3. ड़ढ़ो कथा

महस टेमो थल, धरति रिंङ महसे मीहरे बंङज़ी लेहतिर। दोरे महस मांजी ए झगड़ा लहजाड़ बणेंकी इलज़ि तोईरे। दू टेमो मीहरे धोंण मदम कम लहज़ी लेहकी तोईरे कि दोरे अतंङ साते ला माह बेवातेर। दि मीहतु मदम कम खंड्रा परमेश्वरे इच्चा फेंसला लहरी कि गेह दि भत्ते धरति मोहड़े ड़ढ़ा रंङ साते योहच़ी च़रपोग।

पर परमेश्वर नूह रंङ साते महस खुश तोहई। दू इच्चा धर्मी मीह तोहई अंऊ मदम मीहतु बिचंङ बंङज़ाते। झांह लेह परमेश्वरे दू डढ़ो पाहठी नूह बि कंङे च़रति, कि गेह इच्चा मोह्ड़े डढ़ो दोरच़ी दि धरति नष्ट लेह च़रपोग।” झांह लेह, दोई नूह बि इच्चा मोह्ड़े नाव बणाएच़िमी थल्जी कुई।

दोहथल परमेश्वरे नूह हखा कुई, कि केई सिंङों इच्चा मोह्ड़े किश्ती बणाएतु, अतु लम्बाई लगभग 140 मीटर, 23 मीटर बेह्लै ए 13.5 मीटर ऊंचाई रंङ साते शुहबी जुंस केई दू किश्ती रिंङ इच्चा कल्ल इच्चा पेतंङ, दंङ दोऊ अंदरेग षुमु कमरा बणाएतु। दि कीश्ती कनु ए कांह टबरातु ए धरतिऊ भत्ते पाहठी जानवरा तिंङ दू ड़ढो दोरच़ी बचाएच़िमी थल्जी शोतो।

नूह ज़ि परमेश्वरो हुकुम मानेक्ति। नूह ए दोऊ षुमु योह ज़ि ठीक ध्वांए ठ्रोह कीश्ती तयार लहरिर छना परमेश्वरे दोतिंङ कंङाते। छना कुचे दू कीश्ती महस मोह्ड़े तोहई झांह लेह दोबि बणाएच़िमी थल्जी महस साल लेहकी इलि। नूह ज़ि मीहतिंङ अंज़ा ड़ढो पाहठी ला खबरदार लहरी कि परमेश्वरो टोईच़ी विशवास लंहि, पर मीहच़ी नूहो गप्पो टोईच़ी विशवास माह लहरिर, दंङ दोरे पापो जीवन श्रींङमी लेहतिर।

परमेश्वरे नूह बि हुकुम रांई, कि “का केनोह थल्जी, केनोह टबरातु थल्जी ए दंङ जानवारा तु थल्जी बगत ठ्रोहका लोह।” अपेहल भत्ते धिर तयार शुचि इलि, दंङ परमेश्वरे नूह हखा कुई, कि हेंतेग कनु, कांह मेच़ो, दंङ कनु षुमु योहो, दंङ कनु षुमु भोह्ड़ी तु कीश्ती रिंङ इबि टेम शुचि इलज़ा।”

परमेश्वरे भत्ते जानवारा तु नर ए मादा बि नूह कछंङ च़रची च़रति ताकि दोरे कीश्ती रिङ इबि तरपोर दंङ ड़ढो दोरच़ी बचाके तरपोर। परमेश्वरे झांह ठ्रोह जानवरा तु निहज़ी मादा तिंङ च़रति अंऊ दोतिंङ बलि चढ़ाएच़िमी थल्जी इस्तेमाल लहज़ी तोहई। अपेहल दोरे भत्तेर कीश्ती रिंङ पिचि इलिर दंङ परमेश्वरे एनेह कीश्ती ऊ पेतंङ बंद लेह च़रति।

दोहथर संदाड़ शुरू शुचि इलि, दंङ संदाड़ लगातार शुहबी लेहति, लगातार चालीस निरा ए चालीस रात शुहवा लहरी। संसारो हर इच्चा चीज ठुमशा इलि, देर तचेक कि मोह्ड़े बे मोह्ड़े गोह ला ति रिंङ ठुमशा इलि।

