50. यीशु यहच़ा वापिस अपि

लगभग झुह्ट हज़ार साल, संसारो भत्ते ठाहरि रिंङ महस मीहच़ी मसीह यीशु पाहठी रूठे खबर रेड्री तातोर। कलीसिया बड़ेक्पि लेहकी तोह। यीशु ज़ि वायदा लहसी ततो कि दू संसारो अंत शुहबिमी मुक्का यहच़ा अपतो। हांलाकि दू एंतेग वापिस अंजे माह, तांला दोई एनोह वायदा पूरा लोहतो।

अपेहल कि हेनर यीशु वापिस अपिमी थल्जी रूहम्ज़ा तोतोंई, परमेश्वर हेंदंङ साते झांह ठ्रोह जीवन श्रींङमी उम्मीद लहज़ा अंऊ पवित्र तोह दंङ अंऊ दोई दोऊ आदर लहज़ा। अपेहल यीशु धरतिऊ टोईच़ी तोहई दोहपल दोई कुई, “गिऊ चेलार संसारा रिंङ भत्ते ठाहरि ओ मीहतिंङ परमेश्वरो राजो पाहठी रूठे खबरो प्रचार लोहर, दंङ दोहथल धरति ओ अंत अच़ा अपतो।”

महस जाति ज़ि एंतेग तचेक यीशु पाहठी रेड्री माह तोहर। स्वर्गो हखा वापिस ईबिमी तुहई, यीशु ज़ि मसीह तंङ साते दू मीहतिंङ रूठे खबर सुनाएच़िमी थल्जी कुई अंऊ दोचि दिबि अपेहल ला रेड्री माह। दोई कुई, “ईलांई दंङ भत्ते जाति तु मीहतिंङ चेला बणाएतुंई!” दंङ व्लज़िमी थल्जी रिह रिंङ फसल तयार शुचि इलज़ि तोह!”

यीशु ज़ि दि ला कुई, “अरिला मीहू परगर दोऊ एनोह मालिक बे मोह्ड़े माह शुहबी। दि संसारो खास मीहच़ी गेरंङ साते नफरत लहरिर, दंङ गिऊ वहज़ा ज़ि दोच़ि केतंङ ला तंग लोहर ए सच़ि च़रपोर। दि संसारा रिंङ केरे महस दुख उठाएपोंई, पर डकाह तोंई, छना कुचे गेह शैताना बि यहरच़ी केहतग अंऊ दोई दि संसारा रिंङ राज लहज़ा। अगर केरे थल मुखंङ तचेक गिऊ विशवासो जोगे बणेंके बंङज़ोंई, दंङ परमेश्वरे केतिंङ बचाएपोतो!”

यीशु ज़ि एनोह चेला तिंङ समझाएच़िमी थल्जी इच्चा कथा सुनाएति कि अपेहल संसारो अंत शोतो। दोई कुई, “अरिया मीह एनोह रिह रिंङ रूठे बैईज़ा एह्सी ततो। अपेहल दू ईमरिंङ तोहई दंङ दोऊ बैरी अति दंङ छ्वाओ बैईजो ठाहरि बंणो पौधा ओ बैईज़ा एहच़ी च़रति, दंङ दू अच़ा इलि।”

“अपेहल पौधार फलेक्पि लेहतिर दंङ परगरा ज़ि दू मीहू हखा कुईरे, ‘हे मालिका, केई ता केनोह रिह रिंङ रूठे बैईज़ा एह्सी तातन। दंङ देर दि बंणो पौधार अंऊरच़ि अतिर?’ दू मीहच़ी जबाब रांई, ‘सिर्फ गिऊ बैरी ए दिबि एह्च़ी जुंज़ातेर। दि गिऊ अरिया बैरी शुह अच़ि झांह लहसी शुह।’”

“दू परगरा ज़ि एनोह मालिका बि जबाब रांईरे, ‘छि हेंदिंङ बंणो पौधार फोंज़े च़रची जूंशी तोह?’ दू मालिके कुई, ‘मेस। अगर केहच़ी झांह लोहनि ता केहच़ी रे छ्वाह ला फोंज़े च़रपोंई। व्लज़िमी मुक्का तचेक रूहम्ज़ा तोंई। दोहपल बंणो पौधार इच्चा गठ्ठा रिंङ ठ्रोहका लेह च़रतुंई ताकि केहच़ी दोरे रोह्च़ी तरपोंई। पर छ्वाह बि गिऊ कछंङ रैंज़ा हतांई।’”

चेला ज़ि दि कथा ओ मतलब माह समझेतिर, झांह लेह दोच़ि यीशु बि दोतिंङ समझाएच़िमी थल्जी विनती लहरिर। यीशु ज़ि कुई, “रूठे बैइज़ा एह्च़ा मीह ज़ि मसीहू भत्ते आदर मान लहज़ि। रिह ए संसारो आदर लहज़ि। रूठे बैईज़ा परमेश्वरो राजो आदर मान लहज़ि।”

