46. पौलुस मसीही विश्वासी बोनेगोता

शाऊल ञीमी या मोईंग लेबु आवखो होकड़ यीशु या ते आसरा उम केरयना लाखो। जे भेरे जवान आवखो, होभेरे स्तिफनुस ते तारना वाला लेबु किया लुतुई ते आगुरना लाखो लोहडो होकड़ विश्वासी किते सतायना लाखो होकड़ यरुशलेम ते चोल कोन लेबु किते रो कोनसेलडुकित ओः ओः चोलकोन धोनालाखो रो बंदीगृह ते डिबयानालाखो। हो भेरे महायाजक शाऊल ते दमिश्क नगर ते चोना थोंग अनुमति तेरो। होकड़ हो मसीही कीते तोलना रो होकि ते यरुशलेम डोडकोन चोन थोंग शाऊल ते गामो।

ल शाऊल दमिश्क चोना शुरुयो। हो नगर ते डामना सेंग होकड़ सोब रोक्षोप तोबलुंग तै मोंईग ओसेल पतार चमकेकि रो,आडि उसलोते गुरगोठकि।शाऊल जहाएते गामना ओनडोरो,’’ हे शाऊल हे शाऊल! आम ईंग ते ई ना सतातैडेम ? शाऊल जुंगो,’’ हे प्रभु,अम बेर हेकेम ?’’ यीशु होकड़ते जवाब तेरो,’’ ईंग यीशु हेकिंग। बेहते नो आम सतातैडंम।’’

ल शाऊल बेरोडकिला योना उम पालना लाखो। होकड़ सेगो कि होकड़ ते दमिशक ते डोडकोन चोलकि मय।शाऊल उफे नेडा जौ ई जो उम ञोखो उःठ।

दमिश्क ते हनन्याह ञीमि या मोईग चेला आवखो। पोनोमोसोर होकड़ ते गामो हो ओः ते धाय आते नो शाऊल ठहरेसिखो। अमा तीः ते आडिया बोकोब ते उने नो ओडो योना पाले।’’ला हनन्याह गामा,’’े हे पोनोमोसोर ईंग ओडोरसिडिंग नो उ लेबु विश्वासीकिते ईघय सताएसि। पोनोमोसोर होकड़ते गामो,’’ धाय ईंगा होकड़ते यहूदिकिया ते रो होडोम जातिकिया मोझीते ईया ञीमि या घोषण करायनाथोंग चुनाएसिडिंग। होकड़ ईया ञीमि या थोंग जुघागा कष्ट साहेए।

ल हनन्याह शाऊल या बोते चोलकि, रो आडिया तींः ते होकड़ा तोभलुंग ते उनो, रो गामो,’’ यीशु ईंग ते, उते डांगसि जे अमपे गोझुंग ते आमते ओबयोडोसिखो,ताकि अम ओडो योना पालेम रो लोरेंग जातोम बुंग भोरेगोडनम।’’ जल्दीगा शाऊल योना लाकि रो हनन्याह होकड़ ते बपतिस्मा तेरो। ला शाऊल भोजन करायकोन पाडोमदार होईगोठकि।

हो भेरे तय, शाऊल दमिश्क ते औवना वाला यहूदी कि ते प्रचार करयना शुरु गोठों। होकड़ गामो,’’ यीशु गा पोनोमोसोर या बेटा डोम मसीह हेके!’’यहूदी लेबुकि अचम्भित होईकिमय उवा थोंग नो शाऊल विश्वासी किते तार गोड़ना थोंग प्रयास करयसिखों,ला तमा आडि यीशु या ते आसरा करायते। शाऊल यहूदी किय सोरी वाद विवाद करायों।आडि ओबयोंयोंनो यीशु गा मसीह औखो।

जुघय नेडा या लोढो यहूदीकि यीशु ते तारगोड़ना थोंग योजना बायोकि। होकि होकड़ते तारगोडना थोंग नगर ते लेबु किते डांगोमय नो होकड़ते योंए मय लेकिन शाऊल हो योजना या बारे ओन्डोरडोठो, रो होकड़ा संगो डोमकि होकड़ ते बंचैनाथोंग मदेईत करायो मय। मोईग ईडीप होकि होकड़ ते टकुनू हिनते डोबकोकोन नगर या भीत तुताते अबरेगोठोमय। दमिश्क तय बंचेकोन डेना लोढो शाऊल यीशु या प्रचार करायना उम मेलायो।

शाऊल प्रेरितकि बुंग मिलेना थोंग यरुशलेम चोलकि, लेकिन होकि होकड़ते बोतोंगना लाखोमय हो भेरे बरनबास ञीमि या मुडु विश् शाऊलते प्रेरित किय बोते डोडकोन चोलकि। होकड़ होकिते बतायो नो शाऊल उघय साहस करायकोन दमिश्क प्रचार करायसिखो। होकड़ लोढा प्रेरितकि शाऊल ते स्वीकार कराय गोठोकि।

थोरे विश्वासी कि यरुशलेम ते सताव भेरे यारगोडसिखो मय होकि डिसा अंताकिया नगर ते चोल गोड़खो मय रो यीशु या बारेे प्रचार करायनलाखो मय। अंताकिया ते औनावाला जुघय लेबुकि यहूदी उमय औखो ला जो पोहिली बेर हो मे से जुघय लेबुकि विश्वासी बोनेगोडखोमय। बरनबास ओडो शाऊल हो तोनमे विश्वासी किते यीशु या बारे जुघय सिखैनाथोंग होते चोलकि कियार रो कलीसियते मजबूत करयोकियार। यीशु या त आसरा करायनावालाकि पोहिली बेर अंताकिय हिनतेगा ’’मसीही’’ गामडोमकिमय।

मुसनिंग,अंताकियाया मसीही लेबुकि उपवास करायकोन सेनेलना लाखो मय। लोरेंग जातोम होकि ते गामो,’’ ईंया थोंग बरनबास ओडो शाऊल ते हो कामु करायना थोंग हिगरायगोडेपे हो कामु करायानाथोंग ईंग होकियार ते रेमासिडिंग।’’ होवथोंग अंताकियाया कलीसिया बरनबास ओडो शाऊल या थोंग सेनेल कोन होकियर ते आडकिया तीञ ते उनोकि। ला होकि होकियार ते होड़म होड़म ठाढोते यीशु या बारे शुभ संदेश ओबडोरना थोंग डांग गोठोकि। बरनबास ओडो शाऊल होडोम होडोम जैतिय या लेबु कित शिक्षा तेरोकियार ओडा जुघय लेबुकि यीशु या ते आसरा करायोमय।