49. पोनोमोसोरया तोनमे कारार

मोन्ज ओनघेर मोन्ज जवान कोनसिलइह ते गामो आम पोनोमोसोरेया बेटाते जनम तेरेम। होकड़ तमा डिंडागा आवखो: ला: लोरेन्ग जातोम होकड़ा बो:ते डेलकि रो होकड़ा लाआजते आवकि रो होकड़ मोन्ज बेटाते जनम तेरो रो होकड़ा ञिमि यीशु उनो:। होवाथोम यीशु पोनोमोसोर ओडो लेबु उबरगा हेके।

यीशु जुघायग चमत्कार कारायो जे आबियोते नो होकड़ पोनोमोसोर हेके। होकड़ डा:ते सानगोडकि ओडो आँधीते थामाय गोठो होकड़ कोसु लेबुकिते बेस कारायो रो जुघायगा लेबकियातय आनेस जातोम ते ओछो:। होकड़ गोज कोन लेबुकिते बोबरोल गोठौ ओडो होकड़ मोलोय कोलोन्ग ओडो उबरठू: काडोन्ग बुन्ग 5,000 लेबुकिते ओबयोंना थोम जुघाय गा भोजनते तेरो:।

यीशु मोन्ज महाँ मास्टर जो आवखो:। जेगा आडि शिक्षा तेरो: होकड़ होजे बेसबो शिक्षा तेरो:। जहाँयगा होकड़ लेबुकिते कारायना थोम गामते होजे कारायना चाहि उवाथोम नो होकड़ पोनोमोसोर या बेटा डोम हेके। उदाहरणया थोम होकड़ सिखायो नो आमपेते होडोम लेबुकिते होधायगा पेरेम कारायना आइज जे लेखे आनिन्ग आपनेते पेरेम काराय तेनिन्ग।

होकड़ उघाय जो शिक्षा तेरो नो आमपे सोउब जिनिसतय जुघाय रो निजया सम्पतितय जो जुघाय पोनोमोसोर ते पेरेम काराय ना चाहि।

यीशु गामो: नो धरती ते जहाँगा जिनिसते कुइनातय जुघाय बेस आइज पोनोमोसोर या राइजते होइन। होकड़ा राइजते आमपेते डियारनाथोम जरुरी आइज आनिया पापतय बनचाय।

यीशु गामो: नो थोरेक लेबुकि आडिते ग्रहण कारायमोय। पोनोमोसोर होकिते बनचाय। मुदा होडोम कि आडिते ग्रहण उमाय काराय। होकड़ उघायजो गामो: नो थोरेक लेबुकि गाहबार उसलो लेखे आइज मोय ईना:थोम नो होकि यीशुया बारे शुभसन्देशते स्वीकार कारयते मोय रो पोनोमोसोर होकिते बनचायते। मुदा थोरेक लेबुकि गो:झुन्ग सितिलया ढिठोब उसलो लेखे आइज मोय। पोनोमोसोर या वचन जआन्गया लेखे गो:झुन्गते गुरता ला: होते ईजो उम पोडता। उकि यीशु या सन्देश ते अस्वीकार कारायते मोय होकि होकड़ा राइजते डियार ना थोम अस्वीकार काराय गोडतेकि।

यीशु सिखायोनो पोनोमोसोर पापिकिते जुघायना पेरेम कारायते होकड़ होकिते क्षमा कारायना लामते ओडो होकिते आडिया बेटा बयना लामते।

यीशु उजो बातायो नो पोनोमोसोर पापते घिनायता। उवाथोम नो आदम ओडो हव्वा पाप कारायो कियार होवाथोम होकिया सोउब बंशजकि जो पाप कारायो मोय। ऊ धरती ते आवनावाला सोउबगा पाप काराय कोन पोनोमोसोरयातत डिस्सा: आइजकि। सोउबगा पोनोमोसोर या बोइरि हेके मोय।

मुदा पोनोमोसोर ऊ धरती ते आवना वाला सोउब लेबिकिते उ लेखे पेरेम कारायते नो आडिया मोन्जगा बेटाडोमते तेरगोठो ताकि पोनोमोसोर होकिते साजाई उम तेरे जे होकड़ा तोबलुन्गते विश्वास कारायते। होवाथोम होकि होकड़ा सोरि सोउब नेडा आवना मोय।

आमपे गोजना लेखे आइजपे, उबाथोम नो आमपे पाप कारायसि:पे। आमपा तोबलुन्गते पोनोमोसोर या खिसायना बेस हेके मुदा उकड़ा ओवजिते पोनोमोसोर यीशुते खिसायकि। होकड़ यीशुते क्रुसया मृत्युदण्ड तेरो।

