49. परमेश्वरो खरकोई वायदा

इच्चा स्वर्गदूते इच्चा जबान मेच़िमी मरियमो हखा कुई कि दोई परमेश्वरो योह बि जन्म रमतो। दू एंतेग कुंवारी तोहई, पर पवित्र आत्मा दोऊ कछंङ अति दंङ दू खोकटुंङ शुई। दोई इच्चा योह बि जन्म रांई अतु मिन दोई यीशु केह्ई। झांह लेह, यीशु परमेश्वर ए मीह झुल्ला शुह।

यीशु ज़ि महस चमत्कार लहरी अंऊ दोच़ि दि कंड्रातोर कि दू परमेश्वर शुह। दू तिऊ टोईच़ी जोज़िरी दंङ आंधी बि शान्त लहरी। दोई महस टेहच़ी मीहतिंङ ठीक लहरी दंङ महस मीहतु अंदरेग ज़ि मांजी आत्मा हुंति। दोई सिए दू मीहतिंङ यहच़ा श्रींङमी लहरी, दंङ दोई ङा रोटी ए झुह्ट मह्छा बि ङा हज़ार मीहतिंङ खिलाएति।

यीशु इच्चा महान गुरु ला तोहई। छिल्ला धिर दोई कंङाते, दोई दू महस रूठे रंङ कंड्रिरी। अंऊ दोई मीहतु हखा लहज़िमी थल्जी कुट्राते दू दोतिंङ लेह जूंशी तोह छना कुचे दू परमेश्वरो योह शुह। उदाहरणो थल्जी, दोई हेंदिंङ कंड्रिरी कि केतिंङ ऊई मीहतंङ साते धोंण ए दाह लहज़िमी ज़रूरत तोह छना कि केहच़ी केनातंङ साते दाह लहज़ातंई।

दोई दि ला सिखाएति कि केतिंङ भत्ते चीज़ बे महस ए केनातु टंगा-ढबाह बे महस परमेश्वरा रंङ साते दाह लहज़ि जूंशी तोह।

यीशु ज़ि कुई कि संसारा रिंङ छा चीज खोकसिमी रूठे तोह परमेश्वरो राजा रिंङ बंङज़ि तोह। दोऊ राजा रिंङ इबिमी थल्जी ज़रूरी तोह कि परमेश्वर केतिंङ केहतु पापो दोरच़ी बचाएपोतो।

यीशु ज़ि कुई कि रे मीहच़ी दोबि ग्रहण लोहर। परमेश्वर दू मीहतिंङ बचाएपोतो। पर ऊई मीहरे दोबि ग्रहण माह लोहर। दोई दि ला कुई कि रैह मीहरे रूठे ज़मीनो ठ्रोह तोतोर, छना कुचे दोरे यीशु पाहठी रूठे खबर ग्रहण लेह च़रचातोर, दंङ परमेश्वरे दोतिंङ बचाएच़ा। पर रे मीहरे अमो ज़मीनो ठ्रोह तोतोर। परमेश्वरो बचन बेईज़ो ठ्रोह अमरिंङ दप्पा, पर दोर्तिंङ छल्ले फसल माह अपा। दि मीहरे यीशु पाहठी रूठे खबर अस्वीकार लेह च़रचातोर। दोरे दोऊ राजा इबिमी दोरच़ी इंकार लेह च़रचातोर।

यीशु ज़ि सिखाएति कि परमेश्वरे पापी तंङ साते महसे दाह लहज़ा। दोई दोतिंङ माफ लेह जुंज़ा दंङ दोतिंङ एनोह कटुरे बणाएच़ि जुंज़ा।

यीशु ज़ि दि ला कंड्रिरी कि परमेश्वरे पापा रंङ साते महस नफरत लहज़ा। छना कुचे आदम ए हव्वा ज़ि पाप लाहतेर। झांह लेह दोकु खामदाने ला पाप लहरी। दि संसारा रिंङ बंङज़ा हर इच्चा मीहच़ी पाप लहज़ा दंङ परमेश्वरे बे ऊईतार तोह। हर इच्चा मीह परमेश्वरो बैरी तोह।

पर परमेश्वरे दि संसारा रिंङ बंङज़ा हर इच्चा मीहतंङ साते झांह ठ्रोह दाह लहरी: दोई एनोह एकलौता योह रैं च़रति ताकि परमेश्वरे दोतिंङ सज़ा रंड्री माह जूंस अंऊ दोऊ टोईच़ी विशवास लहज़ातोर। दोऊ बजाए, दोरे दोरंङ साते हमेशा ओ थल्जी बंङज़ोर।

केरे सिमी जोगे तोतोंई, छना कुचे केहच़ी पाप लहसी तातंई। केतंङ साते परमेश्वरो रोहष लहज़ि ठीक ए शुह, दोऊ बदला, दू यीशु रंङ साते रोह्षेक्च़ा इलि। दोई यीशु बि क्रूसो मौत रें सज़ा रें च़रति।

