिनो थोरेक मेमोन जोउ इसराइलीकि पोनोमोसोरया हुकुमते उमाय माने: ला: होकड़ होकिते बोइरिकिया तय हरुवायना कारण दण्ड तेरे। हो बोइरि इसराइलीकि तय होकिया सोउब जिनिसते लुसुयेकि, होकिया सम्पति ते जो नष्ट काराय गोड़ेकि, रो होकिया जुघाय किते तार गोड़ेकि, ला: इसराइलीकिया बोइरि होकिया तोबलुन्ग ते जुघाय मेमोन जोउ अत्याचार कारायकि होकड़ा लो:ढो इसराइलीकि आडिकिया पापतय पश्चाताप काराय कोन पोनोमोसोर होकिते बनचायनोथोम सिनेलिमोय।

सोउब भेरे इसराइलीकि पश्चाताप काराययेमोय ला: पोनोमोसोर होकियते बनचाय। होकि मोन्ज छोड़ायना वालाया माध्यम बुन्ग उघाय कारायये– मोन्ज उघाय जे होकिया बोइरिया बिरुध लाड़ेना ओडो होकिते हरुवाय गोड़े। ला: राइज ते शान्ति होइना रो हो छोड़ायनावाला होकिया तोबुलुन्ग ते बेल बो: सासान कारायये। पोनोमोसोर हो लेबु किते बनचायना थोम जुघायगा छोड़ायनाकिते डान्गो। पोनोमोसोर पासेया गा मोन्ज बोइरि जाति, मिद्यानीकिया माध्यम बुन्ग इसराइलीकिते हरुवाय कोन ओडो उघाय काराय।

मिद्यानीकि थाम मेमोन जोउ इसराइलीकिया फसलकिते लुसोयोकि। इसराइली लेबुकि जुघाय बोतोन्ग गोडखोकि, ओडो होकि हो माड़ाते लुकेगोडखोकि ताकि मिद्यानी लेबुकि होकिते लामना उमाय पाले। ला: होकिते बनचायना थोम होकि पोनोमोसोर ते रेमा:खो:मोय।

गिदोन यिमिया मुडु इसराइली लेबु आवखो। मुसनिन्ग होकड़ उम योना ठाँड़ो ते गोहोम एननाला:खो तोकि मिद्यानी लेबुकि चोरायना उमाय पाले। यहोवा या कोनघेर गिदोनया बो:ते डेलकोन होकड़ते गामो, “हे शूरवीर सूरमा, पोनोमोसोर आमा: सोरि आइज धाँय रो इसराइलिकिते मिद्यानी कियाते बनचाय।”

गिदोनया आबाडोमा: पासे मूर्ति कियाथोम मोन्ज बेदी आवखो। सोबकड़ा सुरुते जे पोनोमोसोर गिदोनते कारायनाथोम गामो होकड़ हो बेदीते पिजना आवखो ला: गिदोन लेबुकिते बोतोंगना ला:खो, होवाथोम होकड़ इडिब होइना बो:सुयो। ला: होकड़ हो बेदीते पिज कोन खाँड़ा खाँड़ा कारायगोठो। होकड़ पोनोमोसोरया थोम मोन्ज बेदी बायो ओडो होकड़ पोनोमोसोर याथोम बलि ओडेफो।

होडोन्ग मेया लेबुकि योयोकि नो जहाँय हो बेदीते पिज कोन खाँड़ा खाँड़ा कारायगोडसि होवाथोम होकि उघाय खिसाय गोडकिमोय। होकि गिदोनते तारनाथोम आडिया हो: चोलकिमोय ला: गिदोनया आबाडोम गामो, “आमपे ई:ना देवताकिया मदाइत कारायना लामतेपे? मुदा होकड़ देवता हेके ला: होकड़ते स्वयं आडिते बनचायना तेरेपे।” उवाथोम नो होकड़ उघाय गामो ला: लेबुकि गिदोनते उमाय गिलो:।

ला: इसराइलीकिते लुसुनाथोम मिद्यानीकि ओडोगा डेलकिमोय। होकि हेबने जुघाय आवखोनो होकि कोलडोम जो उमाय कोलडोन्गना ला:खो। गिदोन होकिया बिरुध लाड़ेना थोम इसराइलीकिते मोन्ज सोरिते रेमाखो। गिदोन पोनोमोसोरतय दुइठो चिन्हा बोरो: ला: होकड़ते विश्वास होइना पाले नो पोनोमोसोर सो:तोगा होकड़ते इसराइलीकितय बनचायनाथोम गामतेज।

पहिला चिन्हायाथोम गिदोन भेड़ीया उलुई ते उसलोते उनो: रो पोनोमोसोरते गामो मेयागा ओस बुन्ग भेड़ीया हो उलुई ते गुरगुड़ु र उसलो कोसोर आउगुड़ु। पोनोमोसोर उघायगा करायो। होडोम इडिप होकाड़ पोनोमोसोर ते गामो नो उसलो सुड गुड़ु रो भेड़िया उलुइ कोसोर आउगुडु। पोनोमोसोर उघायगा कारायो। उ दुइठो चिन्हाया कारन गिदोन विश्वास कारायो नो सो:तोगा होकड़ इसराइलीकिते मिद्यानीकियातय बनचाय।

