47. फिलिप्पी रिंङ पौलुस ए सीलास

अपेहल शाऊले भत्ते रोमी साम्राज्य रिंङ यात्रा लहरी दंङ दोई एनोह रोमी मिन “पौलुस” केहच़ी च़रति। इच्चा ध्याड़ा, पौलुस ए दोऊ मित्र सीलास फिलिप्पी नगरंङ यीशु पाहठी रूठे खबर सुनाएच़िमी थल्जी इलिर। दोरे नगरो धकते बेंड़ी ओ मुखारिंङ इच्चा ठाहरि अच़ा इलिर अंऊर मीहरे प्रार्थना लहज़िमी थल्जी ठ्रोहका शुचि तोईरे। दोर्तिंङ दोरे लुदिया मिन्दु इच्चा मेच़िमी रंङ साते दोईरे अंऊ इच्चा व्यापारी तोहई। दोई परमेश्वरा रंङ साते दाह लहज़ाते दंङ दोऊ आराधना लहज़ाते।

परमेश्वरे लूदिया बि यीशु टोईच़ी विशवास लहज़िमी जोगे लहरी। पौलुस ए सीलासे दोबि ए दोऊ टबरातिंङ बपतिस्मा रांईरे। दोई पौलुस ए सीलासा बि एनोह चुंङ अपिमी थल्जी कुईरे, झांह लेह दू दोर्तिंङ बंङज़ा इलि।

पौलुस ए सिलास मीहतिंङ हमेशा दू ए ठाहरि दोआतेर अंऊर यहूदी मीहरे प्रार्थना लहज़ातेर। रोज़े अपेहल दोरे दोरच़ी यवातेर दंङ इच्छा परगर मेच़िमी कटु अंऊ दोऊ अंदरेग मांजी आत्मा तोहई दोतु पीछा लहज़ाते। दि मांजी आत्मा ओ वहज़ा ज़ि दोई मीहतिंङ भविष्य कंड्राते, दोई भविष्य कंड्रा एनोह मालिका तु थल्जी महस ढ्बाह कमाएच़ाते।

दोतु इबिमी मुक्का दि परगर मेच़िमी कटु हाऊष रंड्राते, “दिरे परम प्रधान परमेश्वरो सेवकार शुरे। दिच़ि केतिंङ उद्धारो अम कंड्रातोर!” दोई रोज़े ध्यां लहज़ाते अंऊ दोरच़ी कि पौलुस नाराज़ शुचि इलि।

थल मुखंङ, इच्चा ध्याड़ा अपेहल दू मेच़िमी कटुई हाऊष रंड्री शुरू लहरी, दंङ पौलुसे दोऊ हखा किरच़ा दोऊ अंदरेग कि मांजी आत्मा बि कुई, “यीशु मिन्दिंङ दिऊ दोरच़ी हुंच़ा ईला।” दू ए मुक्का दू मांजी आत्मा ज़ि दू छोड़ेके च़रति।

दू परगर मेच़िमी कटु मालिक महस रोहषेक्च़ा इलि। दोतिंङ पता लेहकी इलि कि दू मांजी आत्मा मेह दू मच़िमी कटु मीहतु भविष्य कंड्री मरपोतो। दिऊ मतलब तोह कि मीहच़ी दोऊ मालिका तिंङ ढबाह माह रमतो कि दोई दोतिंङ भविष्य कंबोतो कि दोतंङ साते छि शोतो।

झांह लेह दू परगर मेच़िमी कटु ओ मालिक पौलुस ए सीलासा बि रोमी अधिकारी तु कछंङ रैंज़ा शिलि। दोच़ि पौलुस ए सीलासा बि तेंङी च़रतिर, दंङ दोहथल दोतिंङ जेलारिंङ केहच़ी च़रतिर।

दोच़ि पौलुस ए सीलासा बि जेलो झांह ठ्रोह ठाहरि रिंङ केहच़ी च़रतिर अंऊर महस सेनिकार तोईरे। देर तचेक कि दोच़ि दोतु कोंज़ार सिङों महस मोह्ड़े टुकड़ा रंङ साते जोड़ेके च़रतिर। पर पौलुस ए सीलास आधा रातो मुक्का, परमेश्वरो स्तुति ओ गीत कुट्री लेहकी तोईरे।

अचानाक ए, इच्चा मोह्ड़े भूयंल अति! जेलो भत्ते पेतंङ अलसा इलिर, दंङ भत्ते कैदी तु षंङणी युह्पसा षोडीङ दह्च़े इलि।

अपेहल थानेदार चेहकी इलि। दंङ दोई खांई कि जेलो भत्ते पेतंङ अलसा इलजि तोतोर। दोई सोचेक्ति कि भत्ते कैदीर पोक्‍शे इलज़ि तोतोर। दू वेवा इलज़ि तोहई कि दोतु पोक्पिमी वहज़ा ज़ि रोमी अधिकारी दोबि सच़ि च़रपोर, झांह लेह दू एनाबि सच़िमी थल्जी तयार शुचि इलि! पर पौलुस दोबि खंड्रा हाऊष रैं च़रति, “रूहम्ज़ा इल! केनाबि नुकसान थालोह। ञेंरे भत्तेर देर ए तोतोंई।”

दू थानेदारे डगेकी पौलुस ए सीलासो हखा रूहक्ति, “उद्धार खोकच़िमी थल्जी छि लोहग?” पौलुसे जबाब रांई, “प्रभु यीशु टोईच़ी विशवास लोह, दंङ केई ए कांह खानदाना बि उद्धार खोकसोतो।” दोहपल दू थानेदारे पौलुस ए सीलासा बि एनोह चुंङ रेंज़ा शिलि दंङ दोतु कोंज़ा। पौलुसे दोऊ चुंङी भत्ते टबरातिंङ यीशु पाहठी रूठे खबर सुनाएति।

थानेदार ए दोऊ भत्ते टबरा ज़ि यीशु टोईच़ी विशवास लहरिर, झांह लेह पौलुस ए सीलासे दोबि बपतिस्मा रैं च़रति। दोहपल थानेदारे पौलुसे ए सीलास बि बगत रांई, दंङ दोरे इच्चा साते खुश शुचि इलिर।

ऊईरग नगरो अगुवा ज़ि पौलुस ए सीलासा बि जेलो दोरच़ी आज़ाद लेह च़रति दंङ फिलिप्पी ज़ि अच़ा इबिमी थल्जी कुई। पौलुस ए सीलासा बि लूदिया ए ऊई मित्रा तंङ साते दॉओनि दंङ दोऊ थल नगरो दोरच़ी हुंच़ा इलि। यीशु पाहठी रूठे खबर महस फैलेकी इलि, दंङ कलीसिया ला बढ़ेक्पि लेहति।

पौलुस ए ऊई मसीह अगुवा ज़ि महस नगरो यात्रा लहरिर। दोच़ि मीहतिंङ यीशु पाहठी रूठे खबर सुनाएतिर। दोच़ि कलिसिया ओ विशवासी तिंङ उत्साहित लहज़िमी ए शिक्षा रंड्रीमी थल्जी महस डाक ला चेहतिर। दितु बिचंङ ज़ि रैह डाक बाइबलो कताब ला बणेंकी इलिर।