5. वायदा ओ योह

अब्राम ए सारै ओ कनान देशा रिंङ पिपिमी सा साल थल, एंतेग तचेक ला दोतु अरिला कटु माह तोहई। झांह लेह, अब्रामो मेच़ा सारै ज़ि दोऊ हखा कुई, “खंणु परमेश्वरे एंतेग तचेक गिहबी कटु माह रांई। दंङ एंतेग गेह कटु थल्जी महसे यंङषे इलज़ी तोतोग, केई गिऊ परगर हाज़िरा रंङ साते गिऊ थल्जी इच्चा कटु पैदा लोह।”

दोहथल अब्रामे हाज़िरा रंङ साते एनोह मेच़ा सारा ओ थल्जी इच्चा योह जेहक्पि लहरी, दंङ अब्रामा ज़ि दोऊ मिन इश्माएल केहच़ी च़रति। पर सारै हाज़िरा रंङ साते हट्री लेहती। अपेहल इश्माएल षाशुम सालो तोहई, दंङ परमेश्वरे यहच़ा अब्रामा रंङ साते गप्पा लहरी

परमेश्वरे कुई, “गेह सर्व-शाक्तिमान परमेश्वर शुहगा। गेह करंङ साते इच्चा वायदा लहज़ातग।” दोहपल अब्रामे धरतिऊ टोईच़ी दह्च़े इच्चा फ्यग लहरी। परमेश्वरे अब्रामो हखा कुई, “का महस जाति तु बाह शोन गेह कनिंङ ए कनु खानदाना बि केहतु ए ज़मीन शुहबिमी थल्जी गेह कनान देश रमोग दंङ गेह हमेशा ओ थल्जी दोतु परमेश्वर शोहग। केई केनोह खानदानो भत्ते गंङमी तु खतना लोह।”

“कनु मेच़ा सारै ज़ि इच्चा योह बि जन्म रमोतो, दू वायदा ओ योह शोतो। दोऊ मिन इसहाक शोतो। गेह दोरंङ साते घैङों वायदा हमेशा ओ थल्जी बणाके तोहग दंङ गेह दोरंङ साते इच्चा मोह्ड़े जाति बणाएपोग, पर गिऊ वायदा इसहाका रंङ साते शोतो।” दोहपल परमेश्वरे अब्रामो मिन लेहकी अब्राहम केहच़ी च़रति, अतु मतलब शुह “महसे तु बाह”। परमेश्वरे सारै ओ मिन लेहकी सारा केहच़ी च़रति, अतु मतलब शुह “महसे तु याह”।

दू ध्याड़ा अब्राहमे एनोह खानदानो भत्ते गंङमी तु खतना लहरी। लगभग इच्चा सालो थल, अपेहल अब्राहम राहा सालो तोहई दंङ सारा पि निहज़ो साह सालो तोहई, दोहपल सारा ज़ि इसहाका बि जन्म रांई। छना परमेश्वरे दोबि कुहषी ताहरे दोई दोऊ मिन इसहाक केहरी।

अपेहल इसहाक जवान शुई ता परमेश्वरे अब्राहमो विशवासो परिक्षा लहरी, “परमेश्वरे कुई गिऊ थल्जी केनोह इच्चा योह बलि चढ़ाएतु।” अब्राहमे यह्च़ा परमेश्वरो गप्पा मानेकी च़रति दंङ एनोह योह बलि चढ़ाएच़िमी थल्जी तयार शुचि इलि।

अपेहल अब्राहम ए इसहाक बलि चढ़ाएच़िमी ठाहरि ओ हखा इबि ए लेहकी तोईरे दंङ इसहाके अब्राहमो हखा रुहक्ति, “हे बाह, ञेंहतु दोरतिंङ बलि ओ थल्जी सिंङ ता तोह, पर बलि लहज़िमी थल्जी कुरच़ा अंऊर तोह?” अब्राहमे जबाब रांई, “हे गिऊ योह, परमेश्वरे एनाह ए बलिऊ थल्जी कुरच़ा तयार लोहतो।”

अपेहल दोरे बलि चढ़ाएच़िमी ठाहरि रिंङ पिचि इलिर, दंङ अब्राहमे इसहाका बि छुहच़ी वेदी ऊ टोईच़ी केहच़ी च़रति। दू एनोह योह बि सच़िमी ए तते कि परमेश्वरे कुई, “ अब्राहमा रूहम्ज़ा ईल! केनोह कटु बि छल्ले नुकसान था लोह। एंतेग गेह ञेंई चरच़ातग कि केई गिऊ बेह्द चेहच़ातन छना कुचे केई केनोह इकलोता योह ला गिहबी रंड्रीमी थल्जी तयार शुचि इलिन।”

कछंङ ए अब्राहमे इच्चा कुरच़ा तंङरि अंऊ छ्वाको बिचंङ फसेकी तोहई। इसहाको बदला रिंङ परमेश्वरे कुरच़ो इंतज़ाम तुहई ए लहसी ताहरे। दोहथल अब्राहमे खुश शुचि दू कुरच़ो बलि चढ़ाके च़रति।

दोहपल परमेश्वरे अब्राहमो हखा कुई, “कांह केनोह भत्ते धिर गिहबी रंड्रीमी थल्जी तयार शुचि इलिन, देर तचेक कि केनोह इच्चा योह बि ला गिऊ थल्जी बलि चढ़ाएसिमी थल्जी तयार तोईन, झांह लेह गेह कनिंङ आशीष रंड्रीमी वायदा लहज़ातग। कनु खानदान सर्गो करज़े तु ठ्रोह महस शोर। छना कुचे केई गिऊ हुकुम मानेक्च़ातन झांह लेह गेह कांह खानदानो दोरच़ी संसारो भत्ते खानदाना बि ला आशीष रमोग।”