यीशु कहियो जो पाप उम काराय सिखो: ला:जो पोनोमोसोर होकड़ते साजाइ तेरो। होकड़ गोजगोडना स्वीकार कारायो, उ लेखे आनिया पापतेरो उ धरती ते आवनावाला सोउब लेबुकिया पापत बेबरुड डोननाथोम मोन्ज सिद्ध बलिदान आवखो:। यीशु आडितेगा पोनोमोसोर या थोम बलिदान काराय गोठो, होवा थोम पोनोमोसोर जहाँ लेखेया पापते उलेखेनो महाँ पापते जो क्षमा कारायते।

भलेगा आनिन जुघायगा बेस कामुते कारायतेनिन्ग ला: जो पोनोमोसोर आनिन्गते उम बनचाय। होकड़ा सानगो होइनाथोम उघाय ईजो उम्बोड़ि:ज जे आनिन्ग कारायना पालतेनिन्ग। उकड़ा ओवजीते आनिन्ग ते विश्वास कारायना आइज नो यीशु पोनोमोसोर या बेटाडोम हेके ओडो आनिन्गया बदलेते क्रुसते गोज गोडकि ओडो ऊ जो नो पोनोमोसोर होकड़ते बोबरोल गोठो यदि आमपे उकड़ाते विश्वास कारायतेपे ला: पोनोमोसोर आमपा: पापते क्षमा काराय गोड़े।

पोनोमोसोर हो सोउबते बनचाय बेहार नो यीशुयाते विश्वास कारायते ला: आडिया प्रभु स्वीकार कारायते। मुदा होकड़ होकिते उम बनचाय बेहारकि नो होकड़ाते विश्वास उमाय कारायते। उकड़ ईजो मयने उम उनते नो आमपे किसड़ो या गरीब लेबुया कोनसिलडु:, बुढ़ा या जवान, रो आमपे आते आवतापे। पोनोमोसोर आमपेते पेरेम कारायते रो चाहेते नो आमपे यीशुयाते विश्वास कारायपे नो आडि आमपा: सान्गो बोनेना पालेह।

यीशु आमते रेमा:तेज नो होकड़ा तोबलुन्गते विश्वास काराय कोन बपतिस्मा डोड़ेपे। ई आम विश्वास कारायतेम नो पोनोमोसोर या मोन्जगा बेडडोम यीशुगा मसीह हेके? ई आम विश्वास काराय कोन गामतेम न आम मोन्ज पापी हेकेम रो पोनोमोसोर या ति:तय आमते साजाई कुईना वाला आइज? ई आम विश्वास कारायते नो यीशु आमा: पापते मेटायनाथोम क्रुसते गोज गोडकि?

यदि आम यीशुया तोबलुन्गते रो जेगा आमा:थोम कारायसि: विश्वास कारायतेम ला: आम मोन्ज मसीह हेकेम। डुबो: आब आडिया येलोन्ग राइजते आमा: तोबलुन्गते सासान उम काराये। अब पोनोमोसोर आडिया पतार राइजते आमपा: तोबलुन्ग सासान काराये। होकड़ आमपेते पाप कारायनातय रोकाय गोडसि: आजे नो आनिन्ग कारायना ला:सिखोहनिन्ग। होकड़ आमपेते मोन्ज तोनमे बेस जीवन तेरसि:।

यदि आम मोन्ज मसीह हेकेम ला: जे यीशु कारायसि: होकड़ा थोमगा पोनोमोसोर आमपाह पाप ते क्षमा काराय गोडसि। अब पोनोमोसोर मोन्ज बोइरिकिया आपेक्षा आमपेते मोन्ज गहरा सान्गो मानते।

यदि आम पोनोमोसोरया सान्गो हेकेम ओडो प्रभु यीशुया सेवा कारायना वाला हेकेम ला: हो कायोमकिते कारायना थोम इच्छा कारायपे जे नो यीशु सिखायते। भलेगा आम मोन्ज मसीह हेकेम, डुबो: तामा जो पाप कारायना थोम आमपा: परिछा काराय। ला: पोनोमोसोर सोउब भेरे होघाय कारायते जे गामते नो आडि काराय। होकड़ गामते नो यदि आम आमा: पाप ते माने डोडतेम ला: आमते आडि क्षमा काराय। होकड़ आमपेते पाप या बिरुद्ध लाड़ेनाथोम पड़ोम तेरे।

पोनोमोसोर आमपेते सेनेलना रो आडिया वचनते पढ़ेना गामते। आडि आमपेते ओडो जो विश्वास किया सोरि मिलेकोन आराधना कारायना थोम गामते। आमपेते होडोम लेबुकिते जो बतायना आइज नो होकड़ आमपा:थोम ई कारायसि:। यदि आमपे हो सोउब कामुते कारायतेपे ला: आमपे होकड़ा मोन्ज सो:तो पक्का सान्गो बने गोडनापे।