6. परमेश्वरे इसहाको थल्जी इंतज़ाम लहज़ा

अपेहल अब्राहम महस यंङदे शुचि इलज़ी तोहई दोहपल दोऊ योह, इसहाक, जवान शुचि इलज़ि तोहई। झांह लेह अब्राहमे एनोह इच्चा परगरा बि दू देशा रिंङ च़रति अंऊर अब्राहमो नाता रे तोइरे, ताकि दोच़ि अब्राहमो योह इसहाको थल्जी मेच़ा हपि तरपोर।

इच्चा लम्हें यात्रा ओ थल, अब्राहमो परगर दू देशा रिंङ पिच़ि इलि अंऊर अब्राहमो नातारे बंङज़ातेर। परमेश्वरे दू परगरा बि रिबका रंङ साते दोह्ई लहरी रिबका अब्राहमो न्वा ओ पोद्त्री तोहई।

रिबका एनोह टबरातिंङ केट्रा अब्राहमो परगरा रंङ साते इसहाको चुंङ इबिमी थल्जी तयार शुचि इलि। छना ए दोरे चुंङ पिचि इलिर इसहाके रिबका रंङ साते दोऊ ब्याह लहज़ि च़रति।

इच्चा लम्हें टेमो थल, अब्राहम सिए इलि। दोहपल परमेश्वरे अब्राहमो योह इसहाका बि आशीष रांई, छना कुचे परमेश्वरे अब्राहमा रंङ साते वायदा लहसी तते कि अब्राहमो खानदान सर्गो करज़े तु बराबर शोर। पर रिबका ओ छल्ले औलाद माह शुई।

इसहाके रिबका ओ थल्जी प्रार्थना लहरी, दंङ परमेश्वरे दोऊ प्रार्थना रेड्री च़रति दंङ दोऊ मेच़ा बि दू ए मुक्का जुड़वां कटुतु खोकटुंङ शुहबिमी आशीष रांई। अंऊ मुक्का दोकु कटुकु रिबका ओ खोकटुंङ ए तोईरे दोरे एनोह बिचंङ तेंङसी लेहतिर, दिऊ थल्जी रिबका ज़ि परमेश्वरो हखा रूहक्च़ि लेहति कि दि छि शुहबी लहेकी तोह।

परमेश्वरे रिबका ओ हखा कुई, “केई झुह्ट योह कटु तिंङ जन्म रमोन। दोकु खानदान झुह्ट शताह-शताह जाति बणाएपोर। दोकु इदि-अइदि रंङ साते तेङसोर। पर कनु मोह्ड़े योह क्वाच़ि योह ओ अधीनता रिंङ बंङज़तो।”

अपेहल रिबका ओ कटुतु जन्म शुई, दंङ मोह्ड़े योह षेह्ई ए क्रा ज़ड़े तोहई, दंङ दोचि दोऊ मिन एसाव केहच़ी च़रति। दंङ क्वाच़ि योह एसावो थुहरी चुमज़ा ज़ेहक्ते, दंङ दोऊ मिन याकूब केहच़ी च़रतिर।