धरति रिंङ बंङज़ा भत्ते धिर योहसा इलि, पर कीश्ती तिऊ टोईच़ी लंहज़ी लेहति दंङ कीशती ऊ अंदरेग अंयो ला जानवर ए मीहरे तोईरे दोरे भत्तेर ठीक तोईरे।

संदाड़ बंद शुहबी रंङ साते, दू कीशती ङ़ा लाह तचेक तिऊ टोईच़ी लंह्ज़ि लेहकी तोहई, दंङ दू मुक्का ति ला थोड़े अरे कम शुहबी लेहति। दोहथल इच्चा ध्याड़ा दू कीश्ती इच्चा गोह टोईच़ी रूहम्ज़ा इलि, पर धरति ऊ टोईच़ी हेंतेह ला महस ति तोहई। षुमु लाहो थल, गोह मुख थोड़े-थोड़े तंङसी लेहति।

दंङ ऊई चालीस ध्याड़ो थल, नूह ज़ि इच्चा काह्गा बि दि खंड्रीमी थल्जी धकतेखा च़रति कि छि ति कारच़ी इलज़ा। दू काह्ग कारच़ी धरतिऊ थल्जी देखा नोखा फंज़ि लेहती, पर दोबि झांह ठ्रोह छल्ले ठाहरि माह खोकसिरी।

दोहथल नूह ज़ि इच्चा कबूतरी बि धकतेखा च़रति। पर दोबि ला कारच़ी धरति माह खोकसिरी, झांह लेह दू नूह कछंङ वापिस अच़ा अति। इच्चा हप्ता ओ थल दोई दू कबूतरी यहच़ा च़रति, दंङ दू एनोह आह रिंङ जैतूनो इच्चा ब्रन कुरच़ा वापिस अति। ति कम शुहबी लेहकी तोहई, दंङ पौधार यहच़ा धरति रिंङ तयार शुहबी लेहकी तोईरे।

नूह ज़ि इच्चा हप्ता रूहम्ज़ा दंङ षुमु फेरा रि ला कबूतरी बि धकतेखा च़रति। दोबि नहच़िमी ठाहरि खोकसा इलि दंङ दू वापिस माह अति। ति कारपि लेहकी तोहई।

झुह्ट लाहो थल परमेश्वरे नूह हखा कुई, “एंतेग का ए कांह भत्ते टबरार ए भत्ते जानवरार कीश्ती दोरच़ी धकते हुंच़ा अताई। परमेश्वरे दोतु थल्जी आशीष रांई कि महसे कटुरे ए पोत्र पोत्री ए परपोत्र ज़ेहक्पि लंहि दंङ धरति बि पिंङषा इलांई।” दोहथल नूह, एनोह भत्ते टबरार कीश्ती दोरच़ी धकतेखा रेंज़ा हति।

नूह कीशती ओ धकतेखा अपिमी थल, भत्ते बे मुंड़ा दोई इच्चा वेदी बणाएति दंङ बलि ओ थल्जी इस्तेमाल शुहच़ा ठ्रोह रैह जानवारा तु बिचंङ रै तु बलि चढ़ाएति। दंङ दोऊ अराधना लहरी। परमेश्वर दू बलि ओ दोरच़ी महस खुश शुचि इलि दंङ दोई नूह ए दोऊ टबरातिंङ आशीष रांई।

परमेश्वरे कुई, “गेह कसम लहज़ातग कि गेह मीहू दोरच़ी लहसी मदम कमो वहज़ा ज़ि गेह यहच़ा अपेहल ला गेह धरति बि शाप माह रमोग या ड़ढो दोरच़ी संसारो नाश लोहग माह, हालांकि मीह जेहक्पिमी बेहच़ी ए पापी तोह।”

दोहपल परमेश्वरे एनोह वायदा ओ निशानो रूपारिंङ मुंड़ो मुघतु धनुष बणाएति। अपेहल ला मुघतु धनुष खामोंई, ता परमेश्वरे हिद लोहतो कि दोई छि वायदा लहसी ततो। दंङ धवांए दोऊ मीहच़ी ला हिद लोहर कि परमेश्वरे छि वायदा लहसी ततो।