ला: गिदोन पालटन किते आडिया बो:ते रेमाखो ओडो 32,000 लेबु डेलकि मोय। ला: पोनोमोसोर होकड़ गामो: उकि ढेइर जुघाय आइज। ला: गिदोन हो मेसे 22,000 हो: डान्ग गोठो जे नो लाड़ेनाथोम बोतोन्ग ना ला:खोकि। पोनोमोसोर गिदोनते गामो: नो उ लेबुकि तमा जो जुघाय आइजकि। होवाथोम गिदोन 300 पालटन किते मेलाय कोन सोउबते हो: डान्ग गोठो।

हो इडिब पोनोमोसोर गिदोन ते गामो, “मिद्यानीया छावनी ते धाँय रो होकिया कायोमते ओन्डोरे। ला: आम ओन्डोरे नो इ कायोमतजकि ला: आम होकिया तुबलुन्गते हामला कारायनाथोम अबुबोतोन्गनाम।” होवाथोम हो इडिब, गिदोन तुता होकिया छावनीते चोलकि रो होकड़ मोन्ज मिद्यानी पालटन सान्गोते हो कायोम बतायना ओन्डोरो जे होकड़ मुनुबुन्ग योसि:खो। हो लेबुया सान्गोडोम गामो, “उ मुनुया अरथ होइता नो गिदोनया पालटनकि आनिन मिद्यानी किते हरुवाय गोड़ेकि।” ला: गिदोन ओन्डोर कोन पोनोमोसोरया स्तुति काराय।

ला: गिदोन आडिया पालटन किया बो:ते डेलकि रो होकि बुन्ग होकिते मोञ मोञ बिगुल, मोञ लो:खाया कूयु ओडो मोन्ज मसाल तेरो। होकि हो छावनीते घेरायोकि आते नो मिद्यानी पालटनकि लेमे:ना ला:खोकि। गिदोन या बो:ते 300 पालटन कि आडिकिया मसाल कूयुते डालसि:खो होवाथोम मिद्यानी लेबुकि हो मसालया पतारते योना उमाय पालो:।

ला: गिदोनया सोउब पालटनकि आडिकिया कूयुकिते मोन्ज सोरि पि:गोठोकि अचकागा हो मसालतय तिमसोन्ग मु:की। होकि ओडिकिया बिन्गुलते हुमपेर कोन गुल कारायोकि “यहोवा या ति:तय गिदोनया तलवाइर!”

पोनोमोसोर मिद्यानीकिते घबराय गोठो, ओवाथोम होकि एक दुसरे तेगा डेजना ला:किमोय। ला: गिदोन हो सन्देश तेरना वाला ते जुघाय इसराइली किते मिद्यानीकिया पीछा कारायनाथोम होकिया मदाइत कारायन रेमा: डान्गो। होकड़ हो मेसे जुघाय किते तार गोठो रो बाकि या पाछड़ाय कोन होकिते इसराइल राइजतय बाहरे ओज गोठो। हो नेडा 1,20,000 मिद्यानीकि तारडोमकिमय। उ लेखे पोनोमोसोर इसराइलीकिते बनचायो।

हो लेबु गिदोनते आडिकिया कोलेन बायना ला:मोकि, ला: गिदोन होकिते उघाय कारायना उम तेरो, ला: होकड़ होकिते हो सोनाया सिंगार किते बोरो: जे सोउब मिद्यानीकिया तय लुसुसिखोमोय। हो लेबुकि जुघायगा सोना गिदोनते तेरो:मय।

ला: गिदोन हो सोनातय मोन्ज खास लुतुई बायो इघाय नो महाकालोकि सुतेकि। ला: लेबुकि होकड़ा उपासना कारायना सुरु कारायगोठोकि जे लेखे आडि मोन्ज मूर्ति हेके। ला: पोनोमोसोर ओडो इसराइली किते साजाई तेरो: होवाथोम नो होकि मुर्तिया आराधना कारायसि:खोकि। पोनोमोसोर होकिते होकिया बोइरि बुन्ग हरुवाना थोम सक्षम कारायो। आखरिकार होकि ओडोगा पोनोमोसोरतय मदाइत लामना थोम सेनेलियोकि रो पोनोमोसोर होकिया बो:ते होकिते बनचायनाथोम मोन्ज छोड़ायनावालाते डान्गो।

उ कायोम घरी घरी होइकि, होवाथोम इसराइली लेबुकि पाप कारायकि, पोनोमोसोर होकिते साजाई तेर, होकि पश्चाताप कारायकि ओडो पोनोमोसोर होकिते छोड़ायनाथोम जहाँते डान्गे। जुघाय मेमोनया लो:ढो जो पोनोमोसोर ढेइर छोड़ायनाकिते डान्गो होकि इसराइलीकिते होकिया बोइरितय बनचाय।

आखिरकार, हो लेबुकि होडोम राइजया लेखे पोनोमोसोरयातय मोन्ज कोलेन बोरोकि। होकि मोन्ज उघाय कोलेन लामना ला:खोकि जे लम्बा ओडो पाड़ोमदार होइना रो लाड़ोईते होकिते आन्जोरे। पोनोमोसोर उ निवेदन बेस उमला:कि, ला:जो होकड़ होकिते कोलेन तेरो जे लेखे होकि बोरखोमय।