9. मूसा बि परमेश्वरो दोरच़ी बुलाच़ी

यूसुफो सिमी थल दोऊ भत्ते नाता रे मिस्त्रा रिंङ बसेकी इलिर। दंङ दोतु रेह खानदान महस साल तचेक मिस्त्रा रिंङ ए बंङज़ा इलिर दंङ दोच़ी महस कटुरे जेहपि लहरिर। दोरे इस्राएली शुचि इलिर।

महस राह सालो थल, इस्राएली तु जनसख्या बेहसी लेहति। दंङ मिस्त्री मीहरे दि गप्पो थल्जी खुश माह तोईरे कि दोतु मदत लहज़िमी थल्जी यूसुफे महस धिर लाहते। दोरे इस्राएली तंङ साते बेबा इलिर। छना कुचे दोरे दोतु बे महस तोईरे। दिऊ थल्जी दू मुक्का मिस्त्रो टोईच़ी राज लहज़ा फिरौने इस्राएली तिंङ मिस्त्री तु परगर बणाके च़रति।

मिस्त्री ज़ि इस्राएली तिंङ महस मोह्ड़े भवन देर तचेक कि नगर बणाएच़िमी थल्जी ला मजबूर लेह च़रतिर। दू महस मेहनते दोतु ज़िन्दगी बि ला महसे दुखी लेह च़रति, पर परमेश्वरे दोतिंङ आशीष रांई दंङ दोतु महस कटुरे पैदा शुचि इलिर।

फिरौने खंई कि इस्राएली ज़ि महसे कटुरे जेहक्पि लेह च़रतिर, झांह लेह दोई एनोह मीहतिंङ इस्राएली तु भत्ते गंङ कटुतिंङ नील बेंड़ी रंङ छंङे च़रच़िमी हुकुम रैं च़रति।

इच्चा खास इस्राएली मेच़िमी इच्चा गंङ कटु बि जन्म रांई। दोई ए दोऊ गगसे अंयों शुहबी तरपोतो धोंण दू कटु बि प्याके तहसी ताहरे।

अपेहल दू कटु ओ याह-बाह दोबि महसे प्याके माहरतिर, दंङ दोच़ि दोबि सच़िमी दोरच़ी बचाएच़िमी थल्जी इच्चा तरी रंड्रा टोकरी रिंङ केहच़ी नील बेंड़ी मुखारिंङ केहच़ी च़रति। दोऊ मोह्ड़े न्वाशा ज़ि दि खंड्रीमी थल्जी दू कटु निगरानी लहरी कि दोरंङ साते छि शवात।

फिरौनो मियो ज़ि दू टोकरी खंई दोऊ अन्दरेग खांई। अपेहल दोई इच्चा कटु बि खांई दंङ दोई दोबि एनोह कटु रूपा रिंङ खांई। दोई दोबि पानु पिलाएच़िमी थल्जी इच्चा इस्राएली मेच़िमी बि तहरी, दि ञेंई मेह कि दू मेच़िमी दू ए कटु याह शुह। अपेहल दू कटु धोंण मोह्ड़े शुचि इलि कि एंतेग दोबि एनोह याह ओ पानु ज़रूरत माह, दंङ दोई दोबि फिरौनो मियो कछंङ च़रति, दोऊ मिन मूसा तोहई।

इच्चा ध्याड़ा, अपेहल मूसा मोह्ड़े शुचि इलि, दंङ दोई खंई कि इच्चा मिस्त्री इस्राएली बि तेंङज़ी लेहकी तोह। मूसा ज़ि एनोह साथी इस्राएली बि बचाएच़िमी कोशिश लहरी।

अपेहल मूसा ज़ि सोचेकी च़रति कि दोबि अच़ि ला खंड्री मरति दोई दू मिस्त्री सचि च़रति दंङ दोबि श्रोह पथैकी च़रति। पर मूसा ज़ि छि लाहते दोबि अच़िया खंई च़रते।

फिरौना बि पता लेहकी इलि कि मूसा ज़ि छि लहरी। दोई दोबि सचि च़रच़िमी कोशिश लहरी, पर मूसा मिस्त्रो दोरच़ी बणो हखा पोक्शे इलि। फिरौनो सैनिका ज़ि दोऊ खोज लेह मरतिर।

मिस्त्रो दोरच़ी श्ताह मूसा इच्चा पौहाल बणेंके इलि। दोरतिंङ दोई इच्चा मेच़िमी रंङ साते ब्याह लेह च़रति दंङ झुह्ट कटुरे जेह्कपि लहरी।

मूसा एनोह रूहो ओ त्रैंई तु देखभाल लहज़ाते। इच्चा ध्याड़ा, दोई इच्चा मेह लेहकी छ्वाक तंङरी अंऊ रोहषी माह तोहई पर मेह लेहकी तोहई। दोबि कंड्रीमी थल्जी दू, दू छ्वाक तु कछंङ अच़ा इलि। अपेहल दू दोऊ कछंङ इबि लेहकी तोहई दंङ परमेश्वरे दोरंङ साते गप्पा लहरी। दोई कुई, “हे मूसा, केनोह बूटार युहप्शी च़रतु। का इच्चा पवित्र ठहरि रिंङ खड़े तोतोन।”

परमेश्वरे कुई, “गेह घैङों मीहतु दुख खंड्रातग। गेह कनिंङ फिरौनो कछंङ च़रपोग। ताकि दोरे इस्राएली मीहरे मिस्त्री तु गुलामी ओ दोरच़ी आज़ाद शुचि योर। गेह दोतिंङ कनान देश रमोग, दू देश अपि गेह अब्राहम, इसहाक ए याकूबा बि रंड्रीमी वायदा लहसी ताहरेग।”

मूसा ज़ि रूहक्ति, “अगर मीहच़ी दि ञेंहच़िमी थल्जी कि गिहबी अच़ि च़रसी शुह?” परमेश्वरे कुई, “अंऊ गेह शुगाह दू ए गेह शुगाह। दोतु हखा कुह, ‘गेह कनिंङ दोतु कछंङ च़रसी शुगाह।’ दोतु हखा दि ला कुह, गेह केहतु खानदान अब्राहम, इसहाक ए याकूबो परमेश्वर यहोवा शुगाह।’ गिऊ दि मिन हमेशा थल्जी शोतो।”

मूसा बेवा ते दंङ फिरौनो कछंङ इबि माह जुंज़ाते छना कुचे दोई सोचेकते कि दोई रूठे रंङ कुट्री मरपोतो, झांह लेह परमेश्वरे मूसा ओ न्वा हारूना, बि दोऊ मदतो थल्जी च़चि च़रति।