7. परमेश्वरो याकूबा बि आशीष रंड्री

अपेहल दोकु कटुरे मोह्ड़े शुईरे ता याकूबा बि च़ुङ बंङज़ी रूठे चेहसाते, पर मोह्ड़े योह एसावा बि जानवरा तु शिकार लहज़ि रूठे चेहसाते। रिबका ज़ि याकूबा रंङ साते महस दाह लहज़ाते, पर इसहाके एसावा रंङ साते दाह लहज़ाते।

इच्चा ध्याड़ा, अपेहल एसाव शिकार लहज़ा वापिस अति दंङ दू महसे योंह्ष लेहकी तोहई। एसावे एनोह क्वाच़ि न्वा याकूबो हखा कुई, “अंऊ बगत केई बणाएशी तातन दोऊ दोरच़ी थोड़े अरे बगत गिहबी ला रोंऊ।” याकूबा ज़ि जबाब रांई, “तुहई गेरंङ साते दि वायदा लोह कि मंड़ो कटु शुहबी रंङ साते अंऊ हर इच्चा चीज अंऊ कनिंङ खोकसी जूशी तोहई, दू भत्ते केई गिहबी रमोन।” दंङ एसावे दू भत्ते चीजार याकूबा बि रंड्रीमी वायदा लहज़ि च़रति। दोऊ थल याकूबे दोबि बगत रांई।

इसहाके एसावा बि आशीष रंड्री जुंज़ाते। पर दिबे तुहई कि दोई झांह लोहतो, रिबका ए दोऊ योह याकूबा ज़ि एसाव बि धोखा रें च़रतिर दंङ याकूबे एसाव शुहबिमी ढोंग लहज़ि च़रति। छना कु इसहाक महस यंङदे शुचि इलज़ि तोहई दंङ एंतेग दोबि छल्ले तंङफते माह। झांह लेह याकूबे एसावो खमज़ेर लेहकी छगड़ो खल एनोह टटु रिंङ ए गुह्ट्र रिंङ ज़िल्ली च़रति।

याकूब इसहाको कछंङ अति दंङ कुई, “गेह कनु मोह्ड़े योह एसाव शुहगा। गेह दिऊ थल्जी अंजी शुहगा ताकि केई गिहबी आशीष रमोन।” अपेहल इसहाके छगड़ो खलो क्रा सपच़ि महसूस लहरी दंङ खमज़े तिंङ वास लहरी, दंङ दोई चेहति कि दू ए एसाव शुह दंङ दोबि आशीष रांई।

एसावे याकूबा रंङ जलन लहज़ि लेहति छना कुचे याकूबे एसावो दोरच़ी मोह्ड़े योह शुहबिमी अधिकारा रेंज़ा शिलि दंङ दोऊ बाहो दोरच़ी दू आशीष ला धोखा रंङ साते शिलि। दंङ दोऊ थल एसावे इच्चा योजना बणाएति कि अपेहल ञेंहतु बाह सिए योतो दोऊ थल याकूबा बि ला सच़ि च़रपोग।

पर रिबका ज़ि एसावो दि गप्पा रेड्री च़रति। झांह लेह दोई ए इसहाके याकूबा बि महस ऊईतार एनोह नाता तु कछंङ चरच़ि च़रति।

याकूब महस साल तचेक रिबका ओ नाता तु कछंङ बंङज़िरी। दू टेमो मुक्का दोई ब्याह लहरी दंङ दोऊ सनी योह ए इच्चा मिओ जेहक्ति। परमेश्वरे दोबि महसे साहूकार बणाके च़रच़ाते।

निहज़ साल तचेक कनाना देशारिंङ एनोह चुंङ ज़ि ऊईतार बंङज़ा, याकूब एनोह टबरार, एनोह परगर, दंङ एनोह जानवरा तु भत्ते झुंड़ा रंङ साते एनोह चुंखा यहच़ा वापिस अति।

याकूब दिऊ थल्जी महस बेबा इलज़ी तोहई छना कुचे दोई चेहसाते कि एसावे एंतेग ला दोबि सचि च़रपोतो। झांह लेह दोई भत्ते बे तुहई थोड़े अरे जानवर ए परगरा तिंङ एसावो कछंङ च़रति। अंऊ परगरा ज़ि दू जानवारा तिंङ रेंज़ा शिलिर दोरे पिपिमी ए तोईरे।

पर एसाव एंतेग याकूबा बि सच़ि माह जुंज़ाते। दोऊ वहज़ा, दू दोबि यहच़ा खंड्रा ते ,महस खुश तोहई। दोऊ थल झुल्ला न्वाकु कनान देशा रिंङ शान्ति रंङ साते बंङज़ी लेहती। दंङ दोकु बाह इसहाक ला सिए इलि दंङ याकूब ए एसावे दू फथेकी च़रतिर। वायदा ओ दू कसम अंऊ परमेश्वरे अब्राहमा रंङ साते लहसी ताहरे दू एंतेग इसहाको दोरच़ी याकूबो टोइच़ी अच़ा अति।