10. परमेश्वरे मिस्त्रो टोईच़ी साह मुसीबत च़रति
परमेश्वरे मूसा ए हारूना बि खबरदार लहरी कि फिरौन ज़िद्दी शुचि योतो। अपेहल दोरे फिरौनो कछंङ इलिर ता दोचि कुईरे, “इस्राएलो परमेश्वरे दि कुट्रात, ‘गिऊ मीहतिंङ इबि रांऊ!” पर फिरौने दोतु गप्पा माह रेड्रिरी इस्राएलो मीहतिंङ रिहा लहज़िमी बजाए दोतिंङ ऊई ला महस खरे मेहनत लहज़िमी थल्जी मजबूर लेह च़रति।
फिरौन दू मीहतिंङ चरच़िमी दोरच़ी लगातार इंकार लहज़ि लेहति, दिऊ थल्जी परमेश्वरे मिस्त्रो टोइच़ी साह भंयकर मुसीबत च़रति। दि मुसीबतो दोरच़ी, परमेश्वरे फिरौना बि कंड्रिरी कि दू फिरौन ए मिस्त्रो सद्द बे महस शाक्तिशाली तोह।
परमेश्वरे नील नदी बि षुहई रिंङ बदलेगी च़रति, पर फिरौने एंतेग ला इस्राएली तिंङ इबि माह रांई।
परमेश्वरे भत्ते मिस्त्र देशा रिंङ मढुकार च़रति। फिरौना ज़ि मढुका तिंङ योहच़िमी थल्जी मूसा ओ हखा विनती लहरी। पर भत्ते मढुकार सिमी थल, फिरौने एनोह सेहम डगडगी लेह च़रति दंङ यहच़ा इस्राएली तिंङ मिस्त्रो दोरच़ी इबि माह रांई।
दोऊ थल परमेश्वरे टिड्डा तु मुसीबत च़रति। दोऊ थल दोई डांसा तु मुसीबत च़रति। फिरौने मूसा ए हारूना बि बुलाती दंङ दोकु हखा कुई कि अगर दोरे दू मुसीबता बि रोकेगी च़रपोर दंङ इस्राएली मिस्त्र केट्रा इबि तरपोर। अपेहल मूसा ज़ि प्रार्थना लहरी दंङ परमेश्वरे मिस्त्रो दोरच़ी डांसार शतह लेह लहरी। पर फिरौने यहच़ा एनोह सेहम डगडगी लेह च़रति दंङ दू मीहतिंङ यहच़ा इबि माह रांई।
दिऊ तुंखा, परमेश्वरे मिस्त्री तु भत्ते जानवरा तिंङ टेहच़ी लेह सचि च़रति। पर फिरौनो सेहम डगडगी शुचि इलि दंङ दोई इस्राएली तिङ इबि माह रांई।
दोहपल परमेश्वरे मूसा बि फिरौनो तुईज़ि तब छहज़िमी लहरी। दोहपल दोई झांह लहरी ठ्रोह लहरी ता मिस्त्रो मीहतिंङ चमो रोग लेहकी इलि, पर इस्राएली तिंङ छल्ले माह शुई। परमेश्वरे फिरौनो सेहम यहच़ा डगडगी लेह च़रति, दंङ फिरौने यहच़ा इस्राएली तिंङ इबि माह रांई।
दोऊ थल, परमेश्वरे षारू हति दंङ मिस्त्रो महस फसल योहच़े च़रति दंङ अंऊ ला धकतेखा हुंच़िरी दू सच़ि च़रति। फिरौना ज़ि मूसा बि बुलाके दोतु हखा कुई, “गेह पाप लाहतग। केरे इबि तरपोंई।” दंङ मूसा ज़ि प्रार्थना लहरी, दंङ सर्गंङ षारू अपि बंद शुचि इलि।
पर फिरौना ज़ि यहच़ा पाप लहरी दंङ एनोह सेहम डगडगी लेह च़रति। दंङ दोई यहच़ा इस्राएली तिंङ इबि माह रांई।
दंङ दोऊ थल परमेश्वरे मिस्त्रो टोईच़ी टिड्डार च़रति। दि टिड्डा ज़ि दोतु भत्ते फसल ज़े च़रति अंऊ फसला बि षारू ज़ि बरबाद माह लहसी ताहरे
दोहथल परमेश्वरे हंयार लेह च़रति अंऊ षुमु ध्याड़ा तचेक हंयार ए बंङज़िरी। दि धोंण महस हंयार तोहई कि मिस्त्री मीहरे एनोह चुंङ ज़ि हुंच़ि माहरतिरे। पर अंऊर इस्राएली मीहरे तोईरे दोरतिंङ छंङी ए तोहई।
दि कुह् मुसीबतो थल ला, फिरौने इस्राएली तिंङ इबि माह रांई। छना कि फिरौने रेड्रीमी माह ताहरे दिऊ थल्जी परमेश्वरे इच्चा अन्तिम मुसीबत चरच़िमी योजना लहरी। दि मुसिबते फिरौनो सेहम बदलेकी च़रपोतो।
निर्गमन अध्याय 5-10 दोरच़ी इच्चा बाइबलो कथा
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।