48. यीशु ए वायदा लहसी मसीह शुह

अपेहल परमेश्वरे संसार बणाएक्ते दंङ भत्ते धिर रूठे तोहई। छल्ले पाप माह तोहई। आदम ए हव्वा इदि-अईदि रंङ साते लहज़ातेर, दंङ दोरे परमेश्वरा रंङ साते ला दाह लहज़ातेर। छल्ले बीमारी या मौत माह तोहई। परमेश्वरे झांह ठ्रोह संसार जुंज़ाते।

शैताने ओमड्रो ज़रिये बागा रिंङ हव्वा रंङ साते गप्पा लहरी, छना कुचे दोई दोबि धोखा रंड्राते। दोहपल हव्वा ए आदमे परमेश्वरो खिलाप पाप लहरिर। छना कुचे दोच़ि पाप लाहतेर झांह लेह धरतिऊ टोईच़ी बंङज़ा भत्ते मीहरे सिवातोर।

छना कुचे आदम ए हव्वा ज़ि पाप लाहतेर, झांह लेह ऊई ला मदम शुई। दोरे परमेश्वरो बैरी बणेंकी इलिर। अतु नतीज़ा दि शुई कि, दोहपल बेहच़ी हर इच्चा मीह पाप लहज़ि शुरू लेह च़रति। हर इच्चा मीह जेहक्पिमी बेहच़ी परमेश्वरो बैरी बणेंकी यवाह। परमेश्वर ए मीहतु बिचंङ शांति माह तोहई। पर परमेश्वरे शांति रंड्री जुंज़ाते।

परमेश्वरे वायदा लहरी कि हव्वा इच्चा खानदाने शैतानो पुंज़ा काकि च़रपोतो। दोई दि ला कुई कि शैताने दोऊ थुह्री रिंङ डंक रमतो। अई पाहठी, शैताने मसीह बि सच़ि च़रपोतो, पर परमेश्वरे दोबि यहच़ा श्रींङमी लेह च़रपोतो। दोऊ थल, मसीह ज़ि शैतानो शाक्ति हमेशा ओ थल्जी योह्च़ी च़रपोतो। महस सालो थल, परमेश्वरे दि प्रकट लहरी कि दू मसीह यीशु शुह।

परमेश्वरे दू ढाड़ो दोरच़ी एनोह टबरार बचाएति अपि दोई हपिमी तते। नूहो हखा इच्चा मोह्ड़े किश्ती बणाएच़िमी थल्जी कुई कि झांह ठ्रोह परमेश्वरे दू मीहतिंङ बचाएति अंऊ दोच़ि दोऊ टोईच़ी विशवास लहज़ातेर। झांह ठ्रोह, दोरे भत्तेर परमेश्वरो दोरच़ि सच़िमी जोगे तोईरे छना कुचे दोच़ि पाप लहसी तारेर। पर परमेश्वरे दू भत्ते तिंङ बचाएच़िमी थल्जी यीशु बि च़रति अंऊ दोऊ टोईच़ी विशवास लहज़ातोर।

सैंकड़ों साल तचेक, पुरोहिता ज़ि परमेश्वरो थल्जी बलिदान चढ़ाएच़ातेर। दोई दि कंड्रा कि मीहच़ी पाप लहसी शुह, दंङ दि ला कि दोरे परमेश्वरो दोरच़ी सज़ा रंड्रीमी जोगे तोईरे। पर दू बलिदान दोतु पाप माफ लेह मरति। यीशु भत्ते बे मोह्ड़े पुरोहित शुह। दोई दू लहरी अंऊ अच़िला पुरोहिते लेह मरति। दोई दोबि बलिदान शुहबिमी थल्जी एनाबि रैं च़रति अच़ि हर इच्चाओ पाप योहच़ी च़रचा। दोई स्वीकार लेह च़रति कि परमेश्वरे दू भत्ते तु पापो थल्जी पापो थल्जी दोबि सज़ा रांई। झांह लेह, यीशु सिद्ध मोह्ड़े पुरोहित तोहई।

परमेश्वरे अब्राहमो हखा कुई, “गेह कांह दोरच़ी संसारो भत्ते जाति बि आशीष रमोग।” यीशु दि ए अब्राहमो खानदान तोहई। परमेश्वरे अब्राहमो दोरच़ी भत्ते जाति तिंङ आशीष रंड्रा, छना कुचे अच़ि ला यीशु टोईच़ी विशवास लहज़ा परमेश्वर दू भत्ते तिंङ पापो दोरच़ी बचाएच़ा। अपेहल दि मीहच़ी यीशु टोईच़ी विशवास लहज़ातोर, दू मुक्का परमेश्वर दोतिंङ अब्राहमो खानदान चेहच़ा।

