4. अब्राहमा रंङ साते परमेश्वरो वायदा

ड़ढो महस साल थल, संसारा रिंङ महसे मीहरे बंङज़ि लेहतिर, दंङ दोरे भत्तेर इच्चा ए बोली कुट्रातेर, झांह लेह दोरे इच्चा साते ठ्रोहका शुईरे दंङ इच्चा नगर बणाएशी लेहतिर। दोचि इदि-अईदि ऊ खिलाफ ए परमेश्वरो खिलाफ पाप लहज़ी शुरू लेह च़रतिर, दंङ परमेश्वरे छना दोतिंङ हुकम रांहषी तते, दोऊ हिसाबे दोरे भत्ते संसारा रिंङ पिंङषा माहरतिर।

दोरे महस घमंडी तोईरे, दंङ दोतिंङ छना ठ्रोह जीवन श्रीङंमी जूंस दि पाहठी दोरे परमेश्वरो भाषे लहज़ि माह जुंज़ातेर। देर तचेक कि दोच़ि इच्चा झांह ठ्रोह भीति बणाएच़ि शुरू लहरिर अंऊ स्वर्ग तचेक पिचि जूंस। परमेश्वरे खांई, कि “अगर दोरे इच्चा साते ठ्रोहका शुचि मदम कम लोहर, दंङ दिरे ऊई ला महस पापो कम लोहर।

झांह लेह परमेश्वरे दोतु बोली बि महस शताह-शताह बोलीरिंङ लेहकी च़रति दंङ दू मीहतिंङ भत्ते संसारा रिंङ पिंङे च़रति। अंऊ नगरा बि दोच़ि बणाएच़ि शुरू लाहतेर दोबि बाबेल कुट्री, अतु मतलब शुह “गड़बड़ी”।

महस सालो थल, परमेश्वरे अब्राहम मिन्दु इच्चा मीहरंङ साते गप्पा लहरी, परमेश्वरे दोरंङ साते कुई, “केनोह देश ए केनोह टबरातिंङ केट्रा दू देशा रिंङ अच़ा इला अंऊ गेह कनिंङ कमोग। गेह कनिंङ आशीष रमोग दंङ कांह दोरच़ी इच्चा मोह्ड़े जाति बणाएपोग। गेह कनु मिन महान लोहग। अच़ि कनिंङ आशीष रमतो दोबि आशीष रमोग, दंङ अच़ि कनिंङ श्राप रमतो दोबि श्राप रमोग कनु दोरच़ी संसारो भत्ते खानदाना ज़ि आशीष खोकपोर।”

झांह लेह अब्राहमे परमेश्वरो गप्पा मानेकी च़रति। दोई एनोह भत्ते सेवक ए एनोह भत्ते टंगा ढबाह रंङ साते ए मेच़ा सारा रंङ साते कनान देशा रिंङ अच़ा इलि अंऊ परमेश्वरे दोबि कंङाते।

अपेहल अब्राम कनान देशा रिंङ पिचि इलि परमेश्वरे दोरंङ साते कुई, “अब्राहम केनोह पिला हासी खंणु। दि भत्ते देश गेह कनिंङ रैं च़रपोग दंङ कनु खानदान हमेशा ओ थल्जी दिऊ टोईच़ी अधिकार लोहर।” दोहपल अब्राम दू देशारिंङ बसेकी इलि।

मलिकिसिदक मिन्दु इच्चा गंङमी तोहई अंऊ परमेश्वरो मोह्ड़े महा पुरोहित तोहई। इच्चा ध्याड़ा अपेहल अब्राम लड़ाई लड़ेकी अपि लेहकी तोहई मलिकिसिदक ए अब्राम दोआ इलिर। मलिकिसिदक ए अब्रामा बि आशीष रांई दंङ कुई, “भत्ते बे मोह्ड़े परमेश्वर अंऊ सर्ग ए धरतिऊ मालिक शुह दोई कनिंङ आशीष रमतो।” दोहथल अब्रामे लड़ाई रिंङ द्रक्शे भत्ते चीजो दशमांश मलिकिसिदका बि रैं च़रति।

महस साल बीतेगी इलि, पर एंतेग तचेक अब्राम ए सारा ओ अरिला योह कटु माह तोहई। परमेश्वरे यहच़ा अब्रामा रंङ साते गप्पा लहरी दंङ इच्चा वायदा लहरी कि कनु दोऊ इच्चा योह कटु शोतो, दंङ दोऊ खानदान सर्गो दि करज़ेर तु बाराबर शोतो। परमेश्वरे दि घोषणा लहरी कि अब्राम इच्चा धर्मी मीह शुह, छना कुचे दोई परमेश्वरो वायदा ओ टोईच़ी विशवास लहरी।

दोहपल परमेश्वरे अब्रामा रंङ साते इच्चा वायदा लहरी। दि वायदा झुह्ट मीहतु बिचंङ इदि-अइदि ऊ कम लहज़िमी इच्चा समझौता शुहबी। परमेश्वरे अब्रामा रंङ साते दू वायदा दोहपल लाहते अपेहल अब्राम ईमरिंङ इलज़ी तोहई, पर दू दोहपल ला परमेश्वरा बि रेड्री तरच़ाते। परमेश्वरे वायदा लहसी ताहरे, कि “कनु मेच़ा सारा रंङ साते कांह थल्जी योह शोतो। गेह कांह खानदान बि दि कनान देश रमोग।” पर एंतेग ला अब्रामो अरिला योह माह तोहई।