“बंणो पौधार दू मदम मीह, शैतानो आदर मान लहज़ा ठ्रोह शुहबी। दू मीहू बैरी ला शैतानो आदर लहज़ा, अच़ि बंणो पौधार एह्च़ी च़रचाते। व्लज़िमी दि संसारो अंतो पाहठी कंड्रा, दंङ व्लज़ि परमेश्वरो स्वर्गदूता तु पाहठी कंड्रा।”

“अपेहल संसारो अंत शोतो। दोहपल स्वर्गदूत दू भत्ते तिंङ इच्चा साते ठ्रोहका लोहतो अंऊ शैतानो तोतोर। दू स्वर्गदूत दोतिंङ महस मेह रिंङ छंङे च़रपोर। दोर्तिंङ दोरे मीहरे भयंकर टेहषी रिंङ क्रपोर दंङ छ्वाह रूहपोर। पर अंऊ मीहरे धर्मी तोतोर, अंऊ दोचि यीशु भाषे लहसी तातोर, दोरे एनोह परमेश्वर बाहो राजा रिंङ ऐके ओ ठ्रोह चमकेक्पोर।”

यीशु ज़ि दि ला कुई कि दू संसारो अंत शुहबिमी तुहई धरति ओ टोईच़ी वापिस अपतो। दू ध्वांए ठ्रोह वापिस अपतो छना दू इले। मतलब, दोऊ कछंङ एनोह हेले कि फुक शोतो, दंङ दू सर्गंङ डूह् बि सवार शुचि अपतो। अपेहल यीशु वापिस अपतो, दंङ हर इच्चा मसीह मीह अंऊ सिए इलज़ि तोह दोरे सिए दोतु बिचंङ ज़ि श्रींङी योर दंङ दोरंङ साते सर्गा रिंङ दोआ योर।

दोहपल दोरे मसीह मीहरे अंऊ श्रींङी तोतोर दोरे सर्गो हखा उठाएकी केओर दंङ ऊई मसीह तंङ साते शामिल शुचि योर अंऊ सिए दोतु बिचंङ ज़ि श्रींङी इलज़ि तोतोर। दोरे भत्तेर दोर्तिंङ यीशु रंङ साते शोर। दोऊ थल, यीशु एनोह मीहतंङ साते बंङज़तो। अपेहल दोरे इच्चा साते बंङज़ोर दंङ दोतंङ साते हमेशा ओ थल्जी शांति शोतो।

यीशु ज़ि दोऊ टोईच़ी विशवास लहज़ा हर इच्चा मीहबी इच्चा मुकुट रंड्रीमी वायदा लहसी ततो। दू हमेशा ओ थल्जी परमेश्वरा रंङ साते हर इच्चा चीज़ो टोईच़ी राज लोहतो। दोतु कछंङ सिद्ध शांति शोतो।

पर परमेश्वरे दू भत्ते तु न्याय लोहतो अंऊ ओच़ि यीशु टोईच़ी विशवास माह लहज़ातोर। दू दोतिंङ नरकंङ केहच़ी च़रपोतो। दोर्तिंङ दोरे क्रपोर दंङ छ्वाह रूहक्पोर, दंङ दोरे हमेशा मुसीबातरिंङ बंङज़ोर। अपेहल ला माह योहसा ठ्रोह मेह दोतिंङ हमेशा रोह्पा लोहतो, दंङ ओमड्रा रे दोतिंङ ज़ोवा लोहर।

अपेहल यीशु वापिस अपतो, दंङ दू भत्ते रीति रंङ साते शैताना बि ए दोऊ राजा बि नष्ट लेह च़रपोतो। दोई शैताना बि नरकंङ केहच़ी च़रपोतो। दोर्तिंङ शैतान हमेशा ओ थल्जी रोहषा लोहतो, दू भत्ते तंङ साते अंऊ दोच़ि परमेश्वरो गप्पा मानेक्च़िमी बजाए शैतानो थलेच़ी ज़ोज़िमी फेंसला लाहतेर।

छना कुचे आदम ए हव्वा ज़ि परमेश्वरो हुकमो भाषे माह लहज़ातेर दंङ पापा बि दि संसारा रिंङ रेंज़ा हतिर, परमेश्वरे दोतिंङ श्राप रांई दंङ दोबि नष्ट लहज़िमी फेंसला लहरी। पर अंऊ ध्याड़ा परमेश्वर इच्चा खरकोई स्वर्ग ए इच्चा खरकोई धरति ओ रचना लोहतो अंऊ सिद्ध शोतो।

यीशु ए दोऊ मीहरे दू खरकोई धरति रिंङ बंङज़ोर, दंङ दू हमेशा ओ थल्जी भत्ते चीज़ा तु टोईच़ी राज लोहतो। दोई मीहतु टिरा ज़ि भत्ते मिक्ती भ्रुज़ि च़रपोतो। एंतेग अरिया मुसीबत ए परेशानी रिंङ माह बंङज़ोर। दोरे क्रपोर माह। दोरे टेपोरे माह या सिओर माह। दंङ दोर्तिंङ छल्ले बुराई माह केहश्रोतो। यीशु एनोह राजो न्याय रंङ साते, ए शांति रंङ साते राज लोहतो। दू हमेशा ओ थल्जी एनोह मीहतंङ साते बंङज़तो।