8. परमेश्वरे यूसुफ ए दोऊ टबरा तिंङ बचाएच़ा

याकूबा बि कनान देशा रिंङ बंङज़ा महस साल शुचि इलदे, अपेहल याकूब यंङषे इलि, दंङ दोई एनोह प्यारे योह यूसुफा बि दोऊ न्वा तु पाहठी पता लहज़िमी थल्जी च़रति। दोऊ योहर जानवारातु झुंड़ो देखभाल लहज़ातेर।

यूसुफो न्वारे दोरंङ साते जलन लहज़ातेर छना कुचे दोतु बाह यूसुफा रंङ साते महसे दाह लहज़ाते दंङ दिऊ थल्जी ला यूसुफे इच्चा मंङडुङ खंई कि दू दोतु अधिकारी शुचि योतो। अपेहल यूसुफ एनोह न्वातु कछंङ अति ता दोच़ि दोबि बंदी बणाके च़रतिर दंङ दोबि परगरा तु व्यापार लहज़ा तिंङ लंङे च़रति।

अपेहल यूसुफो न्वारे च़ुङ वापिस अपिमी ए तुहई यूसुफो न्वा ज़ि यूसुफो खमज़ेर ट्रव्लज़े छ्गड़ो षुह्ई ऊ बिचंङ केहच़ी च़रतिर। दंङ दोचि दू खमज़ेर एनोह बाह बि कंङे कुईर कि कनु योह यूसुफ बंणो जानवरा ज़ि यूसुफ बि सच़ि च़रचातोर। दि गप्पा रेड्रा याकूब महसे दुखी शुचि इलि।

पतगरा तु व्यापार लहज़ा दू मीहरे यूसुफा बि मिस्त्र रैंज़ा शिलिर। मिस्त्र देश नील नदी ऊ कुणी रिंङ बसेकी इच्चा मोह्ड़े ए शाक्तिशाली देश तोहई। दू परगरा तु व्यापार लहज़ा ज़ि यूसुफा बि इच्चा साहुकार सरकारी अधिकरी बि लंङे च़रतिर। यूसुफा ज़ि एनोह मालिको रूठे रंङ सेवा लहरी, दंङ परमेश्वरे यूसुफा बि आशीष रांई।

दोऊ थल झांह शुई कि यूसुफो मालकिने दोरंङ साते नाज़ायज़ सम्बंध बणाएच़िमी कोशिश लहरी, पर यूसुफा ज़ि झांह ठ्रोह परमेश्वरो खिलाप पाप लहज़िमी दोरच़ी इंकार लेह च़रति। दोबि महस रोहष अच़ा अति दंङ दोई यूसुफो खिलाफ हप्सी शिकायत लहरी, झांह लेह दोबि बंदी बणाके जेलारिंङ चरच़ी च़रति। जेला रिंङ ला, यूसुफ परमेश्वरो थल्जी सच्चा ए ईमादार तोहई, दंङ परमेश्वरे दोबि आशीष रांई।

झुह्ट सालो थल, यूसुफ निर्दोष शुचि ला जेला रिंङ ए तोहई। इच्चा रात फिरौन, मिस्त्र देशो रज्ज़ा फिरौना ज़ि, झुह्ट मंङडुङ खंई अंऊ दोचि दोबि महस बैचेन लेह च़रति। दोऊ अरिला सलाहकारे दोबि दोऊ मंङडुङों मलतब कंड्री मरतिर।

परमेश्वरे यूसुफा बि मंङडुङों मतलब कंड्रीमी आशीष राहंषी तते, झांह लेह रज्ज़ा फिरौने यूसुफा बि जेलो दोरच़ी एनोह कछंङ बुलाके च़रति। यूसुफा ज़ि दोबि दू मंङडुडों मतलब कंड्रीरी ए दंङ कुई, भत्ते मिस्त्रा रिंङ निहज़ी साल रूठे फसल शोतो, पर दोऊ थल निहज़ी साल तचेक अकाल शोतो।”

फिरौन यूसुफा रंङ साते धोंण खुश शुचि इलि कि दोई दोबि मिस्त्रो अई भत्ते बे शाक्तिशाली गंङमी घोषित लेह च़रति।

यूसुफा ज़ि मीहतु दोरच़ी रूठे फसलो निहज़ी सालो मुक्का महसे बे महसे फसल ठ्रोहका लहज़िमी थल्जी कुई। अपेहल निहज़ी सालो अकाल अति दोहपल यूसुफा ज़ि मीहतिंङ दू फसल लंङे च़रति ताकि दोतिंङ ज़ेईमी थल्जी बगत शुहबी जूंस।

दू अकाल सिर्फ मिस्त्रा रिंङ ए मश्त, पर कनानारिंङ ला महसे तोहई अंऊर याकूब ए दोऊ टबरार बंङज़ातेर।

झांह लेह याकूबा ज़ि एनोह मोह्ड़े योह तिंङ बगतो ओ थल्जी समान च़ुमज़िमी थल्जी मिस्त्र देशो हखा च़रति। अपेहल दोरे बगत ओ सामान च़ुमज़िमी थल्जी यूसुफो तुईज़ी खड़े शुईर दंङ दू न्वा ज़ि यूसुफ सेहच़ी मरतिर। पर यूसुफा ज़ि दोरे सेहच़ी च़रतिर।

युसूफा ज़ि तुहई एनोह न्वा तु परख लेह च़रति कि दोरे अंयो लेहक्सा इलज़ी तोतोर, यूसुफे दोतंङ साते कुई, “गेह केहतु न्वा यूसुफ शुहगा! बेईनि था। अपेहल केहच़ी गिहबी परगरो ठ्रोह लंङे चरच़ातेंई दोहपल केहच़ी मदम लहज़िमी सोचेके तहसी ताहरेनि, पर परमेश्वरे दू बुराई बि रूठे ओ थल्जी इस्तेमाल लेह चरति! अतांई दंङ मिस्त्रा रिंङ बंङज़ेंई ताकि गेह केहतु ए केहतु टबरातु थल्जी बगतो इंतज़ाम लेह तरपोग।”

अपेहल यूसुफो न्वारे चुंङा वापिस अच़ा अतिर दंङ एनोह बाह याकूबा बि कंङातोर कि यूसुफ एंतेग ला श्रीङीं तोह दंङ दू महस खुश शुचि इलि।

हालांकि याकूब इच्चा यंङदे मीह तोहई तांला दू एनोह भत्ते टबरातंङ साते मिस्त्र देशो हखा अच़ा इलि, दंङ दोरे दोरतिंङ बसेकी इलिर। याकूबो सिमी तुहई, दोई एनोह भत्ते योह तिंङ आशीष रांई।

वायदा ओ दू कसम अंऊ परमेश्वरे अब्राहमो हखा लाहते दू इसहाको टोइच़ी दंङ दोऊ थल याकूब, दंङ दोऊ थल दोऊ सनी योह तु ए दोऊ टबरातु टोईच़ी अचा अति। दू सनी योह तु खानदान इस्राएलो सनी गोत्र बणेकी इलिर।