यीशु ज़ि अपेहल ला पाप लहसी माह शुह, पर दोई परमेश्वरा बि दोबि सज़ा रंड्री रांई। दोई सिए स्वीकर लेह च़रति। झांह ठ्रोह, केहतु पाप ए दि संसारा रिंङ बंङज़ा हर इच्चा मीहू पाप उठाएच़िमी थल्जी इच्चा सिद्ध बलिदान लेह च़रति, झांह लेह परमेश्वर अंऊ ला पाप बि, देर तचेक कि भयंकर पाप ला माफ लेह च़रचा।

भले ए केहच़ी महस रूठे कम लहज़ातंई, दंङ दिऊ बहज़ा ज़ि परमेश्वरे केतिंङ माह बचाएपोतो। दोऊ मित्र बणेक्च़िमी थल्जी झांह ठ्रोह छल्ले माह अंऊ केहच़ी लेह तरपोंई। दिऊ बदला रिंङ, केतिंङ विशवास लेह जूंशी तोह कि यीशु ए परमेश्वरो योह शुह, दंङ दू केहतु बदला रिंङ क्रूसो टोईच़ी सिए इलि, दंङ दि ला कि परमेश्वरे दोबि यहच़ा श्रींङमी लेह च़रति। अगर केहच़ी दिऊ टोईच़ी विशवास लोहनि ता, दंङ परमेश्वर केहतु पापो माफी रमतो।

परमेश्वरे दू हर इच्चा मीहबी बचाएपोतो। अंऊ दोई यीशु टोईच़ी विशवास लहज़ा दंङ दोबि एनोह प्रभु स्वीकार लहज़ा। पर दोई दोतिंङ माह बचाएपोतो। अंऊ दोऊ टोईच़ी विशवास माह लहज़ातोर। दि गप्पा ओ छल्ले मतलब माह कि केरे गरीब शुंई या साहुकार, गंङमी शुंई या मेच़िमी, यंङदे शुंई या जावान, या केरे अंऊर बंङज़ातंई। परमेश्वरे केतंङ साते दाह लहज़ा दंङ दि जुंज़ा कि केहच़ी यीशु टोईच़ी विशवास लंहि कि दू केहतु मित्र बणेंकी तरपोतो।

यीशु ज़ि केतिंङ बुलाएच़ा कि दोऊ टोईच़ी लंहि दंङ बपतिस्मा लेहपतुंई। छि केहच़ी विशवास लहजातंई आ कि परमेश्वरो इच्चा योह, यीशु ए मसीह शुह? छि केहच़ी विशवास लहज़ातंई कि केरे पापी शुंई दंङ दि कि परमेश्वरो दोरच़ी सज़ा खोकच़िमी जोगे तोतोंई? छि केहच़ी विशवस लहज़ातंई आ कि केहतु पापो योहच़िमी थल्जी यीशु क्रूसो टोईच़ी सिए शुह?

अगर केहच़ी यीशु टोईच़ी ए दंङ अंऊ दोई केहतु थल्जी लहसी शुह दोऊ टोईच़ी विशवास लहज़ातंई, दंङ केरे इच्चा मसीह शुंई! शैतान एनोह हंयारो राजा रिंङ एंतेग केहतु टोईच़ी राज माह लहज़ा। एंतेग परमेश्वर एनोह छंङी ओ राजा रिंङ केहतु टोईच़ी राज लहज़ा। दोई केतिंङ पाप लहज़िमी दोरच़ी रोकेगी च़रचातो, अंऊ दोबि केहच़ी लहज़ातेंई। दोई केतिंङ इच्चा खरकोई, ए रूठे जीवन रांहषी ततो।

अगर केरे इच्चा मसीह शुंई ता अंऊ यीशु ज़ि लहसी ततो दोऊ वहज़ा ज़ि परमेश्वरे केहतु पाप माफ लेह च़रचातो। एंतेग, परमेश्वर केतिंङ एनोह सच्च मित्र ञेंहच़ा।

अगर केरे परमेश्वरो मित्र शुंई दंङ प्रभु यीशु सेवक शुंई ता केहच़ी दू गप्पा तु भाषे लहज़िमी कोशिश लोहनि अंऊ गप्पा यीशु ज़ि केतिंङ सिखाएच़ा। भले ए केरे इच्चा मसीही शुंई, शैतान एंतेग ला पाप लहज़िमी थल्जी केहतु परीक्षा लोहतो। पर परमेश्वरे हमेशा दू लहज़ा अंऊ दोई कुट्रा कि दोई लोहतो। दोई कुट्रा कि अगर केहच़ी केनातु पाप मानेकी केट्रातंई, दंङ दोई केतिंङ माफ लेह च़रपोतो। दोई केतिंङ पापो खिलाप शुहबिमी थल्जी सामर्थ् रमतो।

परमेश्वर केतिंङ प्रार्थना लहज़ि ए दोऊ बचन पढेक्पिमी थल्जी कुट्रा। दोई केतिंङ ऊई विशवासी तंङ साते ठ्रोहका शुचि दोऊ आराधना लहज़िमी थल्जी ला कुट्रा। केतिंङ ऊई मीहतिंङ ला कंड्री जूंशी तोह कि दोई केहतु थल्जी छि लहरी। अगर केहच़ी दि भत्ते लोहनि, दंङ केरे दोऊ इच्चा पक्का मित्र बणेंकी योंई।