परमेश्वरे अब्राहमो हखा कुई कि दू एनोह योह, दोऊ थल्जी बलिदान लेह च़रपोतो। पर यहच़ा परमेश्वरे इसहाको बदला रिंङ बलि लहज़िमी थल्जी इच्चा कुरच़ा रें च़रति। हेनर भत्तेर हेंदु पापो थल्जी सच़िमी जोगे तोईनि! पर परमेश्वरे हेंदु ठाहरि सिमी थल्जी यीशु बि बलिदानो रूपा रिंङ रें च़रति। झांह लेह हेंज़ि यीशु बि परमेश्वरो कुरच़ा कुट्री।

अपेहल परमेश्वरे मिस्रो टोईच़ी अंतिम मुसीबत च़रति दंङ दोई हर इच्चा इस्राएली टबरातु हखा कुई कि दोच़ि इच्चा कुरच़ो बलि लंहि। दू कुरच़ा बि छल्ले दोष शुहबी माहलेपा। दोहपल एनोह पेतंङों टोईच़ी दंङ चुंङ दोऊ षुह्ई लगाएच़ी जुंज़ातेर। दोहपल परमेश्वरे दू षुह्ई खंई ता दू दोतु चुंङों तुंखा शुचि इलज़ि तोहई दंङ दोतु मुंड़ो कटु सच़ि माह केहट्री। अपेहल दि शुई ता परमेश्वरे दोबि फसहो तयार कुई।

यीशु फसहो तयारो इच्चा कुरच़ो ठ्रोह तोह। दोई अपेहल ला पाप माह लहरी, झांह लेह दोई छल्ले गलत माह तोहई। दू फसहो तयारो मुक्का सिए इलि। अपेहला अच़िया यीशु टोईच़ी विशवास लहज़ाते, दोहपल यीशु षुह्ई दू मीहू पापो कीमत चुकाएच़ा। दि झांह ठ्रोह तोह छना कि परमेश्वर दू मीहू कछंङ ज़ि तुंखा शुच़ि इलि, छना कुचे दोई दोबि सज़ा माह रंड्रा।

परमेश्वरे इस्राएली मीहतिंङ साते इच्चा वायदा लहसी तते, छना कुचे दोरे झांह ठ्रोह मीहरे तोईरे अपि परमेश्वरे एनोह शुहबिमी थल्जी बुलासी तते। पर परमेश्वरे इच्चा झांह ठ्रोह वायदा लहरी अंऊ कि भत्ते तु थल्जी शुह। अगर अंऊला जाति ओ अरिला मीह दि वायदा ग्रहण लहज़ा, दंङ दू परमेश्वरो मीहतु बिचंङ शामिल शुचि योतो। दोई दि झांह ठ्रोह लहज़ा छना कुचे दोई यीशु टोईच़ी विशवास लहज़ा।

मूसा इच्चा झांह ठ्रोह भविष्यवक्ता तोह अच़ि परमेश्वरो बचनो मोह्ड़े सामर्थ रंङ साते प्रचार लहज़ाते। पर यीशु भत्ते बे मोह्ड़े भविष्यवक्ता तु बिचंङ ज़ि भत्ते बे मोह्ड़े शुह। दू परमेश्वर शुह, झांह लेह छिल्ला धिर दोई लहरी ए कुई दू परमेश्वरो कम ए बचन शुह। झांह लेह पवित्र-शास्त्रे यीशु बि परमेश्वरो बचन कुट्रा।

परमेश्वरे रज्ज़ा दाऊदो हखा वायदा लही ताहरे कि रज्ज़ा ओ रूपा रिंङ दोऊ खानदान परमेश्वरो मीहतु टोईच़ी हमेशा राज लोहतो। यीशु परमेश्वरो योह ए मसीह शुह, झांह लेह दू रज्ज़ा दाऊदो खानदानो तोहई अंऊ हमेशा ओ थल्जी राज लेह तरपोतो।

दाऊद ता इस्राएलो रज्ज़ा तोहई, पर यीशु भत्ते संसारो रज्ज़ा शुह! दू यहच़ा अपतो दंङ हमेशा ओ थल्जी न्याय ए शांति रंङ साते एनोह राजो टोईच़ी राज लोहतो।