45. स्तिफनुस ओडो फिलिप्पुस

पोहिल मसीही अगुवा किया मोझिते स्तिफनुस ञीमी या मोईंग लेबु आवखो। सोबगा होकडा आदर करायना लाःखो मोय। लोरेंग जातोम होकड़ ते जुघगा आकिल ओडो पाड़ोम तेरखो। स्तिफनुस जुघयगा चमत्कार करायसिखो। जे भेरा होकड़ यीशु या ते असरा करायना बार बुंग शिक्षा तेरो ला जुघय लेबुकि होकड़ तभलुंग ते असरा करायोकि।

मुसनिंग, स्तिफनुस यीशु या बारे शिक्षा तेरान लाखो आडो उघय यहूदी कि डेलकिमय जे नो यीशु या ते असरा उमय करायनालाखो रो होकड़ा सोरी बाद-विवाद करयाना शुरु गोठोकि। होकि मुरुक खिसायगाठकि मोंय रो धार्मिक अगुवा बोते चोकोन ठकाए कायोम ते गामोकि। होकि गामोकि,’’ येले स्तिफनुस ते मूसा ओडो पोनोमोसोर सा बार आनिष कायोम गामना ओडोरसिले!’’ होवाथोंग धार्मिक अगुवा कि स्तिफनुस ते तोलकोन होकि होकड़ते महायाजक ओडो यहूदिकिया होडोम अगुवाकिय बोते ओलकोन डेलकिमोंय। रो ओडो जो ठकरा गवाह डेलकिमय रो स्तिफनुसया बारे ठकायना कायोम ते गामोमय।

महायाजक स्तिफनुस ते जुंगो,’’ई उ लेबु कि आमा बार सोक्तो कायोम गामते मय ?’’ स्तिफनुस महायाजक ते गामना थोंग जुघगा कायोमते गामना लाकि। आडि गामोनो अब्राहम तय डोडकोन यीशु या नेडा भेरे पोनोमोसोर इस्राएली लेबु या थोंग जुघयगा आनोखे कामु करायों। लेकिन लेबुकि सोभ भेरे पोनोमोसोर या हुकुम ते उमय मानेयो। स्तिफनुस गामो,’’ आमते पोनोमोसोर या विरुद्ध हठीले ओडो बलवा करयाना वालहोके पे। आमपे हमेशा लोरेंग जातोम ते अस्वीकार करयसिंपे, जेघय आनिया पुरखाकि सोब भेरेगा लोरेंग जातोम या अस्वीकार करयसिखोकि रो होकड़ भविष्यवक्ताकि ते तार गोठोकि। ला जो जे होकि करययिखकि होकिया तुलना बुंग आमपे ओडो जो जुघय आनेष कामु करायो पे! आमपे मसीह तेर गोठो पे।’’

जे भेरे हो धार्मिक अगुवा कि उजे ओडोरोकि, हाकि हेबने खिसयगोटकि मय नो आडिकिय लुतुर ते बंद करायकोन जोर जोर बो गुल कोरायोकि होकि स्तिफनुस ते घसिरायोकोन बाहरे डोडगोठोकि ओडो तार गोडना थोंग सोरेंग तारो मय।

जे भेरे स्तिफनुस गोंज लाखो, होकड़ जीबरेकि,’’ हे यीशु, ईञा जातोम ते ग्रहण कराय!’’ रो आडि ठेहुुनायाकोन ओडो जीबरेकि,’’ हे प्रभु, उ पाप होकियाते अबु लागाएम।’’ रो गोंज गोठकि।’’

हो नेडा ते यरुशलेम ते आवनावाला जुघय लेबुकि यीशु या चेलाकिते सातयना शुरु करायगोठोकि, होवथोंग विश्वासी कि होड़ोम ठाड़ो ते यार गोठोकि। लाजो होकि, जहाँ ती जो चोलकि मोय यीशु या बारे प्रचार करायोमय।

फिलिप्पुस ञीमी या यीशु या मांेईग विश्वासी आवखो। जैसन नो जुघयगा विश्वासीकि विश्वास करायसिखोमय होकि जो यरुशलेम तय यार गोठोकि। होकड़ सामरिया क्षेत्र में चोल गोटकि।होते होकड़ यीशु या बारे लेबुकिते प्रचार कारयो। जुघय लेबु होकड़ काढ़ीछोमय रो उद्धार ते कुयोमय।मुसनिग फिलिप्पुस या बोते पोनोमोसोर या तीः तै माईंग लोरेंग जातोम डेलकोन किनिर ती मोईंग संड़क ते चोन थोंग गामो। फिलिप्पुस होते चोल गोटकि।जे भेर होकड़ हो सड़क ते चोना लाखो ला माईग लेबुते आडिया रथ ते चोना योयो। हो लेबु कुश राईज या मोईग महत्वपर्ण अधिकारी औखो। लोरेंग जातोम फिलिप्पुसते गामो नो हो लेबु या सोरी सोरी धांय।

हावाथोंग फिलिप्पुस रथ या बोते चोलकि। होकड़ ओडोरो नो हो कूशी पोनोमोसोर या वचन ते पढे़तय।जे यशायाह भविष्यवक्ता लिखासिखो होजे होकड़ पढेना लाखो। होकड़ पढ़ेना लाखोनो,’’ होकि होकड़ते तारडोमन वाला भेड़ी या लेखे डोडगोठोकि,ओडो जैसन नो माईंग भेड़ी कोरोब आवता, होकड़ जो मोईग कायोम जो उम गामो। होकि होकड़ सोरी आनेष व्यवहार करायकोन होकड़ आदर उमय करायो। होकि होकड़ जियोम डोडगोठोकि।

फिलिप्पुस हो कूशी ते जुंगो,’’ जे आम पढे़तैःडेम ई आम होज समझेतैःडेम ?’’ हो कूशी गामो,’’ उमबो। जब तक ईंग ते उजे जहाँय उमय समझाए, ईंग उमिंग समझेना पाले। कृपा करायकोन ईया बोते डोकोना।यशायाह उजे आडिया बारे लिखते नो होड़ोम या बारे ?’’

फिलिप्पुस रथ ते डेपकोन डोकोगोटोकि। ला होकड़ हो कूशी लेबु ते उ बता यों नो यशायाह यीशु या बारे उतुनसी। फिलिप्पुस ओडोजो पोनोमोसोर या वचन या होड़ोम भाग ते जो बतायो। उलेखे होकड़ हो लेबु ते यीशु या बारे शुभ संदेश ओबडोरो।

फिलिप्पुस ओडो हो कूशी चोलकोन डायाबोते डामकिकियार। हो कूशी गामो,’’ योयं! उते डाआ आई! ई ईंग बपतिस्मा डोडना पालतींग रो होकड़ रथ चलायना कड़ते रोकयना गामो।

ल होकियार डाआः ते चोल गोटकियार, रो फिलिप्पुस हो कूश ते बपतिस्मा तेरो। जे भेरा होकियार डाआः तय बहरे डेलकिकियार ला लोरेंग जातोम आचकगा फलिप्पुसते बेरोड़कोन होड़ोम ठाडा़ेते डोगोठो। होते फलिप्पुस यीशु या बारे बातैना उम मेलायो।

हो कूशी आडिया ओः रोक्षोप मुगाम चोलकि। होेकड़ लेरेकिनो तमा ईंगा यीशु ते कोंगतेईडींग।